រាជធានីភ្នំពេញ ៖ ក្នុងឆ្នាំ២០១៧កន្លងទៅនេះ ការនាំចេញអង្ករទៅបរទេសរបស់កម្ពុជា សម្រេចបានជាង៦៣,៥ម៉ឺនតោន កើនឡើងជិត១០ម៉ឺនតោន ស្មើនឹងប្រមាណ១៧% បើធៀបនឹងឆ្នាំ២០១៦ ។ នេះបើយោងតាមរបាយការណ៍របស់លេខាធិការដ្ឋានច្រកចេញ ចូលតែមួយសម្រាប់បំពេញបែបបទនាំចេញអង្ករ ។
លទ្ធផលនៃការនាំចេញក្នុងឆ្នាំ២០១៧នេះ បានបង្ហាញពីកំណើនមួយខ្ពស់ និងត្រូវបានសាទរពីអ្នកពាក់ព័ន្ធផងដែរ ។ ទោះបីយ៉ាងណា ក្នុងឆ្នាំកន្លងទៅនេះ បណ្ដាក្រុមហ៊ុននាំចេញអង្ករបានជួបឧបសគ្គជាច្រើនផងដែរដែលរាំងស្ទះដល់ដំណើរការក្នុងវិស័យនេះ ជាពិសេសគឺបញ្ហាអគ្គិសនី, ការដឹកជញ្ជូន និងបញ្ហាមួយចំនួនទៀតដែលនៅតែរបាំងរាំងខ្ទប់សម្រាប់ក្រុមហ៊ុននាំចេញ និងស្នើឱ្យក្រសួងពាក់ព័ន្ធ រួមនឹងប្រមុខរដ្ឋាភិបាល ជួយដោះស្រាយ ។
នាយកក្រុមហ៊ុន អេមរុ រាយស៍ លោក ឧកញ៉ា សុង សារ៉ន បានមានប្រសាសន៍ បញ្ហាតម្លៃអគ្គិសនី និងការដឹកជញ្ជូននៅតែជាបញ្ហាចោទសម្រាប់ខ្សែសង្វាក់ផលិតកម្មស្រូវអង្ករ ។
លោកឧកញ៉ាថ្លែងថា ៖« យើងចង់ឱ្យមានការយកចិត្តទុកដាក់ខ្លាំងទៅលើបញ្ហាភ្លើង និងការដឹកជញ្ជូន ធ្វើម៉េចឱ្យការសាងសង់ប្រព័ន្ធផ្លូវដែកពីខេត្តបាត់ដំបងទៅខេត្តព្រះសីហនុឱ្យបានចប់នៅឆ្នាំ២០១៨ នោះយើងសង្ឃឹមថា តម្លៃការដឹកជញ្ជូន នឹងល្អប្រសើរបន្តិច។ តែនៅពេលសព្វថ្ងៃនេះ វាមិនទាន់ឃើញមានលក្ខណៈប្រសើរនៅឡើយទេ »។
លោកបានលើកឡើងថា ក្នុងឆ្នាំ២០១៨នេះ សង្ឃឹមថា តម្លៃអគ្គិសនីអាចចុះថ្លៃជាងមុនបន្តិច នោះជារឿងល្អ សម្រាប់ធ្វើការកែច្នៃ ។ ចំណែកបញ្ហាពន្ធ ក្រសួងពាក់ព័ន្ធគួរពិនិត្យមើល និងជួយសម្រួលរបាំងពន្ធផ្សេងឱ្យអស់ ដើម្បីជំរុញឱ្យមានការវិនិយោគក្នុងវិស័យកសិកម្ម និងវិស័យផ្សេងទៀតឱ្យមានសកម្មភាពផុសផុល ព្រោះកម្ពុជាជាប្រទេសកសិកម្ម ត្រូវការអ្នកវិនិយោគទាំងក្នុងនិងក្រៅស្រុក ដំឡើងរោងចក្រកែច្នៃឱ្យបានច្រើន ដើម្បីចូលរួមប្រកួតប្រជែងទិញស្រូវពីកសិករបានគ្រប់ៗគ្នា ។
លោកឧកញ៉ា សុងសារ៉ន ក៏បានស្នើក្រសួងពាក់ព័ន្ធរកវិធីយ៉ាងណាបញ្ចុះថ្លៃជី និងពង្រីកផ្លូវទឹកឱ្យបានច្រើនផងដែរ សម្រាប់កាត់ បន្ថយថ្លៃដើមជូនកសិករ ឬបង្កើនការវិនិយោគនៅក្នុងស្រុក។ ជាមួយគ្នានេះ ត្រូវផ្តល់ហិរញ្ញប្បទានទាំងផ្នែករដ្ឋ និងឯកជនទៅដល់កសិករ ដើម្បីមានលទ្ធភាពទិញគ្រឿងយន្ត ឬមានបំពាក់គ្រឿងយន្តផ្សេងៗឱ្យទាន់សម័យកាល ។
លោកថា ៖« សព្វថ្ងៃនេះ យើងដាំស្រូវកម្រិតពាណិជ្ជកម្ម យើងមិនមែនដាំស្រូវដូចសម័យ១០ឆ្នាំមុននោះទេ » ។
ចំណែកលោកឧកញ៉ា វង្ស ប៊ុនហេង នាយកក្រុមហ៊ុនវង្សប៊ុនហេងរ៉ាយស៍ មានប្រសាសន៍ដែរថា៖« ចំណុចដែលជាឧបសគ្គសម្រាប់ការនាំចេញរាល់ថ្ងៃនេះ គឺយើងខ្វះប្រភេទស្រូវសម្រាប់កែច្នៃនាំចេញស្តុកទុក, ខ្វះកុងតឺន័រ និងរថយន្តសម្រាប់ដឹកជញ្ជូន ។ រាល់ថ្ងៃនេះ បើយើងចង់នាំចេញបរិមាណអង្ករ១លានតោន ខ្ញុំគិតថាស្រុកខ្មែរប្រហែលខ្វះកុងតឺន័រ និងរថយន្តសម្រាប់ដឹកជញ្ជូន »។
លោកឧកញ៉ាថា ៖« បើចង់សម្រួលឱ្យការនាំចេញបានប្រសើរ ទាល់តែការដឹកជញ្ជូនត្រូវមានភាពងាយស្រួល និងមានកុងតឺន័រគ្រប់គ្រាន់,បញ្ចុះតម្លៃអគ្គិសនី ។ ចំណែកនៅកំពង់ផែ ត្រូវមានកប៉ាល់ខ្នាតធំ ព្រោះសព្វថ្ងៃ ការនាំចេញអាចដឹកបានតែកប៉ាល់តូចៗទេ បើប្រទេសណាគេចង់កុម្មង់ច្រើន ធ្វើអត់ចេញ។ ខ្ញុំជឿថាប្រសិនរាជរដ្ឋាភិបាលដោះស្រាយបញ្ហាប៉ុន្មានចំណុច នេះចេញ នោះការការនាំចេញអង្កររបស់យើង នឹងកើនឡើងច្រើនបន្តទៀត »។
យោងតាមសេចក្តីប្រកាសរបស់សហព័ន្ធស្រូវអង្ករកម្ពុជា គ្រោងនឹងរៀបចំវេទិកាស្រូវអង្ករលើកទី៦ នៅថ្ងៃទី២២ និង ២៣ ខែមករា ឆ្នាំ២០១៨ ហើយវេទិកានេះ នឹងក្លាយជាវេទិកាពិភាក្សាអំពីបញ្ហា និងរកដំណោះស្រាយស្រូវអង្ករជាប្រវត្តិសាស្ត្រ ៕
ចែករំលែកព័តមាននេះ