ខេត្តស្វាយរៀង ៖ បុគ្គលិកក្រុមហ៊ុនខ្សែកាបមួយ ដើររាយខ្សែកាបទូរស័ព្ទតាមបង្គោលភ្លើង ដោយខ្វះការប្រុងប្រយ័ត្នត្រូវខ្សែភ្លើងឆក់ស្លាប់ជាប់នៅលើបង្គោលភ្លើង យ៉ាងអាណោចអធម័កាលពីវេលាម៉ោង៣និង១០នាទីរសៀលថ្ងៃទី០១ ខែមករា ឆ្នាំ២០១៨នៅត្រង់ចំណុចខាងមុខវិទ្យាល័យ ហ៊ុនសែនកំពង់រោទ៍ ភូមិរោទ៍ ឃុំញរ ស្រុកកំពង់រោទ៌ ។
បុរសត្រូវខ្សែភ្លើងឆក់ឈ្មោះឈន ឆាយ ភេទប្រុស អាយុ២៥ឆ្នាំ មានទីលំនៅស្រុកកំណើតនៅភូមិសំបួរ ស្រុកមេសាងជ ខេត្តព្រៃវែង មុខរបរជាកម្មករខ្សែកាបក្រុមហ៊ុនមួយ ។
នគរបាលស្រុកកំពង់រោទ៌បានឲ្យដឹងថាមានប្រជាពលរដ្ឋបានរាយការណ៍ថា មានបុគ្គលិកក្រុមហ៊ុនខ្សែកាបមួយក្រុមបានដើរតបណ្តាញខ្សែកាបទូរស័ព្ទពីបង្គោលមួយទៅបង្គោលមួយដោយរាយខ្សែកាបទូរស័ព្ទ តាមបង្គោលភ្លើងអគ្គិសនី លុះរាយមកដល់ចំណុចភូមិឃុំកើតហេតុខាងលើ ខណៈកំពុងឡើងឈអូសខ្សែកាបលើកដៃឡើងខ្ពស់ប៉ះខ្សែកាបភ្លើងអគ្គិសនី ខ្សែស្រាតបណ្តាលឲ្យខ្សែភ្លើងស្រូបឆក់ជាប់នៅលើបង្គោលភ្លើងស្លាប់ភ្លាមៗ ធ្វើឲ្យមានការភ្ញាក់ផ្អើលដល់អ្នកស្រុក និងអ្នកធ្វើដំណើរតាមដងផ្លូវនាំគ្នាមកចោមរោមមើល ហើយបានរាយកាណ៍ឲ្យសមត្ថកិច្ចមកជួយអន្តរាគមន៍ ឡើងយកសពជនរងគ្រោះចុះមកដីវិញ ។ ប្រភពបានបន្តទៀតថា ក្រុមការងារតបណ្តាញខ្សែកាបទូរស័ព្ទនេះខ្វះបច្ចេកទេស ហើយប្រើមនុស្សឲ្យឡើងរាយខ្សែកាបតាមបង្គោលភ្លើងអគ្គិសនីដោយមិនបានបិតចរន្តភ្លើង ទើបបណ្តាលឲ្យឆក់ស្លាប់បែបនេះ ។
ប្រជាពលរដ្ឋរស់នៅជិតកន្លែងគ្រោះថ្នាក់នោះបានឲ្យដឹងថា បង្គោលភ្លើងអគ្គិសនីដែលបានឆក់មនុស្សនេះកាលប៉ុន្មានថ្ងៃមុនមានទុស្សេបែកផ្កាភ្លើងបង្កឲ្យអ្នកនៅជិតទីនោះនាំគ្នាភ័យខ្លាច ហើយបានរាយការណ៍ទៅខាងមន្ត្រីអគ្គិសនីឲ្យមកពិនិត្យដែរ ។ នៅថ្ងៃកើតហេតុក៏មានក្រុមហ៊ុនទូរស័ព្ទយកខ្សែកាបមករាយតាបង្គោលភ្លើងអគ្គិសនីពីបង្គោលមួយទៅបង្គោលមួយមកដល់ត្រង់ចំណុចបង្គោលខាងលើក៏ឆក់ស្លាប់តែម្ដង ។
ក្រោយពីសមត្ថកិច្ចពិនិត្យកោសល្យវិច្ច័យលើសពរួច សន្និដ្ឋានថា ពិតជាខ្សែភ្លើងឆក់ស្លាប់ពិតប្រាកដមែន សមត្ថកិច្ចបានប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត ៕
ចែករំលែកព័តមាននេះ