រាជធានីភ្នំពេញ ៖ តាមរបាយការណ៍បូកសរុបលទ្ធផលការងារប្រចាំឆ្នាំរបស់ក្រសួងដែនដី នគរូបនីយកម្ម និងសំណង់ បានឲ្យដឹងថា ទុនវិនិយោគវិស័យសំណង់ក្នុងដំណាច់ឆ្នាំ២០១៧នេះ មានទឹកប្រាក់ប៉ាន់ស្មានសរុបជាង៦ពាន់លានដុល្លារ ក្នុងនោះមានគម្រោងសរុបចំនួន៣.០៥២គម្រោង ដែលមានផ្ទៃក្រឡាសំណង់សរុបជាង១០លានម៉ែត្រការ៉េ ខណៈឆ្នាំមុន ក្រសួងបានអនុម័តគម្រោង២.៤០៥គម្រោង មានផ្ទៃក្រឡាសំណង់ជាង១១លានម៉ែត្រការ៉េ និងទឹកប្រាក់វិនិយោគជាង៥ពាន់លានដុល្លារអាមេរិក ។
បច្ចុប្បន្ននេះ វិស័យសំណង់បានផ្តល់ការងារដល់ប្រជាពលរដ្ឋកម្ពុជាប្រមាណជាង២០ម៉ឺននាក់ក្នុង១ថ្ងៃ កើនឡើងជាង៤០% បើធៀបនឹងឆ្នាំមុន ដោយនេះមិនទាន់រាប់បញ្ចូលពលករជំនាញបរទេសនៅឡើយ ។
ក្នុងឆ្នាំ២០១៧នេះផងដែរ តម្លៃពលកម្មសម្រាប់កម្មករគ្មានជំនាញទទួលបានកម្រៃចាប់ពីជាង៣ម៉ឺន ដល់៤ម៉ឺនរៀលក្នុង១ថ្ងៃ ។ ចំពោះកម្មករជំនាញ និងមេជាងវិញ ទទួលបានចាប់ពី៥ម៉ឺន ទៅជិត៨ម៉ឺនរៀលក្នុង១ថ្ងៃ ។ ចំណែកវិស្វករ ស្ថាបត្យករ និងអ្នកជំនាញផ្សេងៗទៀត ទទួលបានប្រាក់បៀវត្សចន្លោះពី៤០០ ទៅ២.៥០០ដុល្លារក្នុង១ខែ ។
នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានថ្លែងថា ក្នុងរយៈពេល២ទសវត្សរ៍ចុងក្រោយនេះ វិស័យសំណង់បានដើរតួនាទីដ៏សំខាន់ក្នុងការជំរុញកំណើនសេដ្ឋកិច្ចជាតិ ផ្តល់ការងារដល់ប្រជាពលរដ្ឋ ធ្វើឲ្យគុណភាពជីវិតប្រជាពលរដ្ឋកម្ពុជាកាន់តែប្រសើរឡើង ពិសេសជួយលើកកម្ពស់មុខមាត់កម្ពុជានៅលើឆាកអន្តរជាតិ ដោយសារគម្រោងវិនិយោគធំៗនៅកម្ពុជាភាគច្រើនបានយកទៅដាក់លក់នៅបរទេស ។
អ្នកនាងបន្តថា ៖« ជាមួយការជំរុញឲ្យគុណភាពជីវិតប្រសើរឡើង ខ្ញុំគិតថា វិស័យនេះក៏ជួយក្នុងការអភិវឌ្ឍសង្គម និងហេដ្ឋារចនាសម្ព័ន្ធនានាផងដែរ » ។
ទីប្រឹក្សាផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting លោក ង៉ែត ជូ បានថ្លែងថា វិស័យនេះបានផ្តល់ផលប្រយោជន៍ច្រើនដល់សេដ្ឋកិច្ចជាតិ ពិសេសផ្តល់ការងារដល់ប្រជាពលរដ្ឋ ប៉ុន្តែកម្ពុជាក៏បានបាត់បង់ផលប្រយោជន៍ច្រើនពីកំណើននៃការវិនិយោគក្នុងវិស័យនេះផងដែរ ដោយសារកម្ពុជាបាននាំចូលវត្ថុធាតុដើមភាគច្រើនពីបរទេស ដែលធ្វើឲ្យតម្លៃបន្ថែមក្នុងវិស័យនេះបាត់បង់ ។
លោកបន្តថា ៖« ប្រសិនជាគណនាផលទុនជាតិសរុប ក៏មានការរួមបញ្ចូលនូវទុនវិនិយោគពីបរទេសផ្ទាល់ផងដែរ ដែលវិស័យសំណង់បានចូលរួមជំរុញកំណើនសេដ្ឋកិច្ច និងសង្គម ហើយដើម្បីកាត់បន្ថយការបាត់បង់ផលប្រយោជន៍ក្នុងវិស័យនេះ ទាមទារឲ្យមានការវិនិយោគវត្ថុធាតុដើមក្នុងប្រទេសឲ្យបានច្រើន » ។
តាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ក៏បានបង្ហាញផងដែរថា ក្រសួងបានអនុញ្ញាតផ្តល់លិខិតសាងសង់ វិស័យសំណង់នៅទូទាំងប្រទេស ចាប់ពីឆ្នាំ២០០០ ដល់ឆ្នាំ២០១៧ មានចំនួន៣៩.៩០៣គម្រោង មានផ្ទៃក្រឡាសរុបជាង១០២លានម៉ែត្រក្រឡា និងមានតម្លៃទុនវិនិយោគសរុបជាង៣៧ពាន់លានដុល្លារ ៕
ចែករំលែកព័តមាននេះ