CMAC ទទួលបានជំនួយថវិកាបន្ថែមសម្រាប់ដោះមីន ២០១៨
- ភ្នំពេញ
រាជធានីភ្នំពេញ ៖ លោក ហេង រតនា ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន និងជាអគ្គនាយក មជ្ឈមណ្ឌលសកម្មភាពកំចាត់មីនកម្ពុជា…
រាជធានីភ្នំពេញ ៖ លោក ហេង រតនា ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន និងជាអគ្គនាយក មជ្ឈមណ្ឌលសកម្មភាពកំចាត់មីនកម្ពុជា…
រាជធានីភ្នំពេញ ៖ លោក ហេង រតនា ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន និងជាអគ្គនាយក មជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា (CMAC) បានឱ្យដឹងថា នៅថ្ងៃសុក្រ ទី២៩ ខែធ្នូ ឆ្នាំ២០១៧ ត្រូវនឹងថ្ងៃទី ១២កើត ខែបុស្ប ឆ្នាំរកា ព.ស ២៥៦១ រូបលោកបានចុះហត្ថលេខាជាមួយលោក Paul McCarthy ប្រធានអង្គការ APOPO នៅកម្ពុជា ដើម្បីទទួលជំនួយថវិកាចំនួនជាង១៧ម៉ឺនដុល្លារអាមេរិកក្នុងការគាំទ្រសកម្មភាពកណ្តុរហិតមីន ដែលត្រូវប្រតិបតិ្តការបោសសំអាតគ្រាប់មីន ស្ថិតនៅភូមិសាស្ត្រខេត្តសៀមរាប ដែលគំរោងនេះមានរយៈពេល១២ខែ គិតចាប់ផ្តើមពីខែមករា ឆ្នាំ២០១៨ តទៅ។
សូមបញ្ជាក់ថា អង្គការ APOPO មានមូលដ្ឋាននៅប្រទេសប៊ែលហ្ស៊ិក ហើយសត្វកណ្តុរបានបង្កាត់នៅទីពិសោធន៍នៃប្រទេសតង់សង់ញៀ។ ការដោះមីនរបស់សត្វកណ្តុរ គឺគ្រាន់តែឱ្យសញ្ញាចំណុចសង្ស័យ មានជាតិផ្ទុះ រីឯការដោះមីនពិតប្រាកដតែម្តង គឺអ្នកជំនាញដោះមីនត្រូវប្រើឧបករណ៍រាវមីន និងបោសសំអាតតែម្តង។
អគ្គនាយក CMAC បានបន្តថា៖ «កណ្តុរដោះមីនហិតរកក្លិនជាតិផ្ទុះ រីឯឧបករណ៍រាវមីនរកស្រូបជាតិដែក!! ជាមួយចំនួនថវិកានេះ ស៊ីម៉ាក់រំដោះដីចំការមីនបានចំនួនប្រមាណ៨០ហិចតា»។ លោក ហេង រតនា ក៏ឆ្លៀតយកឱកាសឆ្នាំថ្មី ឆ្នាំសកល ២០១៨ ប្រសិទិ្ធពរជ័យ សេរីបវរ ជូនចំពោះមន្ត្រីអង្គភាព CMAC គ្រប់លំដាប់ថ្នាក់ទាំងអស់ សូមជួបប្រទះតែសេចក្តីសុខ សុវតិ្ថភាពក្នុងការបំពេញភារកិច្ចជូនជាតិ និងប្រជាជន និងសូមទទួលជោគជ័យក្នុងភារកិច្ចថ្មីៗទៀត ព្រមទាំងមានសុភមង្គល និងសុខភាពបរិបូរនៅគ្រប់ក្រុមគ្រួសារ។
សូមបញ្ជាក់ថា អង្គការអាប៉ូប៉ូ បាននិយាយក្នុងសេចក្តីប្រកាសព័ត៌មានមួយដែលបង្ហោះលើទំព័រហ្វេសប៊ុករបស់ខ្លួនថា កាលពីខែមិថុនា ឆ្នាំ២០១៦ ថាការធ្វើការជាមួយ CMAC កន្លងមក គឺមានសត្វកណ្តុរអាហ្វ្រិក១៤ក្បាល បានចាប់ផ្តើមហិតរកគ្រាប់មីន និងយុទ្ធភណ្ឌមិនទាន់ផ្ទុះនៅកម្ពុជា ។ ដោយប្រើឃានវិញ្ញាណដ៏ពូកែរបស់វា សត្វកកេរទាំងនេះអាចរកឃើញរំសេវផ្ទុះទាំងលោហៈ ទាំងប្លាស្ទិក ហើយមិនដូចសត្វឆ្កែទេ សត្វកណ្តុរគឺស្រាលមិនធ្វើឲ្យមីនផ្ទុះទេ។
អង្គការអាប៉ូប៉ូបានចាប់ផ្តើមបង្ហាត់សត្វកណ្តុរដំបូងបង្អស់ឲ្យដោះមីននៅប្រទេសតង់ហ្សានី ក្នុងឆ្នាំ២០០៨ និងបានបោសសម្អាតចំការមីនដោយជោគជ័យនៅប្រទេសម៉ូហ្សំប៊ិក និងប្រទេសអង់ហ្គោឡា នៅឆ្នាំ២០១០។ បន្ទាប់មកនៅខែវិច្ឆិកា ឆ្នាំ២០១៣ អង្គការនេះ ទទួលបានការអនុញ្ញាតឲ្យចាប់ផ្តើមសាកល្បងនៅប្រទេសកម្ពុជា ដែលជាប្រទេសមួយក្នុងចំណោមប្រទេសរងគ្រោះដោយគ្រាប់មីនច្រើនបំផុតនៅក្នុងពិភពលោក និងទទួលបានលទ្ធផលល្អប្រសើរកន្លងមក៕
ចែករំលែកព័តមាននេះ