រាជធានីភ្នំពេញ ៖ អំពើប្លន់ប្រដាប់អាវុធកើតមានជាបន្តបន្ទាប់៣ករណីនៅក្នុងរាជធានីភ្នំពេញបានធ្វើឱ្យមាការភ្ញាក់ផ្អើល និងចាប់អារម្មណ៍ ព្រោះតែអំពើបាញ់ប្លន់យកម៉ូតូនេះហាក់បានស្ងាត់អស់មួយរយៈពេលកន្លងមកហើយ ដែលជំនួសមកវិញនោះច្រើនតែកើតមានករណីលួច ឬឆក់ប៉ុណ្ណោះ ។ គ្រាន់តែយប់ថ្ងៃទី២១ វិច្ឆិកា និងឆ្លងចូលថ្ងៃទី២២ វិច្ឆិកា អំពើប្លន់ដោយក្រុមចោរប្រដាប់អាវុធនេះ គឺជាសារមួយសម្រាប់មន្ត្រីសមត្ថកិច្ចដែលមានតួនាទីពង្រឹងសុវត្ថិភាព ។
ប្រការគួរឱ្យកត់សម្គាល់នោះគឺអំពើប្លន់ជាបន្តបន្ទាប់នេះបានកើតឡើង បន្ទាប់ពីការពង្រឹងសន្តិសុខដល់ចំណុចកំពូល ក្នុងរយៈពេលដែលរាជធានីភ្នំពេញជាកន្លែងដែលត្រូវរៀបចំកិច្ចប្រជុំកំពូលអាស៊ាន និងកិច្ចប្រជុំថ្នាក់អន្តរជាតិជាច្រើនទៀត ដែលមានការចូលរួមពីឥស្សរជននៃប្រទេសមហាអំណាច និងប្រទេសជាសមាជិកអាស៊ាន ។ ខាងក្រោមនេះគឺជាសេចក្តីរាយការណ៍បន្តបន្ទាប់ជុំវិញអំពើប្លន់គួរឱ្យព្រួយបារម្ភសម្រាប់ប្រជាពលរដ្ឋស្លូតត្រង់ ។
ចោរបាញ់នារីម្នាក់១គ្រាប់ប្លន់យកម៉ូតូម៉ាកឃ្លីកតែយកមិនបានសម្រេច
នារីម្នាក់បានរងរបួសធ្ងន់ក្នុងអំពើបាញ់ប្លន់យកម៉ូតូម៉ាក់ឃ្លីកមួយគ្រឿង តែមិនបានសម្រេច កាលពីវេលាម៉ោង៧យប់ថ្ងៃទី២១ វិច្ឆិកា ឆ្នាំ២០១២ នៅភូមិទ្រាទី៤ សង្កាត់ស្ទឹងមានជ័យ ខណ្ឌមានជ័យ ។
ស្ត្រីរងគ្រោះឈ្មោះឌុល សារវ័ន្ត អាយុ២៦ឆ្នាំ ជាកម្មការិនីរោងចក្រ ។ មុនពេលកើតហេតុ នាងបានជិះម៉ូតូម៉ាកឃ្លីកមួយគ្រឿងធ្វើដំណើរមកលេងផ្ទះមិត្តភក្តិនៅចំណុចខាងលើ ។ លុះពេលមកដល់ ក៏ត្រូវក្រុមចោរមានគ្នា២នាក់ជិះម៉ូតូធំមួយគ្រឿងប្រដាប់ដោយកាំភ្លើងខ្លី បានធ្វើសកម្មភាពភ្ជង់ និងបាញ់មួយគ្រាប់ក្នុងបំណងប្លន់យកម៉ូតូ ប៉ុន្តែនាងក្រាញមិនព្រមប្រគល់ម៉ូតូរបស់ខ្លួនទៅឱ្យក្រុមចោរប្លន់នោះឡើយ ។ ដោយស្ថានភាពតឹងតែង ក្រុមចោរក៏បានជិះម៉ូតូរត់គេចខ្លួនភ្លាមៗដែរ ខណៈពេលស្នូរផ្ទុះអាវុធបានបង្កឱ្យមានការឆោឡោឡើង ។ ចំណែកនារីរងគ្រោះត្រូវបានមិត្តភក្តិដឹកយកទៅសង្គ្រោះនៅមន្ទីរពេទ្យមិត្តភាពខ្មែរ-សូវៀតភ្លាមៗដែរ ។
ជុំវិញហេតុការណ៍ខាងលើនេះ នគរបាលខណ្ឌមានជ័យបានសហការជាមួយនគរបាលស្នងការដ្ឋានរាជធានីចុះអន្តរាគមន៍ឃាត់ខ្លួនជនសង្ស័យចំនួន២នាក់នាំយកទៅស្នងការដ្ឋាន ដើម្បីធ្វើការសាកសួរ ។ អ្វីដែលជាការកត់សម្គាល់នោះគឺ ក្នុងខណៈពេលចោរប្លន់យកម៉ូតូនោះ នារីរងគ្រោះបានបង្ខំចិត្តឱបម៉ូតូជាប់មិនព្រមឱ្យទៅចោរឡើយ ព្រោះតែសោកស្តាយម៉ូតូរបស់នាង ។ ដោយសារតែនាងក្រាញននៀល ទើបក្រុមចោរបាញ់មកលើរូបនាងមួយគ្រាប់ ហើយនាំគ្នាជិះម៉ូតូរត់គេចខ្លួនបាត់អស់ទៅ ។
ដោយឡែកនារីរងគ្រោះ ភ្លាមៗនោះដែរបានព្យាយាមជិះម៉ូតូមកដល់លំនៅឋានជាផ្ទះជួលដែលនៅជិតនោះ ទើបដឹងថាខ្លួនឯងរងរបួសនៅត្រង់ចង្កេះខាងស្តាំពីក្រោយ ហើយតក់ស្លុតក៏សន្លប់តែម្តង ។
ចោរបាញ់ប្លន់យកម៉ូតូម៉ាកសេ១២៥ ស៊េរី២០១២ពីបុរសម្នាក់
យុវជនម្នាក់បានរងរបួសយ៉ាងធ្ងន់ក្នុងអំពើបាញ់ប្រហារប្លន់យកម៉ូតូម៉ាកសេ១២៥ស៊េរីឆ្នាំ២០១២កាលពីវេលាម៉ោង២២ និង១០នាទីថ្ងៃទី២១ វិច្ឆិកា នៅចំណុចក្រោយវិទ្យាល័យផ្សារដើមថ្កូវ តាមបណ្ដោយផ្លូវលេខ១៥៥ កែងផ្លូវលេខ៤៨៦ទល់មុខហាងជួបមិត្ត ក្នុងសង្កាត់ផ្សារដើមថ្កូវ ខណ្ឌចំការមន។
យោងតាមសេចក្ដីរាយការណ៍ពីកន្លែងកើតហេតុបានឱ្យដឹងថា យុវជនដែលរងរបួសដោយក្រុមចោរបាញ់ប្រហារខាងលើនេះឈ្មោះប្រុស អាយុ២០ឆ្នាំ ជាកម្មករសំណង់ និងមិត្តភក្ដិពីរនាក់់ទៀតម្នាក់ឈ្មោះមឿន ឡូត ភេទប្រុស អាយុ២១ឆ្នាំ និងម្នាក់ទៀតឈ្មោះដំ ភេទប្រុស អាយុ២៤ឆ្នាំ ។
បើតាមសម្ដីយុវជនឈ្មោះមឿន ឡូត ជាមិត្តភក្តិបានរៀបរាប់ប្រាប់សមត្ថកិច្ចថា មុនពេលកើតហេតុខ្លួន និងមិត្តភក្ដិបានអង្គុយផឹកស្រាបៀរនៅក្រោមដើមឈើជាប់របងវិទ្យាល័យ ផ្សារដើមថ្កូវ ខណៈនោះស្រាប់តែមានជនសង្ស័យបីនាក់ជិះម៉ូតូមួយគ្រឿងម៉ាកសេ១១០ ពណ៌ខ្មៅ មកឈប់ក្បែរខ្លួន ហើយសួរពួកខ្លួនរកសាលាទួលទំពូង តែពួកខ្លួនមិនចាប់អារម្មណ៍ថា ជាចោរមានបំណងប្លន់យកម៉ូតូនោះទេ ក៏បានឆ្លើយថាមិនស្គាល់ ។
មួយសន្ទុះក្រោយមក ស្រាប់តែជនម្នាក់ក្នុងចំណោមជនទាំងបីនាក់បានដកកាំភ្លើងម៉ាកAK54ពីចង្កេះមកភ្ជង់លើឈ្មោះប្រុស ហើយគំរាមឱ្យប្រគល់សោម៉ូតូ ប៉ុន្តែឈ្មោះប្រុសមិនព្រមឱ្យ ទើបចោរនោះបាញ់មួយគ្រាប់ចំដើមទ្រូងខាងស្ដាំរបស់ឈ្មោះប្រុសបណ្ដាលឱ្យដួលទៅនឹងថ្នល់រងរបួសធ្ងន់ ។ ក្រោយពីបាញ់មួយគ្រាប់រួចមក ក្រុមចោរទាំងបីនាក់បានដណ្ដើមយកម៉ូតូជិះរត់គេចខ្លួនបាត់ស្រមោលតែម្ដងទៅ ។ ភ្លាមៗនោះមិត្តភក្ដិជនរងគ្រោះបានដឹកជនរងគ្រោះតាមម៉ូតូយកទៅព្យាបាលរបួសនៅមន្ទីរពេទ្យកាល់ម៉ែត ។
ចំពោះករណីខាងលើនេះសមត្ថកិច្ចនគរបាលប៉ុស្ដិ៍ផ្សារដើមថ្កូវបានចុះទៅពិនិត្យដល់កន្លែងកើតហេតុ និងហៅឈ្មោះមឿន ឡូតមកកាន់ទីស្នាក់ការប៉ុស្ដិ៍ផ្សារដើមថ្កូវដើម្បីសាកសួរជុំវិញករណីប្លន់ប្រដាប់អាវុធដ៏សាហាវខាងលើនេះ ។
ដឹកភ្ញៀវចេញពីសណ្ឋាគារត្រូវចោរបាញ់ប្លន់យកម៉ូតូទៅបាត់ស្រមោល
អ្នករត់ម៉ូតូឌុបម្នាក់ បានត្រូវចោរបាញ់ប្រហារចំនួន១គ្រាប់ចំភ្លៅខាងស្តាំធ្លាយទៅកំភួនជើងខាងឆ្វេងប្លន់យកម៉ូតូម៉ាកហុងដាឌ្រីមសេ១២៥មួយគ្រឿង ស៊េរី២០០៨ ពណ៌ខ្មៅ ខណៈជនរងគ្រោះដឹកភ្ញៀវចេញពីសណ្ឋាគារមួយក្នុងសង្កាត់កាកាប កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី២២ វិច្ឆិកា ទៅដល់មុខមជ្ឈមណ្ឌលវ៉តធើរផាក តាមបណ្តោយមហាវិថីសហព័ន្ធរុស្ស៊ីក្នុងសង្កាត់ទឹកថ្លា ខណ្ឌសែនសុខ ។ នេះជាករណីថ្មីបំផុតមួយនៃសកម្មភាពប្លន់ម៉ូតូដោយក្រុមចោរបាញ់មនុស្សដូចបាញ់ចាប ដែលអំពើដ៏សាហាវនេះហាក់បានស្ងប់ស្ងាត់យូរមកហើយនោះ ។
ប្រភពព័ត៌មាននៅកន្លែងកើតហេតុឱ្យដឹងថា ជនរងគ្រោះឈ្មោះនួន គឹមសៀន ស្នាក់នៅក្នុងសង្កាត់កាកាប ខណ្ឌពោធិ៍សែនជ័យ បានដឹកភ្ញៀវជាស្ត្រីម្នាក់ចេញពីសណ្ឋាគារហ្គើលប៊ីន នៅក្នុងសង្កាត់កាកាប ឆ្ពោះទៅភូមិសាមគ្គី ក្នុងសង្កាត់ឫស្សីកែវ ខណ្ឌឫស្សីកែវ ។ លុះមកដល់ចំណុចខាងលើ ក៏មានជន៤នាក់ ជិះម៉ូតូ២គ្រឿង គឺម៉ាកហុងដាសេ១១០ ពណ៌ខ្មៅ មួយគ្រឿង និងម៉ាកស្គូពីមួយគ្រឿងមកកៀក រួចជនម្នាក់ក្នុងចំណោមបក្សពួកដែលជិះម៉ូតូហុងដាសេ១១០បានដកកាំភ្លើងម៉ាកឡុកភ្ជង់ជនរងគ្រោះឱ្យឈប់ ហើយបាញ់១គ្រាប់ ចំភ្លៅស្តាំធ្លាយទៅកំភួនជើងខាងឆ្វេង ។ ប្រភពព័ត៌មានដដែលបន្តទៀតថា ពេលនោះក្រុមចោរបម្រុងបាញ់ប្លន់ស្ត្រីជាភ្ញៀវជិះម៉ូតូឌុបនោះថែមទៀត ដើម្បីប្លន់យកកាបូបលុយ ប៉ុន្តែស្ត្រីរងគ្រោះបានបោះកាបូបចោល រួចរត់ទៅពួននៅក្បែរផ្ទះមួយនៅជិតនោះទាំងព្រលឹងចុងសក់ ទើបក្រុមចោររើសយកកាបូបរួចជិះម៉ូតូគេចខ្លួនបាត់តែម្តង ។
ក្រោយពេលកើតហេតុ បុរសរងគ្រោះត្រូវបានបញ្ជូនទៅសង្គ្រោះភ្លាមៗ ចំណែកស្ត្រីរងគ្រោះជាភ្ញៀវជិះម៉ូតូឌុប ហើយភ័យរន្ធត់និយាយមិនចង់ចេញបានទៅដាក់ពាក្យបណ្តឹងនៅប៉ុស្តិ៍ប៉ូលិសទឹកថ្លា ។
ព័ត៌មានចុងក្រោយ
ដោយសារតែមានការចាប់ខ្លួនជនសង្ស័យ២នាក់ ក្នុងអំពើប្លន់បាញ់ឱ្យនារីម្នាក់របួសក្នុងការប៉ុនប៉ងប្លន់យកម៉ូតូឃ្លីក តែមិនបានសម្រេចនោះ នៅព្រឹកថ្ងៃទី២២ វិច្ឆិកា ផ្ទះសំណាក់លី ពៅ ស្ថិតនៅក្នុងភូមិទ្រា៣ សង្កាត់ស្ទឹងមានជ័យ ខណ្ឌមានជ័យ សមត្ថកិច្ចបានធ្វើការឆែកឆេរ និងបានឃាត់ខ្លួនជនសង្ស័យ៩នាក់ផ្សេងទៀត ។ ទោះបីជាបែបណា សមត្ថកិច្ចកំពុងតែដុតដៃដុតជើងដោយមិនទាន់ផ្តល់ព័ត៌មានជាក់លាក់ណាមួយឱ្យបានដឹងនៅឡើយទេ ៕
ចែករំលែកព័តមាននេះ