តាមប្រភពព័ត៌មាន Goal បានឲ្យដឹងថា កីឡាករជើងខ្លាំងប្រចាំក្លឹបអ្នកមានបារាំង Neymar បានឈ្នះពានកីឡាករប្រេស៊ីលល្អផ្តាច់គេនៅអឺរ៉ុប Samba d’Or ជាលើកទីបីក្នុងអាជីពរបស់ខ្លួន ។
ពានរង្វាន់នេះត្រូវបានបោះឆ្នោតដោយអ្នកគាំទ្រ អ្នកសារព័ត៌មាន និងអតីតកីឡាករបាល់ទាត់ដទៃទៀត ។ គេរើសយកកីឡាករជនជាតិប្រេស៊ីល ដែលលេងបានល្អជាងគេក្នុងទ្វីបអឺរ៉ុប ។
Neymar បានឈ្នះពាននោះពីរលើករួចមកហើយនៅឆ្នាំ ២០១៤ និង ២០១៥ កាលពីខ្លួននៅលេងឲ្យក្លឹបអ្នកមានបុណ្យ Barcelona ។ កាលពីឆ្នាំ២០១៦ ពានរង្វាន់នេះបានធ្លាក់ទៅលើខ្សែបម្រើរបស់បច្ចុប្បន្នកីឡាកររបស់ Barcelona ដែលទៅជំនួសកន្លែងរបស់ Neymar ឈ្មោះ Philippe Coutinho ។
គួរបញ្ជាក់ថា Neymar បានរកគ្រាប់បាល់ជូនក្លឹប១៧គ្រាប់ហើយ ក្នុងការប្រកួតទាំង២០លើក តាំងពី PSG ទិញក្នុងតម្លៃ២២២លានអឺរ៉ូមកក្នុងខែសីហា ។ ពានរង្វាន់ Samba d’Or នេះ នឹងប្រគល់ជូន Neymar នៅក្នុងពិធីពិសេសនៅទីក្រុងប៉ារីស នាខែកុម្ភៈខាងមុខនេះ ៕
ចែករំលែកព័តមាននេះ