រាជធានីភ្នំពេញ ៖ លោកឧកញ៉ា អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រីកាលពីរសៀលថ្ងៃទី២៩ ខែធ្នូ ឆ្នាំ២០១៧ បានអញ្ជើញចុះសាកសួរសុខទុក្ខ និងឧបត្ថម្ភដល់សិស្សានុសិស្សនៅមជ្ឈមណ្ឌលអ៊ិស្លាមកម្ពុជា និងនៅវិទ្យាស្ថានូរ៉ុលអ៊ីម៉ាន ឃុំឫស្សីជ្រោយ ស្រុកមុខកំពូល ខេត្តកណ្តាល។
នៅក្នុងឱកាសនោះអមដំណើរដោយអស់លោក លោកជំទាវ និងថ្នាក់ដឹកនាំនៅតាមក្រសួង មន្ទីរ និងស្ថាប័ននានាយ៉ាងច្រើនកុះករផងដែរ។
លោកឧកញ៉ា អូស្មាន ហាស្សាន់ ក៏បានផ្តាំផ្ញើនូវអនុសាសន៍ល្អៗដល់ប្អូនៗដែលស្ថិតនៅក្នុងវ័យសិក្សាត្រូវខិតខំប្រឹងក្រេបចំណេះដឹងមិនត្រូវបោះបង់ការសិក្សាពាក់កណ្តាលទីនោះឡើយ។ ក្នុងនាមជាពលរដ្ឋម្នាក់ដែលស្ថិតនៅជាយុវវ័យត្រូវហាត់ពត់លត់ដុំខ្លួនឱ្យក្លាយជាយុវជនល្អ ជាសសរទ្រូងសម្រាប់សង្គមជាតិ ។ យើងត្រូវសម្លឹងឱ្យវែងឆ្ងាយ ខិតខំប្រឹងប្រែង រៀនយ៉ាងហោចណាស់ក៏ចប់ថ្នាក់បរិញ្ញាបត្រដែរ ដើម្បីជាស្បៀងសម្រាប់អនាគតភ្លឺស្វាងរបស់យើងគ្រប់ៗគ្នា និងម្យ៉ាងទៀតសម្រាប់ប្រកួតប្រជែងនៅលើទីផ្សារការងារដែលកំពុងត្រូវការអ្នកមានជំនាញ និងសមត្ថភាពពិតប្រាកដ។
លោកឧកញ៉ា អូស្មាន ហាស្សាន់ ក៏បានលើកឡើងថា ប្រមុខរាជរដ្ឋាភិបាលកម្ពុជាបានយកចិត្តទុកដាក់ខ្ពស់ទៅលើវិស័យអប់រំ គឺជាវិស័យអាទិភាពបំផុត។ លោករដ្ឋមន្ត្រីប្រតិភូក៏បានរំលឹកអំពីកំណើននៃប្រាក់បៀវត្សមន្ត្រីរាជការ ជាពិសេសប្រាក់បៀវត្សរបស់គ្រូបង្រៀន គឺជាផ្នែកសំខាន់ដែលរាជរដ្ឋាភិបាលបានដំឡើងជាបន្តបន្ទាប់ ហើយនៅឆ្នាំ២០១៨នេះ ប្រាក់បៀវត្សគ្រូបង្រៀនបូកនឹងកាំប្រាក់ផ្សេងៗយ៉ាងតិចបំផុតមិនក្រោម១លានរៀលឡើយ។
លោកឧកញ៉ាក៏បានផ្តាំផ្ញើដល់ថ្នាក់ដឹកនាំមជ្ឈមណ្ឌល និងសិស្សានុសិស្ស សូមបន្តប្រើប្រាស់មណ្ឌលសិក្សាមួយនេះ ដើម្បីចូលរួមអភិវឌ្ឍន៍ និងលើកកំពស់វិស័យអប់រំទាំងចំណេះដឹងទូទៅ និងផ្នែកសាសនាអ៊ិស្លាម ហើយសង្ឃឹមនឹងមិនមានអ្វីរាំងស្ទះដល់បញ្ហាប្រាក់បៀវត្សគ្រូទេ ព្រោះគ្រូបង្រៀនស្ទើរទាំងអស់ក្នុងមជ្ឈមណ្ឌលនេះ គឺត្រូវបានរាជរដ្ឋាភិបាលសម្រេចជ្រើសរើសបញ្ចូលទៅក្នុងក្របខណ្ឌគ្រូរបស់ក្រសួងអប់រំ យុវជន និងកីឡា។
នៅក្នុងឱកាសនោះដែរ លោករដ្ឋមន្ត្រីប្រតិភូអមនាយករដ្ឋមន្ត្រី ក៏បានពាំនាំអង្ករចំនួន១០តោនរបស់ក្រុមប្រឹក្សាអ៊ិស្លាមរដ្ឋសឺឡាងរ ប្រទេសម៉ាឡេស៊ី ប្រគល់ជូនមជ្ឈមណ្ឌល ដើម្បីដោះស្រាយហូបចុកខ្លះជូនសិស្សានុសិស្សា និងគ្រូ ព្រមទាំងឧបត្ថម្ភជូនសិស្សានុសិស្សចំនួន៥៥០នាក់ ដោយក្នុងម្នាក់ៗបានថវិកា១០.០០០រៀល, លោកគ្រូ អ្នកគ្រូចំនួន៣០នាក់ ម្នាក់ៗចំនួន១០.០០០រៀលផងដែរ៕
ចែករំលែកព័តមាននេះ