ខេត្តកំពត ៖ ប្រទេសមានសុខសន្តិភាព ប្រជាពលរដ្ឋមានជីវភាពរស់នៅប្រកបដោយសុខសុ វត្ថិភាពក្រោមមាគ៌ាដឹកនាំរាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំបានស្តារ និងអភិវឌ្ឍន៍តាំងពីបាតដៃទទេ រហូតមកដល់ពេលម៉ោងនេះប្រទេសកម្ពុជាមានការរីកចម្រើនលើគ្រប់វិស័យលើឆាកអន្តរជាតិផងដែរនាពេលបច្ចុប្បន្ននេះ ។
ដោយឡែកនៅក្នុងទឹកដីខេត្តកំពតនាឱកាសបុណ្យឆ្លងឆ្នាំសកល២០១៧ឈានចូល២០១៨នាយប់ថ្ងៃទី៣១ ខែធ្នូនេះថ្នាក់ដឹកនាំខេត្ត ក្រោមគំនិតឆ្នៃប្រឌិតរបស់ឯកឧត្តមលោក ចាន់ ចេស្តា អភិបាលនៃគណអភិបាលខេត្តរៀបចំកម្មវិធីសប្បាយៗជូនភ្ញៀវទេសចរជាតិ អន្តរជាតិ និងប្រជាពលរដ្ឋនៅក្នុងខេត្តយ៉ាងសប្បាយរីករាយ ដោយបង្កបរិយាកាសសប្បាយតាមសួនច្បារឆ្នេរ ព្រែករហូត ចាប់ពីស្ពានព្រែកកំពង់បាយថ្មីមកដល់ផែកំពង់កណ្តាល ។
នៅមុខសាលាខេត្តមន្ទីរវប្បធម៌ និងវិចិត្រសិល្បបានប្រគុំបទភ្លេងបុរាណនិងភ្លេងប្រពៃណីជូនភ្ញៀវស្តាប់កំសាន្តលាយឡំ និងស្នូរកាំជ្រួច បង្ហោះគោម រាប់រយគោម ពេញផ្ទៃមេឃ ។ រីឯទិដ្ឋភាពនៅក្នុងបរិវេណពហុកីឡាដ្ឋានខេត្តវិញក៏រៀបចំឆាកក្រុមតន្ត្រីលេងប្រគុំជូនភ្ញៀវជាតិ និងអន្តរជាតិរួមជាមួយថ្នាក់ដឹកនាំខេត្តរីករាយរហូតដល់ម៉ោង០០នាទីឆ្លងឆ្នាំផងដែរ ។
លោកសយ ស៊ីណុល ប្រធានមន្ទីរទេសចរខេត្តបានថ្លែងឲ្យដឹងថា បុណ្យឆ្លងឆ្នាំសកលឆ្នាំនេះមានភ្ញៀវទេសចរណ៍ជាតិ ភ្ញៀវទេសចរណ៍អន្តរជាតិមកលេងកម្សាន្តក្នុងខេត្តកំពត មានការកើនឡើងជាងឆ្នាំមុនៗ សរុបចំនួន៧៧៧៦៩នាក់ កើនឡើង៤.០២% ធៀប និងឆ្នាំ២០១៦កន្លងមក៧៤៧៦៩នាក់ ក្នុងនោះភ្ញៀវក្នុងស្រុកចំនួន៧៦៣៦០នាក់ កើនឡើង៣.៤៥%ធៀបឆ្នាំ ២០១៦ ។ ភ្ញៀវទេសចរអន្តរជាតិចំនួន១៤០៩នាក់កើនឡើង៤៨.៤៧% ធៀបឆ្នាំ២០១៦ មានចំនួន៩៤៩នាក់ ។ លោកបានឲ្យដឹងទៀតថា នៅរាត្រីថ្ងៃទី៣១ ខែធ្នូនេះ គោលដៅសំខាន់ដែលភ្ញៀវមកកំសាន្តមានពីរគឺ ក្រុងកំពត និងរមណីដ្ឋានឋានសួគ៌បូកគោ ដែលមានទេសចរទៅកំសាន្តច្រើន ។ ចំណែកសណ្ឋាគារ ផ្ទះសំណាក់ បឹងកាឡូ ក្នុងខេត្តជាង៣ពាន់បន្ទប់ គឺពេញទាំងអស់នៅយប់ថ្ងៃទី៣០ និងថ្ងៃទី៣១ ខែធ្នូ នេះ ។
អភិបាលនៃគណអភិបាលខេត្តមានប្រសាសន៍ថា ក្នុងរយៈពេលពីរថ្ងៃចាប់ពីថ្ងៃទី៣០មកដល់ថ្ងៃទី៣១ ខែធ្នូ ឆ្នាំ ២០១៧ ភ្ញៀវទេសចរមកពីតាមបណ្តាខេត្តរាជធានីបានមកលេងកម្សាន្តនៅក្នុងទឹកដីខេត្តកំពតយ៉ាងច្រើន ។
លោកអភិបាលខេត្តមានប្រសាសន៍បន្តទៀតថា នៅក្នុងពិធីនាពេលនេះផងដែរ ដោយខេត្តកែបទើប និងធ្វើបុណ្យសមុទ្រហើយរួចរាល់ថ្មីៗក្រោមអធិបតី ភាពសម្តេចអគ្គមហាសេនាបតីតេជោហ៊ុនសែននា យករដ្ឋមន្ត្រីនៃព្រះរាជាណាចក្រកម្ពុជា បានបញ្ចប់ទៅដោយជោគជ័យនាពេលថ្មីៗនេះ ដូច្នេះខេត្តកំពត និងខេត្តកែបជាប់គ្នាតែមួយ ហើយកម្មវិធីប្រារព្ធបុណ្យឆ្លងឆ្នាំសកលផង និងពិធីអបអរសាទរថ្ងៃបុណ្យសមុទ្រខេត្តកែបផង ៕
ចែករំលែកព័តមាននេះ