រាជធានីភ្នំពេញ ៖ ចប់កម្មវិធីការពារសន្តិសុខក្នុងរាជធានីភ្នំពេញក្នុងសម័យប្រជុំកំពូលអាស៊ានភ្លាម ស្នូរបាញ់អនាធិបតេយ្យក៏ផ្ទុះឡើងវិញភ្លាមដែរ ។ ជាក់ស្តែង ខ្មាន់កាំភ្លើងម្នាក់បានបាញ់ចំនួន៥គ្រាប់ជាបន្តបន្ទាប់រួចឡើងជិះរថយន្តគេចខ្លួនបាត់ដោយសុវត្ថិភាពក្រោយពីជននោះយកកែវគប់ក្បាលបុរសម្នាក់ខណៈពេលកំពុងផឹកស៊ីជួបជុំមិត្តភក្តិក្នុងហាងលក់សាច់ក្លែមមួយយីហោហិលអិុនអិុន ដែលមានទីតាំងផ្ទះលេខ១៩បេ ផ្លូវលេខ២២៨ សង្កាត់បឹងរាំង ខណ្ឌដូនពេញ រាជធានីភ្នំពេញ កាលពីវេលាម៉ោង១១ និង៣០នាទីយប់ថ្ងៃទី២១ វិច្ឆិកា ។
ប្រភពព័ត៌មាននៅកន្លែងកើតហេតុបានឱ្យសមត្ថកិច្ចដឹងថា មុនពេលកើតហេតុមានបុរសពីរក្រុមដែលម្ខាងៗមានគ្នា៧ទៅ៨នាក់ ក្នុងនោះពួកគេក៏មាននារីរូបស្អាតអង្គុយកំដរផងដែរ បានចូលផឹកស៊ីក្នុងហាងលក់គ្រឿងក្លែមយីហោ«ហិលអិុនអិុន» និងនាំគ្នាផឹកស៊ីញ៉ែយ៉ាងសប្បាយ ហើយអង្គុយតុក្បែរគ្នាទៀត ។ លុះដល់ម៉ោងជាង១១យប់ម្ខាងៗស្រវឹងធ្លាក់ភ្នែកក៏ចាប់ផ្តើមមានទំនាស់ពាក្យសម្តីនឹងគ្នា ប៉ុន្តែពេលនោះត្រូវបានម្ចាស់ហាងចេញមុខមកអង្វរសុំឱ្យភាគីទាំងពីរយល់អធ្យាស្រ័យគ្នាបញ្ចប់រឿង និងបន្តផឹកស៊ី ។
ស្រាប់តែនៅវេលាម៉ោង១១និង៣០នាទីយប់ភាគីម្ខាងបានយកកែវស្រាគប់ក្បាលបុរសម្នាក់ដែលអង្គុយតុក្បែរគ្នា បណ្តាលឱ្យបែកហូរឈាមប្រឡាក់ពេញអាវ ហើយពេលនោះក៏មានការភ្ញាក់ផ្អើលពេញហាងរួចម្ខាងៗនាំគ្នាជះស្រាដាក់គ្នា និងប្រតាយប្រតប់គ្នាផងដែរ ដោយបញ្ចេញកំហឹងដាក់គ្នា ។
ដោយឃើញសភាពការមិនល្អ ភាគីម្ខាងដែលបង្កហិង្សាមុន បាននាំគ្នាដើរចេញមកខាងក្រៅហាង ហើយចូលក្នុងរថយន្តម៉ាកកាមរីហាយប្រីត ស៊េរី២០០៨ ពណ៌ទឹកប្រាក់ និងបានបាញ់គំរាមដាក់ភាគីម្ខាងទៀតជាបន្តបន្ទាប់រហូតដល់៥គ្រាប់ ទើបបើករថយន្តគេចតាមបណ្តោយផ្លូវលេខ២២៨ ឆ្ពោះទៅទិសខាងលិចគេចខ្លួនដោយសុវត្ថិភាព គ្មានរំខានដល់សមត្ថកិច្ចណាម្នាក់ឡើយ ។
សមត្ថកិច្ចមូលដ្ឋានមួយរូបនិយាយក្នុងលក្ខខណ្ឌសុំមិនបញ្ចេញឈ្មោះដោយខ្លាចមេបកសក្តិនោះបានលួចប្រាប់ថា បុរសម្នាក់ដែលត្រូវខ្មាន់កាំភ្លើងគប់មួយកែវបែកក្បាល និងបាញ់គំរាម៥គ្រាប់ទៀត នោះមានឈ្មោះប៊ុន ហុង អាយុ៣៣ឆ្នាំ មុខរបរទិញអេតចាយតាមរោងចក្រ ស្នាក់នៅផ្ទះលេខ៥២ ផ្លូវលេខ១៦៨ សង្កាត់អូរឫស្សីទី២ ខណ្ឌ៧មករា ជននេះរបួសលើចិញ្ចើមខាងឆ្វេង ។ នៅកន្លែងកើតហេតុកងរាជអាវុធហត្ថខណ្ឌដូនពេញរកឃើញសំបកគ្រាប់កាំភ្លើងម៉ាកប៉េអាកុលចំនួន៣សំបក ហើយលេខរថយន្តរបស់ខ្មាន់កាំភ្លើងត្រូវគេស្គាល់និងកំពុងធ្វើការស្រាវជ្រាវ ។
លោកសុខ សម្បត្តិ អភិបាលខណ្ឌដូនពេញបានឱ្យកោះសន្តិភាពដឹងតាមទូរស័ព្ទនៅព្រឹកថ្ងៃទី២២ វិច្ឆិកានេះថា ទាក់ទិននិងប្រើអំពើហិង្សាវាយតប់គ្នា និងបាញ់ជាច្រើនគ្រាប់នៅហាងលក់គ្រឿងក្លែមហិលអិុនអិុន ក្នុងអាណាចក្ររបស់លោកនេះ លោករង់ចាំទទួលលទ្ធផលការចុះអង្កេត និងរបាយការណ៍របស់សង្កាត់ និងលោកមេប៉ុស្តិ៍បឹងរាំង ។ លោកបន្ថែមថា ហាងនេះប្រឈមនិងការបិទបណ្តោះអាសន្ន ព្រោះគ្មានច្បាប់អាជីវកម្ម និងមិនគោរពតាមរបាយការណ៍សាលារាជធានីភ្នំពេញ បណ្តាលឱ្យមានការបាញ់បោះសេរី ។តាមពិតទៅម្ចាស់ហាងនិមួយៗមិនចង់ឱ្យមានការបាញ់បោះអាក្រក់បែបនេះទេ ។ មនុស្សកាចចូលផឹកទេ ដែលអាក្រក់។
ចែករំលែកព័តមាននេះ