«Daily Star» ផ្សាយថា ក្រុមអ្នកអនាម័យនៅសណ្ឋាគារទំនើបចំនួន៣ ក្នុងប្រទេសចិន បានប្រើច្រាសដុសបង្គន់សម្អាតកែវទឹក និងពែងកាហ្វេ ។ ជូតផ្ទៃការ៉ូនៅបន្ទប់ទឹកដោយកន្សែងជូតខ្លួន ។ វាគឺជារឿងអាស្រូវមួយប៉ះពាល់ដល់កេរ្តិ៍ឈ្មោះរបស់សណ្ឋាគារក្នុងអំឡុងពេលសម្រាកលំហែកាយ ។
បុគ្គលិកអនាម័យរបស់សណ្ឋាគារបានប្រើច្រាសតែមួយដុសទាំងបន្ទប់ទឹក លាងសម្អាតកែវកាហ្វេ និងអាងងូតទឹក សម្អាតផ្ទៃការ៉ូក្នុងបន្ទប់ទឹកដោយកន្សែងជូតខ្លួន រួមទាំងជ្រលក់កន្សែងនោះនៅក្នុងបង្គន់ទៀត ។
អំពើមានលក្ខណៈស្មោកគ្រោកនេះ កើតឡើងនៅសណ្ឋាគារទំនើប៣ ក្នុងក្រុងហាប៊ីន ខេត្តហេលុងជាំង ភាគខាងកើតឆៀងខាងជើង ប្រទេសចិន ។
នៅក្នុងវីដេអូឃ្លីបរយៈពេល៧នាទីបានបង្ហាញសកម្មភាពរបស់អ្នកអនាម័យម្នាក់ក្នុងសណ្ឋាគារផ្កាយ៥ ប្រើច្រាសដុសបង្គន់លាងពែងកាហ្វេនៅក្នុងបន្ទប់របស់ភ្ញៀវ ។ ស្របពេលជាមួយគ្នានេះឮសំឡេងបុរសជាបុគ្គលិកម្នាក់បញ្ជាក់ប្រាប់ថា កុំយកចិត្តទុកដាក់លើការលាងពែងកាហ្វេពេក ។ ក្រោយមកអ្នកអនាម័យប្រើច្រាសដុសខាត់នៅក្នុងចានបង្គន់ និងប្រើកន្សែងពោះគោជូតពែងកាហ្វេឱ្យស្ងួតទៀតផង ។
រឿងហេតុនោះបានឈានដល់ការស៊ើបអង្កេតពីអាជ្ញាធរធ្វើឱ្យសណ្ឋាគារទំនើបទាំង៣ព្រួយបារម្ភ ខណៈពេលពលរដ្ឋចិនបានព្រមានថា អត្តចរិតដ៏ស្មោកគ្រោកនេះ ប៉ះពាល់ដល់អ្នកគ្រប់គ្រងសណ្ឋាគារយ៉ាងខ្លាំង ហើយសណ្ឋាគារទាំង៣នោះ កំពុងសហការជាមួយអាជ្ញាធរមូលដ្ឋានស៊ើបអង្កេតរឿងអាស្រូវ ៕
ចែករំលែកព័តមាននេះ