រាជធានីភ្នំពេញ ៖ យោងតាមអត្ថបទមួយដែលចេញផ្សាយដោយក្រសួងបរិស្ថាន ផ្អែកទៅការសិក្សារបស់វិទ្យាស្ថានស្រាវជ្រាវការប្រែប្រួលអាកាសធាតុដែលបានចេញផ្សាយកាលពីពេលថ្មីៗនេះបានឲ្យដឹងថា ក្នុងរយៈ១០ឆ្នាំខាងមុខ មនុស្សប្រមាណ១០លាននាក់ នឹងត្រូវបង្ខំចាកចេញពីផ្ទះសម្បែងរបស់ខ្លួន ដោយសារតែការប្រែប្រួលអាកាសធាតុ ហើយបញ្ហានេះនឹងក្លាយជាបញ្ហាចម្បងបង្អស់របស់ពិភពលោកដែលមិនធ្លាប់មានពីមុនមក។
ប្រភពដដែលបានបន្ដថា មន្ត្រីជាន់ ខ្ពស់នៃទាហានសហរដ្ឋអាមេរិក និងជាអ្នកជំនាញសន្តិសុខ បានលើកឡើងថាចំនួនជនភៀសខ្លួនដោយសារតែការប្រែប្រួលអាកាសធាតុពីសីរ៉ីនឹងនៅតែកើនឡើងទៅកាន់ប្រទេសអឺរ៉ុប ជាពិសេសគឺនៅរយៈពេល២០ឆ្នាំខាងមុខដែលមិនមែនត្រឹមតែ១ឬ២លាននាក់ទេដែលអឺរ៉ុបជួបប្រទះរាល់ថ្ងៃនេះ ប៉ុន្តែអាចទៅដល់១០ឬ២០លាននាក់ ក្នុងរយៈពេល២០ឆ្នាំទៅមុខទៀតដែលនឹងមកពីអាហ្វ្រិកខាងត្បូង ។
វិទ្យាស្ថានសិក្សាស្រាវជ្រាវស្តីពីការប្រែប្រួលអាកាសធាតុ បានបង្ហាញពីឥទ្ធិពលនៃការប្រែប្រួលអាកាសធាតុនឹងនាំឲ្យកំណើននៃការស្វែងរកសិទ្ធិជ្រកកោណនៅសហភាពអឺរ៉ុបមានកាន់តែខ្លាំង ប្រសិនបើនិន្នាការនេះនៅតែបន្ត ។ ចំនួននៃជនអន្តោប្រវេសន៍ដែលមានបំណងស្វែងរកសិទ្ធិជ្រកកោណនៅអឺរ៉ុប បានកើនឡើងចំនួនបីដងជារៀងរាល់ឆ្នាំដោយសារតែបញ្ហាចម្បងធំៗមួយចំនួនដូចជាការប្រែប្រួលអាកាសធាតុ អស្ថិរភាពនយោបាយ និងកត្តាសេដ្ឋកិច្ច ។
ជាមួយនឹងផលប៉ះពាល់ធ្ងន់ធ្ងរបែបនេះ សាស្ត្រាចារ្យមកពីសកលវិទ្យាល័យកូឡំប៊ី សហរដ្ឋអាមេរិកបានលើកឡើងថា បើទោះបីជាការដោះស្រាយការប្រែប្រួលអាកាសធាតុទទួលបានជោគជ័យយ៉ាងណាក៏ដោយ ចំនួននៃអ្នកសុំសិទ្ធិជ្រកកោណអាចកើន១ភាគ៤ផងដែរ ហើយ បានសង្កត់ធ្ងន់ថា អឺរ៉ុបនឹងជួបប្រទះនូវកំណើនប្រជាជនចំណាកស្រុកមកពីតំបន់ផ្សេងៗនៅលើពិភពលោក ក៏ព្រោះតែបញ្ហានៃការប្រែប្រួលអាកាសធាតុ ។ ចំនួនមនុស្សអាចមានដល់រាប់លាននាក់ ឬដល់ពាន់លាននាក់ដែលនឹងមកដល់ឆ្នេរសមុទ្រនៃអឺរ៉ុប ដោយសារតែការផ្លាស់ប្តូរខ្លាំងនៃអាកាសធាតុ ។
ការសិក្សាដដែល បានអំពាវនាឲ្យរដ្ឋាភិបាលទាំងអស់យល់ព្រមនៅយុត្ថាធិការថ្មីមួយដើម្បីការពារកុំឲ្យមានជនភៀសខ្លួន ដោយសារតែការប្រែប្រួលអាកាសធាតុ។ ការអំពាវនាវនេះ គឺខណៈដែលកិច្ចប្រជុំស្តីពីការប្រែប្រួលអាកាសធាតុ គ្រោងនឹងធ្វើឡើងនៅសប្តាហ៍ក្រោយក្នុងប្រទេសអាល្លឺម៉ង់ដែលជំរុញឲ្យមេដឹកនាំទាំងអស់ធ្វើការកាន់តែខ្លាំង ដើម្បីដាក់ចេញនូវការអនុវត្តជាទិសដៅក្នុងកិច្ចព្រមព្រៀងអាកាសធាតុក្រុងប៉ារីស ៕
ចែករំលែកព័តមាននេះ