រាជធានីភ្នំពេញ ៖ កាលពីយប់ថ្ងៃទី៣១ ធ្នូ ២០១៧ ឈានចូលថ្ងៃទី១ មករា ២០១៨ ប្រជាពលរដ្ឋក្នុងរាជធានីបានមកលេងកម្សាន្ដនៅតាមមាត់ទន្លេ និងមុខព្រះបរមរាជវាំងប្រមាណជាង១លាននាក់ ក្នុងពិធីបុណ្យឆ្លងឆ្នាំសកល ដែលធ្វើឲ្យមានការកកស្ទះចរាចរណ៍រាប់ម៉ោង និងមានការមិនសប្បាយចិត្តផងដែរ ។
ទោះបីយ៉ាងណា ដោយសារតែកត្តានេះ រដ្ឋមន្ត្រីក្រសួងទេសចរណ៍បានស្នើឲ្យមានការបង្កើតគណៈកម្មការមួយដើម្បីរៀបចំសណ្តាប់ធ្នាប់សម្រាប់ការកម្សាន្តសប្បាយរបស់ប្រជាពលរដ្ឋក្នុងពិធីបុណ្យនានា ឲ្យមានរបៀបរៀបរយដូចពិធីបុណ្យអុំទូកដែរ ។
លោក ថោង ខុន បានថ្លែងឲ្យដឹងតាមទូរស័ព្ទកាលពីរសៀលថ្ងៃទី១ មករា ឆ្នាំ២០១៨ ថា នៅរាជធានីភ្នំពេញប្រជាជនជាង១លាននាក់បានមកកម្សាន្ដនៅតំបន់មាត់ទន្លេ និងជុំវិញព្រះបរមរាជវាំង ដែលធ្វើឲ្យចំនួនមនុស្សមានភាពកកកុញ និងស្ទះចរាចរណ៍រាប់ម៉ោង ។ ហេតុនេះ យើងគួររៀបចំគណៈកម្មការមួយ ដូចគណៈកម្មការបុណ្យអុំទូក ដើម្បីឲ្យប្រជាពលរដ្ឋធ្វើដំណើរកម្សាន្ដបានសប្បាយរីករាយ និងមានសណ្តាប់ធ្នាប់ ដោយមិនអនុញ្ញាតឲ្យប្រជាពលរដ្ឋជិះរថយន្ត និងម៉ូតូចូលតំបន់កម្សាន្ដឡើយ ។
លោកបន្តថា ៖« ខ្ញុំគិតថាប្រជាជនជាង១លាននាក់ បានដើរកម្សាន្ដនៅរាជធានីភ្នំពេញ ដែលធ្វើឲ្យមានការកកស្ទះចរាចរណ៍ សូម្បីតែខ្ញុំជាប់ក្នុងរថយន្តប្រមាណ៥ម៉ោងដែរ »។ លោកបន្តថា ៖« បុណ្យចូលឆ្នាំសកលមិនមែនជាបុណ្យប្រពៃណីជាតិរបស់យើងទេ តែជាបុណ្យសកល ដែលប្រជាជននៅគ្រប់ប្រទេសរីករាយស្វាគមន៍ការមកដល់នៃឆ្នាំថ្មី »។
លោករដ្ឋមន្ត្រីបន្តថា កន្លងមកយើងរៀបចំគណៈកម្មការសម្រាប់បុណ្យអុំទូក តែបុណ្យឆ្លងឆ្នាំសកលដូចជាយើងភ្លេច ហេតុនេះយើងគួរតែរៀបចំឲ្យមានគណៈកម្មការមួយ និងរៀបចំកន្លែងផ្ញើរថយន្ដ ម៉ូតូ ហើយឲ្យប្រជាពលរដ្ឋធ្វើដំណើរដោយថ្មើរជើងទៅកាន់កន្លែងកម្សាន្ដនៅតាមមាត់ទន្លេ និងជុំវិញរាជវាំង ។
ទាក់ទងនឹងដំណើរកម្សាន្ដរបស់ប្រជាពលរដ្ឋ នៅតាមរមណីយដ្ឋាននានា រដ្ឋមន្ត្រីរូបនេះបានលើកឡើងថា ប្រជាពលរដ្ឋខ្មែរចេញដើរកម្សាន្ដនៅតាមរមណីយដ្ឋាននានាបានកើនឡើងច្រើនណាស់ ដោយសារតម្លៃនៃសុខសន្តិភាព ស្ថិរភាពនយោយបាយ និងកំណើនប្រាក់ចំណូលរបស់ប្រជាពលរដ្ឋ ។
ប្រធានសមាគមទីភ្នាក់ងារទេសចរណ៍កម្ពុជាលោកស្រី ឆាយ ស៊ីវលីន បានគាំទ្រនូវការលើកឡើងរបស់រដ្ឋមន្ត្រីក្រសួងទេសចរណ៍ទាំងស្រុង ដោយបានមានប្រសាសន៍ថា ៖ «យើងគួរមានគណៈកម្មការ ដើម្បីរៀបចំរបៀបរៀបរយ និងសណ្តាប់ធ្នាប់ក្នុងពិធីបុណ្យនេះ ព្រោះបុណ្យផ្សេងៗសុទ្ធតែមានគណៈកម្មការទទួល ខុសត្រូវ ហេតុនេះយើងគួរតែមានការរៀបចំគណៈកម្មការសម្រាប់បុណ្យចូលឆ្នាំសកលផងដែរ »។
លោកស្រីបន្តថា ៖« ភ្ញៀវទេសចរជាតិ អន្តរជាតិចេញកម្សាន្ដរាជធានីភ្នំពេញបានកើនឡើងជារៀងរាល់ឆ្នាំ ហើយពិធីបុណ្យចូលឆ្នាំសកលទោះជាមិនបានរៀបចំបានល្អក្តី តែប្រជាពលរដ្ឋចូលរួមអបអរសាទរដោយខ្លួនឯង »៕
ចែករំលែកព័តមាននេះ