រាជធានីភ្នំពេញ ៖ មកទល់ពេលនេះ គេកត់សម្គាល់ថា មន្ត្រីជាន់ខ្ពស់កម្ពុជាចំនួន៦រូប ខ្លាំងទាំងក្បាច់គុន ខ្លាំងទាំងការងាររដ្ឋាភិបាល ធ្វើឱ្យមហាជនកោតសរសើរយ៉ាងខ្លាំង ជាពិសេសចំពោះសមត្ថភាពផ្នែកកីឡាប្រយុទ្ធដែលឈានដល់ខ្សែក្រវាត់ខ្មៅចាប់ពី២ដាន់ដល់៨ដាន់បន្ថែមពីលើចំណេះដឹង និងសមត្ថភាពក្នុងការដឹកនាំក្រសួងស្ថាប័នដែលពួកលោកទទួលខុសត្រូវនោះផង និងមានការទទួលស្គាល់ពីស្ថាប័នកីឡាជាតិ និងអន្តរជាតិផង ។
មន្ត្រីជាន់ខ្ពស់ទាំង៦រូបដែលខ្លាំងទាំងក្បាច់គុន ខ្លាំងទាំងការងាររដ្ឋាភិបាលនោះមាន៤រូបជារដ្ឋមន្ត្រីគឺ ៖
១-លោក អូន ព័ន្ធមុន្នីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គឺជាអ្នកទទួលបានខ្សែក្រវាត់ខ្មៅកម្រិត៧ដាន់កាលពីដើមឆ្នាំ២០១៧ ពីសហព័ន្ធកីឡាការ៉ាតេដូជប៉ុន នៅទីស្នាក់ការគណៈកម្មាធិការជាតិអូឡាំពិកកម្ពុជា ។
លោកក៏ត្រូវបានរាជរដ្ឋាភិបាលតែងតាំងជាប្រធានខេមរសហព័ន្ធការ៉ាតេដូកម្ពុជាផងដែរ ក្រៅពីមុខតំណែងជារដ្ឋមន្ត្រីដ៏មមាញឹករបស់លោក ដោយសារតែលោកមានការយល់ដឹងពីក្បាច់គុនការ៉ាតេដូច្បាស់លាស់ ហើយប្រឡងជាប់ទាំងខ្សែក្រវាត់ខ្មៅកម្រិត៧ដាន់ ក្រោមការទទួលស្គាល់ពីសហព័ន្ធកីឡាការ៉ាតេដូជប៉ុនផងដែរ ។
នេះជាគឺមោនទនភាពធំមួយដែលកម្ពុជាមានមន្ត្រីមានឥទ្ធិពលធំនៅក្នុងជួររាជរដ្ឋាភិបាល និងក្នុងសហព័ន្ធកីឡាការ៉ាតេដូកម្ពុជា ហើយមានចំណេះ និងជំនាញពិតប្រាកដ ដែលផ្ទុយពីពេលកន្លងមក គឺមន្ត្រីជាប្រធានសហព័ន្ធមិនសូវមានអ្នកជំនាញពិតប្រាកដនៅក្នុងវិស័យកីឡាទេ ។ លោកក៏ត្រូវគេឃើញបង្ហាញមុខយ៉ាងសកម្មក្នុងកិច្ចការកីឡា ដែលធ្វើឱ្យវិស័យការ៉ាតេដូកម្ពុជាមានការរីកចម្រើនផងដែរ ជាពិសេសក្នុងការបណ្ដុះធនធានកីឡាករក្មេងៗនៅក្នុងវិស័យនេះ។
២-លោក លឹម គានហោ រដ្ឋមន្ត្រីក្រសួងធន ធានទឹក និងឧតុនិយម ក៏ជាមន្ត្រីជាន់ខ្ពស់មួយរូបដែលមានឥទ្ធិពលក្នុងជួររាជរដ្ឋាភិបាលកម្ពុជា ដែលមានខ្សែក្រវាត់ខ្មៅកម្រិត៦ដាន់ ក្រោមការប្រគល់ជូនដោយសហព័ន្ធកីឡាការ៉ាតេដូជប៉ុនផងដែរ ខណៈដែលខ្សែក្រវាត់នេះត្រូវបានប្រកាសថា មានការហ្វឹកហាត់ និងប្រឡងច្បាស់លាស់ មុនពេលដែលលោកត្រូវប្រគល់ឱ្យជាសាធារណៈ ។
ការទទួលបានខ្សែក្រវាត់ខ្មៅ៦ដាន់របស់លោក លឹម គានហោ គឺជាមោទនភាពធំមួយរបស់កម្ពុជា ដែលមានន័យថា បើទោះជាមន្ត្រីជាន់ខ្ពស់កម្ពុជាមានការមមាញឹកនៅក្នុងកិច្ចការដឹកនាំប្រទេស និងសាមីក្រសួងយ៉ាងណាក៏ដោយ ក៏ការហ្វឹកហាត់កីឡាដើម្បីការពារខ្លួន និងដើម្បីឱ្យមានសុខភាពល្អរបស់ពួកលោកនៅតែត្រូវបានធ្វើរហូតមានការប្រកាសទទួលស្គាល់ពីសហព័ន្ធកីឡាការ៉ាតេដូរបស់ជប៉ុនកាលពីដើមឆ្នាំ២០១៧ មុននេះ។
៣-លោក ប៉ាន់ សូរស័ក្ដិ រដ្ឋមន្ត្រីក្រសួងពាណិជ្ជកម្ម ដែលត្រូវគេមើលឃើញថា មានភាពសកម្មក្នុងកិច្ចការពាណិជ្ជកម្មនៅកម្ពុជា ក៏ត្រូវបានប្រកាសថាទទួលបានខ្សែក្រវាត់ខ្មៅកម្រិត២ដាន់ក្នុងពេលជាមួយគ្នានោះផងដែរ ។
ថ្វីដ្បិតតែធៀបនឹងមន្ត្រីជាន់ខ្ពស់២រូបខាងលើ លោកនៅមានកម្រិតក្នុងការទទួលបានខ្សែក្រវាត់ខ្មៅនៅឡើយ ក៏ការទទួលបានកម្រិត២ដាន់មិនមែនជារឿងធម្មតានោះទេសម្រាប់មន្ត្រីម្នាក់ដែលមានការទទួលខុសត្រូវខ្ពស់ក្នុងការងារ ហើយឆ្លៀតពេលហ្វឹកហាត់ និងបង្ហាញសមត្ថភាពរហូតទទួលបានខ្សែក្រវាត់ខ្មៅកម្រិត២ដាន់ ក្រោមការទទួលស្គាល់របស់សហព័ន្ធកីឡាការ៉ាតេដូរបស់ជប៉ុនដូចគ្នា ។
ក្នុងពេលទទួលបានខ្សែក្រវាត់ខ្មៅនាពេលនោះ លោកបានប្រកាសថា ទោះស្ថិតក្នុងកាលៈទេសៈណាក៏ដោយ វិស័យកីឡានៅតែមានប្រយោជន៍សម្រាប់បុគ្គលគ្រប់រូប ជាពិសេសគឺក្រៅពីអាចឱ្យអ្នកហ្វឹកហាត់នោះចេះការពារខ្លួន ក៏មានប្រយោជន៍សម្រាប់សុខភាពផងដែរ ។ លោកក៏បានទទូចឱ្យយុវជន និងមន្ត្រីមួយចំនួនងាកមកធ្វើកិច្ចការជាមួយកីឡា បើទោះជាមិនដល់កម្រិតដណ្ដើមបានខ្សែក្រវាត់ខ្មៅកម្រិតណាមួយដូចលោក និងមន្ត្រីជាន់ខ្ពស់ផ្សេងទៀត ដែលត្រូវបានប្រកាសឡើងក្ដី។
៤-លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡារូបនេះ ក៏ត្រូវបានប្រកាសថា ជាម្ចាស់ខ្សែក្រវាត់ខ្មៅតេក្វាន់ដូគួរឱ្យកោតសរសើរផងដែរ ដោយលោកទទួលបានតាំងពីចុងឆ្នាំ២០១៦ ក្រោមការប្រកាសជូនដោយលោក ឆយ យ៉ុងសុក ជាគ្រូបង្វឹកផ្នែកតេក្វាន់ដូជម្រើសជាតិកម្ពុជា បន្ទាប់ពីលោកសម្ងំហ្វឹកហាត់ និងប្រឡងជាប់ជាស្ថាពរ។
លោកត្រូវបានមហាជន ជាពិសេសគឺសិស្សគុនក្នុងខេមរៈសហព័ន្ធតេក្វាន់ដូកោតសរសើរយ៉ាងខ្លាំង ដោយសារតែលោកមិនត្រឹមតែមានសមត្ថភាពដឹកនាំវិស័យអប់រំឱ្យមានគុណភាព និងជំរុញវិស័យកីឡាឱ្យមានការឈានឡើងក្រោមតំណែងជារដ្ឋមន្ត្រីរបស់លោកប៉ុណ្ណោះទេ តែក៏មានសមត្ថភាពផ្នែកក្បាច់គុនបន្ថែមផងដែរ ដែលអាចនិយាយបានថា រដ្ឋមន្ត្រីក្រសួងអប់រំមុនៗមិនមាន ។
គេឃើញលោកទទួលបានខ្សែក្រវាត់ខ្មៅ ក្រោមការប្រឡង និងកាត់សេចក្ដីច្បាស់លាស់ ដោយខ្សែក្រវាត់ដែលលោកទទួលបានគឺមិនត្រឹមតែទទួលស្គាល់ក្នុងរង្វង់តេក្វាន់ដូក្នុងស្រុកប៉ុណ្ណោះទេ តែក៏មានការទទួលស្គាល់ពីសហព័ន្ធតេក្វាន់ដូរបស់កូរ៉េផងដែរ។
៥-លោក កែវ រ៉េមី រដ្ឋលេខាធិការ និងជាអនុប្រធានអង្គភាពព័ត៌មាន និងប្រតិកម្មរហ័សរបស់ទីស្ដីការគណៈរដ្ឋមន្ត្រី ក៏ត្រូវបានគេស្គាល់ថាជាម្ចាស់ខ្សែក្រវាត់ខ្មៅផ្នែកតេក្វាន់ដូកម្រិត៥ដាន់ផងដែរ ។
លោកទទួលបានខ្សែក្រវាត់កម្រិតខ្ពស់នេះតាំងពីចុងឆ្នាំ២០១៦ ដោយលោកបញ្ជាក់ថា លោកទទួលបានខ្សែក្រវាត់ខ្មៅកម្រិត៣ដាន់តាំងពីលោកហ្វឹកហាត់នៅឯសហរដ្ឋអាមេរិក និងបានបន្តការហ្វឹកហាត់នៅក្នុងប្រទេសកម្ពុជាបន្ថែមទៀត រហូតទទួលបានខ្សែក្រវាត់ខ្មៅកម្រិត៤ដាន់ និង៥ដាន់ចុងក្រោយនេះ ។
លោកអះអាងថា ខ្សែក្រវាត់ខ្មៅដែលលោកទទួលបានមិនមែនជាខ្សែក្រវាត់ប្រភេទកិត្តិយសនោះទេ តែជាខ្សែក្រវាត់ប្រភេទប្រយុទ្ធដែលមានន័យថា លោកបានឆ្លងកាត់ការហ្វឹកហាត់ក្បាច់គុនមួយនេះច្រើនដំណាក់កាល និងមានការប្រឡងទទួលស្គាល់ត្រឹមត្រូវ ។ អ៊ីចឹងហើយទើបលោកត្រូវបានតែងតាំងជាប្រធានសហព័ន្ធកីឡាតេក្វាន់ដូអាស៊ីអាគ្នេយ៍ មកទល់នឹងបច្ចុប្បន្ននេះ ។
៦-លោក សាមឺឌី ស៊ីវឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា គឺជាអ្នកទទួលបានខ្សែក្រវាត់ខ្មៅផ្នែកការ៉ាតេដូកម្រិតខ្ពស់ជាងគេ ក្នុងចំណោមមន្ត្រីជាន់ខ្ពស់ខាងលើ ដោយលោកទទួលបានរហូតដល់៨ដាន់ដែលជាកម្រិតខ្ពស់បំផុតពីសហព័ន្ធកីឡាការ៉ាតេដូជប៉ុន។
ការទទួលបានខ្សែក្រវាត់របស់លោកក៏ជាមុខមាត់មួយជួយកម្ពុជាទទួលបានកិត្តិយស ក្រោយពីមានមន្ត្រីជាន់ខ្ពស់ច្រើនឡើងងាកមកចាប់អាជីពកីឡានោះផងដែរ ។
កោះសន្ដិភាពនឹងចុះផ្សាយលម្អិតពីប្រវត្តិក្នុងការហ្វឹកហាត់របស់មន្ត្រីជាន់ខ្ពស់ទាំង៦រូប មុនទទួលបានខ្សែក្រវាត់ខ្មៅនៅក្នុងពេលនេះនៅពេលបន្តបន្ទាប់ ៕
ចែករំលែកព័តមាននេះ