ការរៀបចំលំនៅឋានតាមលក្ខណៈហុងស៊ុយអាចជួយឲ្យលំនៅឋានរបស់លោកអ្នកហូរចូលនូវទ្រព្យសម្បត្តិ មាសប្រាក់ និងបន្ថែមជោគលាភនៅក្នុងឆ្នាំថ្មីដែលនឹងមកដល់ឆាប់ៗនេះ។ តើយើងគួរតុបតែងបែបណាខ្លះ និងសម្ភារអ្វីខ្លះដែលត្រូវយកចេញពីផ្ទះឲ្យបានមុនឆ្នាំថ្មីមកដល់ ? ១-ការសម្អាតផ្ទះស្អាតបំផុត ជាចំណុចចាប់ផ្តើមបង្កើតហុងស៊ុយល្អ ៖ ប្រសិនបើលោកអ្នកគ្មានពេលវេលាសម្អាតផ្ទះជាប្រចាំទេ…
ការរៀបចំលំនៅឋានតាមលក្ខណៈហុងស៊ុយអាចជួយឲ្យលំនៅឋានរបស់លោកអ្នកហូរចូលនូវទ្រព្យសម្បត្តិ មាសប្រាក់ និងបន្ថែមជោគលាភនៅក្នុងឆ្នាំថ្មីដែលនឹងមកដល់ឆាប់ៗនេះ។ តើយើងគួរតុបតែងបែបណាខ្លះ និងសម្ភារអ្វីខ្លះដែលត្រូវយកចេញពីផ្ទះឲ្យបានមុនឆ្នាំថ្មីមកដល់ ?
១-ការសម្អាតផ្ទះស្អាតបំផុត ជាចំណុចចាប់ផ្តើមបង្កើតហុងស៊ុយល្អ ៖
ប្រសិនបើលោកអ្នកគ្មានពេលវេលាសម្អាតផ្ទះជាប្រចាំទេ គួរបោសសម្អាតផ្ទះជាផ្នែកៗដើម្បីទទួលឆ្នាំថ្មី ដោយរៀបចំសម្ភារនានាឲ្យមានរបៀបតាមលក្ខណៈហុងស៊ុយ គឺមានជំនឿថា នឹងជួយបន្ថែមជោគលាភ និងមាសប្រាក់ឲ្យហូរចូលមក ។ ប្រសិនបើផ្ទះរាយប៉ាយ នឹងធ្វើឲ្យជោគលាភ ឬឱកាសល្អៗអណ្តែតទៅបាន ។
២-ពិនិត្យបរិវេណខាងក្រៅ និងខាងក្នុងផ្ទះ ៖
បើមានផ្នែកណាខូចខាតទ្រុឌទ្រោម យើងត្រូវប្រញាប់ជួសជុលវាតាមដែលអាចធ្វើទៅបាន កុំបណ្តោយឲ្យឆ្លងឆ្នាំទាន់ ដូចជា កញ្ចក់បែក ផ្ទះប្រេះស្រាំ និងភ្លើងខូចជាដើម បើមិនអាចជួសជុលវាបានទេ គួរបោះចោលទៅ ។
៣-សម្អាតផ្លូវចូលផ្ទះដើម្បីទទួលអ្វីល្អៗ ៖
ពិនិត្យមើលទៅលើអំពូលភ្លើង កណ្តឹង និងគន្លឹះទ្វារថា តើវានៅប្រើការបានល្អដែរឬទេ ? បើប្រើមិនបានទេ គួរផ្លាស់ប្តូរវាចេញ ហើយក្រណាត់ជូតជើងនៅច្រកចូលផ្ទះ ក៏ត្រូវប្តូរចេញផងដែរ ឬយកទៅបោកគក់ឲ្យស្អាតដូចថ្មី ។
៤-តុបតែងដើមឈើ និងផ្កា ៖
ការតុបតែងនេះធ្វើឲ្យផ្ទះមានភាពស្រស់ថ្លា និងម្លប់ត្រជាក់ បើតាមហុងស៊ុយ គេមានជំនឿថា វានឹងជួយនាំមាសប្រាក់ចូលមក ។ យើងគួរថែទាំដើមឈើ និងផ្កាមិនឲ្យស្វិតស្រពោន បើវាងាប់ ត្រូវយកទៅចោល ។
៥-តុបតែងលំនៅឋានដោយប្រើប្រាស់សម្ភារមង្គល ៖
យើងអាចតុបតែងលំនៅឋានដោយប្រើកាក់ចិនបុរាណ ដើមកន្ទឹម ដើមក្រូចពោធិ៍សាត់ ឬរូបផ្លែក្រូច រូបចម្លាក់សត្វជ្រូក ដំរី អណ្តើក តុក្កតាមាន់ ឬចម្លាក់មាន់ ដែលទាក់ទងនឹងរឿងជោគលាភ មាសប្រាក់ ។
៦-បន្ថែមជោគលាភ មាសប្រាក់ដោយលាបពណ៌តែមួយ ៖
យើងអាចតុបតែងផ្ទះបានទាំងបរិវេណជញ្ជាំង និងផ្នែកផ្សេងៗ ដោយប្រើប្រាស់ពណ៌តែមួយមាន ធាតុទឹក ធាតុដី ដូចជា ពណ៌ខៀវ ពណ៌បៃតង និងពណ៌ត្នោតជាដើម ព្រោះវានឹងជួយបន្ថែមផ្នែកមាសប្រាក់ ។
តើគួរលាបពណ៌អ្វីខ្លះនៅតាមបន្ទប់ផ្សេងៗនៃផ្ទះ ?
*បន្ទប់ទទួលភ្ញៀវ (ធាតុភ្លើង) ៖ វាប្រៀបដូចជាបេះដូងរបស់ផ្ទះដែរ ដូច្នេះ យើងគួរលាបបន្ទប់ដោយប្រើពណ៌ភ្លឺស្រស់ថ្លា ដូចជា ពណ៌ក្រហម និងពណ៌ស្វាយ ព្រោះជាពណ៌ដែលអាចជំរុញឲ្យកើតការទំនាក់ទំនងល្អ ហើយការងារផ្សេងៗដំណើរការល្អផងដែរ ។
*បន្ទប់ទទួលទានអាហារ (ធាតុដី) ៖ បន្ទប់នេះប្រៀបដូចជាពោះរបស់ផ្ទះ ដើម្បីឲ្យការរំលាយអាហារបានល្អ ហេតុនេះ យើងគួរជ្រើសរើសប្រើពណ៌ដូចជា ពណ៌មាស និងពណ៌ដីឥដ្ឋ ប៉ុន្តែមិនគួរលាបពណ៌ក្រហមទេ ព្រោះវានឹងជំរុញឲ្យស្បៀងរបស់យើងឆាប់អស់ ។
*បន្ទប់គេង (ធាតុដែក) ៖ ប្រៀបដូចជាសួតរបស់ផ្ទះ ដើម្បីឲ្យការសម្រាកលក់ស្រួលគ្រប់គ្រាន់ដល់រាងកាយ យើងគួរលាបពណ៌បន្ទប់នេះដោយប្រើពណ៌ស ពណ៌ទឹកដោះគោ និងពណ៌ស្រាលៗ ព្រឿងៗ ។ ចៀសវាងការតុបតែងដោយទ្រង់ទ្រាយធំពេក ជាពិសេស បន្ទប់គេងរបស់ក្មេងៗ ។
*បន្ទប់ទឹក (ធាតុទឹក) ៖ ប្រៀបដូចជាតម្រង់នោមរបស់ផ្ទះ ហើយបន្ទប់នេះត្រូវការភាពស្ងប់ស្ងាត់ ដូច្នេះ ពណ៌ផ្ទៃមេឃភ្លឺ គឺជាពណ៌ដែលសមស្របនឹងយកមកលាបក្នុងបន្ទប់ទឹកខ្លាំងបំផុត ។
*ផ្ទះបាយ (ធាតុឈើ) ៖ ប្រៀបដូចជាថ្លើមរបស់ផ្ទះដែរ ដែលយើងត្រូវជ្រើសរើសប្រើពណ៌មើលទៅទាក់ទាញភ្នែក និងស័ក្តិសមដល់ការចម្អិនអាហារ ។ យើងសូមណែនាំឲ្យលោកអ្នកលាបជញ្ជាំងដោយប្រើពណ៌ស ជាមួយពណ៌បៃតង និងពណ៌ឈើធម្មជាតិបន្តិច ជាការប្រសើរ ៕
ចែករំលែកព័តមាននេះ