ខេត្តមណ្ឌលគិរី ៖ ប្រជាពលរដ្ឋជនជាតិព្នងរស់នៅក្នុងឃុំប៊ូស្រា ស្រុកពេជ្រាដា ចំនួន៨០គ្រួសារ កើតទុក្ខមិនសុខចិត្តបាននាំគ្នាផ្តិតមេដៃដាក់ពាក្យបណ្តឹងតាមរយៈសមាគមអាដហុក ខេត្តមណ្ឌលគិរី ដើម្បីសុំការអន្តរាគមន៍ពីលោកចាន់ យឿន អភិបាលនៃគណៈអភិបាលខេត្តដោយសារតែមានមន្ត្រីប៉ូលិសច្រកព្រំដែន លួចបន្លំលក់ដីរបស់ពួកគាត់ រួមទាំងដីព្រៃសហគមន៍ និងដីព្រៃកប់ខ្មោចជនជាតិព្នង ទៅឱ្យជនជាតិចាម ។ ដីដែលត្រូវបានប្រជាពលរដ្ឋធ្វើការតវ៉ាទាមទារមកវិញនោះ ស្ថិតនៅជាប់ព្រំដែនប្រទេសកម្ពុជា-វៀតណាមតែម្តង គឺក្នុងភូមិសាស្ត្រឃុំប៊ូស្រា ស្រុកពេជ្រាដា ។
ក្រុមប្រជាពលរដ្ឋដែលបាននាំគ្នាផ្តិតមេដៃសុំឱ្យអាជ្ញាធរខេត្តជួយចាត់វិធានការចំពោះការលក់ដីព្រៃសហគមន៍នោះមកពី៦ភូមិ គឺភូមិឡាំមះ ភូមិពូទយ ភូមិប៊ូស្រា ភូមិពូទឹល ភូមិរាំង ភូមិពូលុ ដែលស្ថិតនៅក្នុងឃុំប៊ូស្រា ស្រុកពេជ្រដា ។លោកតុ ក្លែលអាយុ៤០ឆ្នាំរស់នៅភូមិពូទឹល ឃុំប៊ូស្រា បានឱ្យដឹងថា ពួកគាត់រស់នៅ និងប្រកបរបរធ្វើស្រែចម្ការនៅលើដីនេះ តាំងពីមុនឆ្នាំ ១៩៧៥មកម្លេ៉ះ តពីដូនតារបស់គាត់ ។ លោកថា បងប្អូនជនជាតិព្នង ដែលរស់នៅទីនោះ ខ្លះមានដីចម្ការវិលជុំ ចំនួនចាប់ពី១ ទៅដល់៤ហិកតា និងមានដីព្រៃកប់ខ្មោច ព្រៃអារក្ស ព្រៃអ្នកតា ហើយដីព្រៃទាំងអស់នោះសុទ្ធតែជាកម្មសិទ្ធិរួមរបស់បងប្អូនជនជាតិដើមភាគតិចព្នង ដែលរស់នៅក្នុងឃុំប៊ូស្រា មិនជារបស់បុគ្គលណាម្នាក់ឡើយ ។
ប្រជាពលរដ្ឋទាំង៨០គ្រួសារ ដែលបានដាក់បណ្តឹងជូនសមាគមការពារសិទ្ធិមនុស្សអាដហុក ប្រចាំខេត្តមណ្ឌល គិរី កាលពីថ្ងៃទី១៥ វិច្ឆិកា ២០១២ នេះ បានឱ្យដឹងថា ដីទីតាំងខាងលើ ត្រូវបានប្រជាពលរដ្ឋជនជាតិព្នង រស់នៅតាំងតែពីដើមរៀងមក ដោយអាស្រ័យផលនៅដីនេះជាប្រចាំ ។ ក្នុងពាក្យបណ្តឹងបានបញ្ជាក់ថា រហូតមកដល់ឆ្នាំ១៩៧៥ ក្នុងរបបប៉ុល ពត គេបានជម្លៀសប្រជាពលរដ្ឋទាំងនោះ ឱ្យទៅរស់នៅឯស្រុកកោះញែក ហើយនៅពេលដែលចប់របបប៉ុល ពតនោះ ប្រជាពលរដ្ឋខ្លះក៏បានរស់នៅទីនោះ និងខ្លះទៀតបានវិលត្រឡប់មកលំនៅឋានដើមវិញ និងបានដាំដំណាំហូបផ្លែមួយចំនួនដូចជា ពោត សណ្តែក ស្រូវ ដំឡូងមី និងធ្វើចម្ការវិញជុំ ហើយខ្លះបានសាងសង់ផ្ទះសម្បែងទៀតផង ។ ស្រាប់តែឥឡូវនេះ បែរជាលោកមេម៉ុស្តិ៍ឈ្មោះព្រំ សុខផៃ បានឃុបឃិតគ្នាជាមួយបក្សពួកយកដីរបស់ប្រជាពលរដ្ឋ ដែលធ្លាប់រស់នៅអាស្រ័យផលទៅលក់ ឱ្យជនជាតិចាមទៅវិញ ។ ពេលនេះជនជាតិចាមទាំងនោះ កំពុងតែកាប់ឆ្ការព្រៃកប់ខ្មោច ព្រៃអារក្សអ្នកតាអស់គ្មានសល់ទេ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ