យោងតាមការសិក្សាថ្មីមួយបានបង្ហាញថា បរិមាណទឹកកកនៅសមុទ្រអាក់ទិកមានកម្រិតទាប ប៉ុន្តែបរិមាណទឹកកកនៅសមុទ្រអង់តាក់ទិកកំពុងកើនឡើងច្រើន ។ ការសិក្សាថ្មីនេះគឺផ្អែកទៅលើរង្វាស់ចលនាទឹកកកប្រចាំថ្ងៃដែលមានរយៈពេល១៩ឆ្នាំហើយនិងត្រូវបានកត់ត្រាទុកដោយផ្កាយរណបទាំងបួនរបស់កម្មវិធីផ្កាយរណបឧតុនិយមរបស់អាេមរិក ដោយគេបានលើកយកតែគំរូសំខាន់ៗនៃភូមិសាស្ត្រអាកាសធាតុ និងបរិយាកាសដែលកំពុងជះឥទ្ធិពលមកលើតំបន់ប៉ូលនៃភពផែនដី ។
តាមការវិភាគរបស់គេដែលត្រូវបានចងក្រងជាឯកសារលើកដំបូងគឺថា ការផ្លាស់ប្តូររយៈពេលដ៏យូរនៅក្នុងការរសាត់នៃទឹកកកសមុទ្រប្រចាំឆ្នាំនៅជុំវិញសមុទ្រអង់តាក់ទិក គឺជះឥទ្ធិពលខ្លាំងដោយសារកម្លាំងខ្យល់បក់ ។ តំបន់មហាសមុទ្រដែលគ្របដណ្តប់ដោយទឹកកកមានការកើនឡើងគួរឱ្យកត់សម្គាល់ ហើយនៅទីនោះខ្យល់បានបោកបក់យ៉ាងខ្លាំងរហូតដល់បង្កើតបានជាដុំទឹកកកទាំងផ្ទាំង ។
លោក Ron Kwok អ្នកវិទ្យាសាស្ត្រម្នាក់ប្រចាំមន្ទីរពិសោធន៍ Jet Propulsion របស់អង្គការណាសានៅរដ្ឋកាលីហ្វ័រនីញ៉ាដែលបានដឹកនាំការសិក្សានិយាយថា ឥឡូវនេះយើងមានភស្តុតាងដែលថា ខ្យល់កំពុងបោកបក់ធ្វើឱ្យមានទឹកកកគ្រប់ដណ្តប់យ៉ាងច្រើនដូច្នេះ ។នៅដើមឆ្នាំនេះ អ្នកវិទ្យាសាស្ត្ររាយការណ៍ថា បរិមាណទឹកកកនៅមហាសមុទ្រអាក់ទិកមានកម្រិតទាបបំផុតចាប់តាំងពីឆ្នាំ១៩៧៩ មក បើតាមការពិនិត្យមើលតាមផ្កាយរណបនៅទីនោះ ។
ដោយឡែក សមុទ្រអង់តាក់ទិកដែលជាទ្វីបត្រជាក់បំផុត និងមានខ្យល់ខ្លាំងបំផុតនៅលើពិភពលោកត្រូវបានគ្របដណ្តប់ដោយផ្ទាំងទឹកកកដែលមានកម្រាស់២ម៉ៃល៍និងព័ទ្ធដោយមហាសមុទ្រភាគខាងត្បូង ។ កំណើនទឹកកកប្រចាំឆ្នាំនៅសមុទ្រអង់តាក់ទិក គឺជាព្រឹត្តិការណ៍កើតមានឡើងតាមរដូវកាលធំបំផុតនៅលើភពផែនដី ៕
ចែករំលែកព័តមាននេះ