រាជធានីភ្នំពេញ ៖ មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ក្រសួងនឹងបញ្ជូនមន្ត្រីជំនាញផ្នែកសុរិយោដីចុះទៅសិក្សានៅតាមបណ្តាកោះទាំងអស់ដែលមានចំនួនសរុប៧៥កោះ ហើយគ្រោងនឹងចាប់ផ្ដើមនៅខែឧសភា ខាងមុខនេះ ។…
រាជធានីភ្នំពេញ ៖ មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ក្រសួងនឹងបញ្ជូនមន្ត្រីជំនាញផ្នែកសុរិយោដីចុះទៅសិក្សានៅតាមបណ្តាកោះទាំងអស់ដែលមានចំនួនសរុប៧៥កោះ ហើយគ្រោងនឹងចាប់ផ្ដើមនៅខែឧសភា ខាងមុខនេះ ។ ការចុះសិក្សានេះ ដើម្បីពិនិត្យវាយតម្លៃពីសក្ដានុពលនៃកោះនីមួយៗសម្រាប់ទាក់ទាញការវិនិយោគ ។
លោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ បានគូសបញ្ជាក់ក្នុងពិធីបូកសរុបលទ្ធផលការងារឆ្នាំ២០១៧ និងលើកទិសដៅឆ្នាំ២០១៨ របស់ក្រសួងដែលបានប្រព្រឹត្តិទៅកាលពីពេលថ្មីៗនេះថា ការបញ្ជូនមន្ត្រីជំនាញរបស់ក្រសួងទៅសិក្សាលើកោះទាំង៧៥នេះ អាចចាប់ផ្ដើមនៅខែឧសភា ឆ្នាំ២០១៨ ដោយសិក្សាឲ្យបានច្បាស់ពីសក្ដានុពលនៃកោះនីមួយៗ ។
លោកថា ៖« យើងមិនត្រូវមានមោទនភាព ព្រោះតែបានស្គាល់កោះនៅប្រទេសដទៃនោះទេ អ្វីដែលសំខាន់គឺត្រូវស្គាល់ឲ្យច្បាស់ពីកោះនៅកម្ពុជា ទើបជាការប្រសើរ ជាការការពារបូរណភាពទឹកដី »។
លោកបន្តថា ៖« ការបញ្ជូនមន្ត្រីឲ្យទៅសិក្សារាល់បណ្ដាកោះទាំង៧៥នៅកម្ពុជានេះ គឺដើម្បីសិក្សាពីសក្ដានុពលសម្រាប់ការវិនិយោគ និងជៀសផុតពីការសាងសង់រំលោភលើផ្ទៃកោះ ដោយអនុញាត្តឲ្យមានការសាងសង់រួច ទើបហាមឃាត់ និងរុះរើតាមក្រោយ »។
បណ្តាកោះនានានៅតាមសមុទ្រក្នុងខេត្តទាំង៤ជាប់តំបន់ឆ្នេរ ប៉ុន្ដែមានកោះតិចតួចប៉ុណ្ណោះដែលបាននិងកំពុងអភិវឌ្ឍន៍ ដូចជា កោះដែកគោល កោះសង្សារ កោះឫស្សី កោះក្របី កោះស្តេច កោះរ៉ុង កោះរ៉ុងសន្លឹម កោះឋានសួគ៌ជាដើម ខណៈរាជរដ្ឋាភិបាលបានផ្តល់សិទ្ធិសម្បទានដល់អ្នកវិនិយោគក្នុងស្រុក និងអន្តរជាតិនានាដើម្បីអភិវឌ្ឍន៍កោះទាំងនោះរួចហើយ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងថា បណ្តាកោះនានានៅតាមសមុទ្រកម្ពុជា ពិតជាមានសក្ដានុពលខ្លាំងណាស់ ក្នុងការទាក់ទាញភ្ញៀវទេសចរជាតិ និងអន្តរជាតិ ដែលទាមទារឲ្យមានការអភិវឌ្ឍ ដើម្បីរាជរដ្ឋាភិបាលទទួលបានចំណូលដល់សេដ្ឋកិច្ចជាតិ បង្កើនការងារ និងផ្ដល់ប្រាក់ចំណូលដល់ប្រជាពលរដ្ឋទាំងផ្ទាល់ និងប្រយោល ក៏ដូចជាចូលរួមចំណែកទាក់ទាញភ្ញៀវទេសចរអន្តរជាតិ មកទស្សនាកម្ពុជាឲ្យបានកាន់តែច្រើនថែមទៀត ។
លោកបន្តថា ៖« ជាមួយនឹងសក្តានុពល និងការវិនិយោគដែលបាននិងកំពុងធ្វើមួយចំនួន គឺអ្នកអភិវឌ្ឍន៍ និងអាជ្ញាធរ គួរគិតគូរពីនិរន្តរភាពបរិស្ថាន ពិសេសកុំឲ្យមានការសាងសង់ស្ថានីយប្រេងឥន្ធនៈនៅលើកោះ ព្រោះវាបំពុលបរិស្ថានខ្លាំងណាស់ » ។
លោកបន្តថា ៖« ការអភិវឌ្ឍជាអ្វីដែលយើងស្វាគមន៍ តែការអភិរ័ក្ស ដើម្បីនិរន្តរភាពបរិស្ថានគឺមានសារសំខាន់ណាស់ ដើម្បីយើងទទួលបានផលសម្រាប់ទាំងអស់គ្នា និងជាការអភិវឌ្ឍប្រកបដោយចីរភាព »។
ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានថ្លែងថា កោះនៅកម្ពុជាដែលរាជរដ្ឋាភិបាលបានផ្តល់សម្បទានដល់ក្រុមហ៊ុនឯកជនមានតែប្រមាណ២០%ប៉ុណ្ណោះ ដែលបានធ្វើការអភិវឌ្ឍ ហើយការអភិវឌ្ឍទាំងនោះភាគច្រើនធ្វើឡើងក្នុងរូបភាព «កូនកើតមុនឪ» ព្រោះអ្នកអភិវឌ្ឍន៍មិនបានគិតគូរពីបរិស្ថាន ដោយបង្ហូរទឹកស្អុយឬទឹកកខ្វក់ចូលក្នុងសមុទ្រ ។
លោកបន្តថា អ្នកអភិវឌ្ឍន៍គួរតែត្រូវតម្រូវឲ្យមានផែនការមេ(Master Plan)ត្រឹមត្រូវ ទាក់ទងនឹងបញ្ហាបរិស្ថាន និងការចម្រោះទឹកកខ្វក់ឲ្យបានត្រឹមត្រូវ និងគួរយកគម្រោងអភិវឌ្ឍន៍កោះសង្សារជាគំរូ ។
លោកបន្តថា ៖« ការគិតគូរពីបរិស្ថានជារឿងចាំបាច់បំផុត ដើម្បីធានាបរិស្ថានស្អាតនៅតាមបណ្តាកោះ ជាជាងអភិវឌ្ឍន៍ហើយបំផ្លាញដល់បរិស្ថាន » ៕
ចែករំលែកព័តមាននេះ