ទីក្រុង Cambridge ៖ យុទ្ធសាស្ត្រសន្តិសុខជាតិដែលបានចេញដោយសេតវិមាន White House កាលពីដើមខែធ្នូឆ្នាំ២០១៧ មានភាពខុសគ្នាពីយុទ្ធសាស្ត្រមុនៗ ។ យុទ្ធសាស្ត្រថ្មីនេះ ផ្តោតសំខាន់ទៅលើតួនាទីរបស់សេដ្ឋកិច្ចដោយបានចែងថា «សន្តិសុខផ្នែកសេដ្ឋកិច្ចគឺជាសន្តិសុខជាតិ »។
មួយផ្នែកនៃរបាយការណ៍ផ្តោតទៅលើសន្តិសុខជាតិដែលរួមមានថវិកាសម្រាប់យោធា, ឈ្មោះសម្ព័ន្ធមិត្ត, និងវិធីដោះស្រាយជាមួយនឹងប្រទេសមួយចំនួនដូចជា ប្រទេសរុស្ស៊ី និងចិន ដែលយុទ្ធសាស្ត្រថ្មីឲ្យឈ្មោះទៅពួកគេថា ជាដៃគូប្រកួតប្រជែងយុទ្ធសាស្ត្ររបស់សហរដ្ឋអាមេរិក ។
ប៉ុន្តែការលូតលាស់នៃសេដ្ឋកិច្ចក្នុងស្រុក,តួនាទីការធ្វើពាណិជ្ជកម្មអន្តរជាតិ និងជំហរថ្មីរបស់សហរដ្ឋអាមេរិកទាក់ទិននឹងវិស័យថាមពល ក៏ទទួលបានចំណាប់អារម្មណ៍យ៉ាងខ្លាំងដែរ ។
រដ្ឋាភិបាលរបស់លោកប្រធានាធិបតីដូណាល់ ត្រាំ (Donald Trump) បានចង្អុលទៅ ការធ្វើកំណែទម្រង់ និងច្បាប់រដ្ឋាករថ្មីជាយុទ្ធសាស្ត្រសម្រាប់ការជំរុញដល់ការលូតលាស់សេដ្ឋ កិច្ច ។ សេដ្ឋកិច្ចកាន់តែធំអាចផ្តល់ធនធានស្រាប់កសាងសមត្ថភាពផ្នែកយោធាកាន់តែច្រើន ។
ប៉ុន្តែការលូតលាស់សេដ្ឋកិច្ច អាចបង្កឲ្យមានការការពារជាតិកាន់តែបានប្រសិទ្ធភាព ប្រសិនបើសភាជាតិបង្កើនថវិកាសម្រាប់យោធានាពេលអនាគត ។
ព្រោះតែច្បាប់គ្រប់គ្រងថវិកាក្នុងឆ្នាំ ២០១១ សម្រាប់យោធាត្រូវបានកាត់រហូតដល់ត្រឹម៣%នៃGDPក្នុងឆ្នាំ២០២១ ការិយាល័យថវិកាសភាបានព្យាករណ៍ថា ថវិកានេះនឹងបន្តធ្លាក់ចុះដល់ត្រឹម២,៧%ក្នុងឆ្នាំ២០២៧ ។
ជាមួយគ្នានេះដែរ សំណើរបស់យុទ្ធសាស្ត្រខាងលើទាក់ទិននឹងការធ្វើពាណិជ្ជកម្មអន្តរជាតិត្រូវបានធ្វើឡើងដោយមានការវិភាគខុសទៅលើមូលហេតុដែលបង្កឲ្យមានឱនភាពពាណិជ្ជកម្មក្នុងសហរដ្ឋអាមេរិក ។ យុទ្ធសាស្ត្រនេះជំរុញឲ្យដៃគូពាណិជ្ជកម្មរបស់អាមេរិក និងវិទ្យាស្ថានអន្ដរជាតិខិតខំបន្ថែមក្នុងការដោះស្រាយវិសមភាព ប៉ុន្តែវាជាការគិតខុសហើយ ។ ទ្រឹស្តីសេដ្ឋកិច្ចប្រាប់មកថា ឱនភាពពាណិជ្ជកម្មរបស់សហរដ្ឋអាមេរិកបង្ហាញពីកម្រិតនៃការសន្សំប្រាក់ និងការវិនិយោគក្នុងស្រុក ។ ព្រោះតែប្រជាជនអាមេរិកចំណាយច្រើនជាងការផលិតក្នុងស្រុក ពួកគេត្រូវនាំចូលផលិតផលច្រើនជាងនាំចេញ ។ ដូច្នេះ ដើម្បីដោះស្រាយបញ្ហាឱនភាពពាណិជ្ជកម្ម នោះប្រជាជនតាមផ្ទះ អាជីវកម្ម និងរដ្ឋាភិបាល ត្រូវបង្កើនប្រាក់សន្សំ ឬវិនិយោគតិចជាងមុន ។
ប៉ុន្តែយុទ្ធសាស្ត្រខាងលើបានលើកឡើងដោយត្រឹមត្រូវទាក់ទិននឹងការចោទប្រកាន់ថារដ្ឋាភិបាលធ្វើឲ្យប៉ះពាល់ដល់អត្ថប្រយោជន៍របស់អាមេរិក ដោយជំរុញដល់ការលួចកម្មសិទ្ធិបញ្ញាអាមេរិក ។ ក្នុងកិច្ចប្រជុំមួយក្នុងឆ្នាំ២០១៣ លោកប្រធានាធិបតី Barack Obama បានបង្ហាញដល់លោកប្រធានាធិបតី Xi Jinping របស់ប្រទេសចិនពីភស្តុតាងបង្ហាញថា សមាជិកយោធាប្រទេសចិនលួចបច្ចេកវិទ្យាឧស្សាហកម្មរបស់អាមេរិក ។
ភាគីខាងប្រទេសចិនទទួលស្គាល់ភស្តុតាងទាំងនេះ និងបាននិយាយថា ការលួចនេះមិនមែនជាអំពើចារកម្មទេ និងបានសន្យាថា រដ្ឋាភិបាលចិននឹងមិនជួយដល់ការលួចដូចនេះតទៅទៀតនាពេលអនាគត។ យុទ្ធសាស្ត្រថ្មីបានកត់សម្គាល់ថារដ្ឋាភិបាលអាមេរិក នឹងចេញវិធានការបន្ថែមទៀតដើម្បីបញ្ឈប់អំពើរនេះ ។
លើសពីនេះទៅទៀត យុទ្ធសាស្ត្រខាងលើលើកឡើងថា សហរដ្ឋអាមេរិកនឹងព្យាយាមកាត់បន្ថយឧបសគ្គពាណិជ្ជកម្ម និងផ្តល់ឱកាសដល់ប្រជាជនអាមេរិកក្នុងការបង្កើនការនាំចេញ ប៉ុន្តែរបាយការណ៍នេះក៏រិះគន់ដល់គោលនយោបាយពាណិជ្ជកម្មមិនយុត្តិធម៌របស់ប្រទេសចិន និងប្រទេសដទៃទៀតដែលប្រើប្រាស់វិធីលក់ក្នុងតម្លៃទាបជាងទីផ្សារ, ឧបសគ្គពាណិជ្ជកម្មដែលមិនមែនជាពន្ធ, ការបង្ខំឲ្យមានការផ្ទេរបច្ចេកវិទ្យា, ការផ្តល់ឧបត្ថម្ភធន, និងការផ្តល់ជំនួយផ្សេងៗពីរដ្ឋាភិបាលជាដើម ។
ឧបសគ្គពាណិជ្ជកម្មដែលមិនមែនជាពន្ធ រួមជាមួយការបង្ខំឲ្យផ្ទេរច្ចេកវិទ្យា ពិតជាប៉ះពាល់ដល់សហគ្រាសសហរដ្ឋអាមេរិកពិតមែន ប៉ុន្តែការលក់ផលិតផលក្នុងតម្លៃទាប បែរជាអាចជួយដល់ប្រជាជនអាមេរិកទៅវិញ បើទោះជាប៉ះពាល់ដល់សហគ្រាសអាមេរិកក៏ដោយ ។
សម្រាប់ថ្ងៃអនាគត រដ្ឋាភិបាលអាមេរិកគួរតែផ្តោតស្មារតីលើការដោះស្រាយបញ្ហាផ្សេងៗ ដូចជា ការលួចបច្ចកវិទ្យា, ការដាក់ឧបសគ្គពាណិជ្ជកម្មដែលមិនមែនជាពន្ធលើផលិតផលនាំចេញរបស់អាមេរិក, ការបង្ខំឲ្យផ្ទេរបច្ចេកវិទ្យាជាដើម ដែលប៉ះពាល់ដល់សហគ្រាសអាមេរិកនិងមិនផ្តល់អត្ថប្រយោជន៍ដល់ប្រជាជន ៕
ដក ស្រង់ចេញពី៖ Project Syndicate
ចែករំលែកព័តមាននេះ