មែកធាងថ្មីជាទីសង្ឃឹមរបស់លោក អេង ភិរុណ គឺកូនប្រុសកំពុងលូតលាស់
- ភ្នំពេញ
រាជធានីភ្នំពេញ ៖ ស្ថិតក្នុងវ័យ២៤ឆ្នាំ យុវជន ភិរុណ សំបូររិទ្ធ ដែលមានឈ្មោះមួយទៀតគឺ បូរ តាំងហ៊ាង មានទឹកមុខញញឹមពោរពេញដោយមន្តស្នេហ៍…
រាជធានីភ្នំពេញ ៖ ស្ថិតក្នុងវ័យ២៤ឆ្នាំ យុវជន ភិរុណ សំបូររិទ្ធ ដែលមានឈ្មោះមួយទៀតគឺ បូរ តាំងហ៊ាង មានទឹកមុខញញឹមពោរពេញដោយមន្តស្នេហ៍…
រាជធានីភ្នំពេញ ៖ ស្ថិតក្នុងវ័យ២៤ឆ្នាំ យុវជន ភិរុណ សំបូររិទ្ធ ដែលមានឈ្មោះមួយទៀតគឺ បូរ តាំងហ៊ាង មានទឹកមុខញញឹមពោរពេញដោយមន្តស្នេហ៍ គួបផ្សំនឹងទឹកដមសំឡេងដ៏ក្រអួនក្រអៅផងនោះ ធ្វើឲ្យមានការចាប់អារម្មណ៍ពីមហាជនជាច្រើនដែលគាំទ្រវិស័យសិល្បៈចម្រៀងនៅយុគសម័យនេះ ។
យុវជនភិរុណ សំបូររិទ្ធ មានកម្ពស់១,៧៨ ម៉ែត្រសម្បុរសដែលកើតក្នុងត្រកូលជាកូនកាត់ចិន កាលពីពេល ថ្មីៗកន្លងមកបានរំលឹករឿងរ៉ាវពីអតីតកាលថា កាលរៀននៅសាលាបឋមគេតែងតែដើរតាមលោកប៉ាពេលចូលរួមច្រៀងក្នុងកម្មវិធីទូរទស្សន៍ ពេលនោះគេមានអារម្មណ៍ថាចូលចិត្តស្តាប់បទចម្រៀង លុះដល់វ័យចូលរៀនវិទ្យាល័យ គេក៏លួចហាត់ច្រៀងតែម្នាក់ឯង តែមិនដែលឲ្យអ្នកណាឮសំឡេងច្រៀងរបស់គេឡើយសូម្បីតែអ្នកក្នុងផ្ទះ តែក្នុងចិត្តរបស់គេមានក្តីស្រមៃមួយចង់ក្លាយជាតារាចម្រៀងមួយរូបទៅថ្ងៃអនាគត ។
លុះចូលដល់ឆ្នាំចូលរៀនមហាវិទ្យាល័យ លោកភិរុណ សំបូររិទ្ធ ក៏ចាប់ផ្ដើមចូលប្រឡូកក្នុងវិស័យសិល្បៈចម្រៀងទាំងភ័យព្រួយ ។ ជាដំបូងគេត្រូវឆ្លងកាត់ព្យុះ ភ្លៀង ជួនកាលត្រូវដួលជាច្រើនលើកច្រើនសា ហើយខំប្រឹងក្រោកឈរទាំងសម្រក់ទឹកភ្នែក ដោយសារជួបភាពបរាជ័យ។ តែគេមិនចុះចាញ់ទេ គេព្យាយាមក្រោកឈរម្តងទៀតដោយក្លាហានប្រាប់លោកប៉ារបស់គេដែលជាអ្នកសិល្បៈមួយរូបមានឈ្មោះបោះសំឡេងខាងបញ្ចូលសំឡេងល្ខោននិយាយដែរនោះ ក៏ទទួលបានបទពិសោធម៍មួយចំនួន គួបផ្សំការតស៊ូ និងការព្យាយាមអត់ធ្មត់របស់គេផង ធ្វើឲ្យវិស័យសិល្បៈរបស់គេទទួលបានជោគជ័យ បណ្តើរៗចាប់ពីឆ្នាំ២០១៥មក ។
លោកភិរុណ សំបូររិទ្ធ មានសំឡេងអំណោយផលពីធម្មជាតិដោយអាចច្រៀងបទយុវវ័យក៏បាន បទចម្រៀងសម័យដើមក៏បាន។ លោកភិរុណ សំបូររិទ្ធ និយាយថាលោកធ្លាប់ចូលរួមប្រឡងចម្រៀងទទួលជ័យលាភីលេខ១ ក្នុងកម្មវិធី សំនៀងឯកវិទ្យុ DP ក្នុងឆ្នាំ២០១៥ ។
ឆ្នាំ២០១៥ នោះដែរ លោកបានចូលច្រៀងនៅ PUB ជាប់ជ័យលាភីលេខ២ នៅក្នុងកម្មវិធី«គ្រាប់ពូជតារា»របស់វិទ្យុវាយោ ។ ជ័យលាភីលេខ៣ កម្មវិធីវើល ដាន់ នៅផ្សារទំនើបអ៊ីអនម៉ល ។
ដោយឡែកបច្ចុប្បន្នលោកភិរុណ សំបូររិទ្ធ ហៅក្រៅបូរ តាំងហ៊ាង បាន និងកំពុងប្រឡងក្នុងកម្មវិធី«យុវវសិល្បករពេជ្រកំពុងច្នៃ» របស់ ស្ថានីយទូរទស្សន៍អាស៊ីអាគ្នេយ៍ ក្នុងនោះលោកតាំង ហ៊ាង បានត្រូវមហាជនអ្នកទស្សនា និង អ្នកនៅក្នុងកម្មវិធីយុវសិល្បករពេជ្រកំពុងច្នៃ និយាយថា លោកបូរ តាំងហ៊ាង បានកក់កៅអីទុករង់ចាំបេក្ខជនដទៃទៀតនៅវគ្គផ្តាច់ព្រ័ត្រ ។
កន្លងមកនេះក៏មានផលិតកម្មភាពយន្តក្នុងស្រុកមួយបានមកទាក់ទងលោកចូលរួមថតរឿងភាគសម្រាប់ដាក់បញ្ចាំងតាមទូរទស្សន៍ផងដែរ ។
ជោគជ័យធំមួយទៀតនោះ គឺលោកភិរុណ សំបូររិទ្ធ បានបញ្ចប់ថ្នាក់បរិញ្ញាបត្ររដ្ឋបាលធុរកិច្ចនៃសាកលវិទ្យាល័យបៀលប្រាយ ។ នៅក្នុងឆ្នាំ២០១៨នេះ លោកភិរុណ សំបូររិទ្ធ ហៅក្រៅបូរតាំងហ៊ាង មានបទចម្រៀងថ្មីចំនួន៧បទ ដែលជាស្នារដៃនិពន្ធផ្ទាល់របស់លោកប៉ាគឺលោក អេង ភិរុណ ។ បទច្រៀងដែលច្រៀងដោយលោកភិរុណ សំបូររិទ្ធ ទាំងនោះជូនជាចំណងដៃឆ្នាំថ្មីដល់idolទាំងអស់ដែលបានគាំទ្រលោក ។
ភិរុណ សំបូររិទ្ធ គឺជាកូនប្រុសរបស់លោកអេង ភិរុណ ជាអ្នកនិពន្ធ អ្នកអត្ថាធិប្បាយ និងជាតួឯកល្ខោននិយាយប្រចាំវិទ្យុជាតិ និងវិទ្យុឯកជនមួយចំនួនទៀត ។ សំបូររិទ្ធ គឺជាមែកធាងថ្មីជាទីសង្ឃឹមរបស់លោកអេង ភិរុណ ជាក់ស្តែងជីវិតសិល្បៈរបស់គេកំពុងលូតលាស់ឈានទៅជាតារាចែងចាំងមួយដួង ៕
ចែករំលែកព័តមាននេះ