រាជធានីភ្នំពេញ ៖ អតីតតារាចម្រៀងកញ្ញាពៅ បញ្ញាពេជ្រ បានថ្លែងអស់សង្ឃឹមជាថ្មី បន្ទាប់ពីអាការជំងឺរបស់នាងមិនអាចវិលទៅរកសភាពដើម ហើយត្រូវការពេលវេលា និងប្រាក់ច្រើនសម្រាប់បន្តការព្យាបាល ។
អស់ជាច្រើនឆ្នាំមកហើយពៅ បញ្ញាពេជ្រ បានបន្តជីវិតរបស់ខ្លួនទាំងពិការអង្គុយតែនៅលើរទះរុញ ជាមួយនឹងការព្យាបាលតាមវិធីសាស្ត្រមួយចំនួន ក្នុងក្តីរំពឹងថាខ្លួននឹងអាចមានភ័ព្វវាសនាបានដើរធម្មតាឡើងវិញ ។ ប៉ុន្តែរហូតមកដល់ពេលនេះពៅ បញ្ញាពេជ្រ នៅតែមិនទាន់អាចសម្រេចក្តីស្រមៃរបស់ខ្លួនពីការវិលមកសភាពដើមនោះវិញឡើយ ទើបនាងបានសម្តែងការអស់សង្ឃឹម ខណៈពេលដែលជំងឺរបស់នាងក៏ត្រូវការប្រាក់ច្រើនបន្ថែមទៀតដើម្បីព្យាបាល ។
ថ្មីៗកន្លងមក ទំព័រហ្វេសប៊ុកម្ចាស់បទ «ស្នេហ៍គ្មានលក្ខខណ្ឌ» កញ្ញាពៅ បញ្ញាពេជ្រ បានបង្ហោះសារថ្លែងពីអាការជំងឺរបស់នាងថា «បានប៉ុនណាយកប៉ុណ្ណឹង ! ខ្ញុំមិនមែនមិនចង់ដើរបានវិញទេ ខ្ញុំក៏មិនចង់ពិការបែបនេះដែរ តែអាការខ្ញុំគឺមិនសង្ឃឹម ។
បើមានផ្លូវ ទាល់តែយើងត្រូវមានលុយច្រើនសម្រាប់ចំណាយ សួរថាខ្ញុំទៅធ្វើអីបាន អ៊ីចឹងបានជាខ្ញុំសរសេរថាបានប៉ុណ្ណេះគឺគ្រប់គ្រាន់ហើយ ។ ខ្ញុំក៏ត្រៀមខ្លួនវេទនាដែរនៅពេលដែលគ្មានអ្នកមើលថែ ព្រោះវាសនាខ្ញុំយកមកបានតែប៉ុណ្ណឹង ។ ខ្ញុំធ្លាប់ឲ្យគេព្យាបាលដោយចលនា គេធ្វើឲ្យខ្ញុំបាក់ឆ្អឹងជើងមួយចំហៀង ដោយសារខ្ញុំមិនដឹងឈឺ តែពេលនេះជើងខ្ញុំមិនរឹងមាំទេ ខ្ញុំមិនហ៊ានឈរខ្លាចធ្ងន់លើសដើម »។
បន្ទាប់ពីបង្ហាញសារដ៏ក្រៀមក្រំមួយនេះមកមានប្រិយមិត្តគាំទ្រជាច្រើនបានចូលរួមលើកទឹកចិត្តដល់ពៅ បញ្ញាពេជ្រ កុំឲ្យអស់សង្ឃឹម និងត្រូវតស៊ូបន្ថែមទៀត ដ្បិតស្ថានភាពរបស់នាងនាពេលនេះគឺមានសំណាងជាងតារាមួយចំនួនដែលជួបរឿងនេះដូចគ្នា។
ចាប់តាំងពីការវិលមកពីប្រទេសថៃ ដើម្បីបន្តការព្យាបាលនៅក្នុងស្រុកអស់ជាច្រើនឆ្នាំមកនេះ ពៅ បញ្ញាពេជ្រ បានបង្ហាញខ្លួនជាសាធារណៈជាបន្តបន្ទាប់ ដោយនាងពុំមានការខ្លាចរអាលពីសុវត្ថិភាពដូចពេលមុនឡើយ ដ្បិតនាងវិលមកវិញនាពេលនេះត្រឹមរស់ជាមនុស្សពិការម្នាក់ប៉ុណ្ណោះ ។
ពៅ បញ្ញាពេជ្រ ត្រូវខ្មាន់កាំភ្លើងមិនស្គាល់អត្តសញ្ញាណបាញ់ប្រហារកាលពីថ្ងៃទី២៣ ខែកុម្ភៈ ឆ្នាំ២០០៧ វេលាម៉ោង៦ និង២០នាទីព្រឹកនៅមុខសាលាភាសាបរទេសមួយក្បែររបងក្រសួងឧស្សាហកម្មរ៉ែ និងថាមពល បណ្តាលឲ្យនាងពិការហូតសព្វថ្ងៃ ៕
ចែករំលែកព័តមាននេះ