រាជធានីភ្នំពេញ ៖ ក្រោយការប្រកួតប្រជែងយ៉ាងស្វិតស្វាញ និងឆ្លងកាត់វគ្គជម្រុះជាច្រើនតង់នោះ ពេលនេះកម្មវិធីប្រឡងចម្រៀងដ៏ធំមួយ «សំនៀងឯក» ខារ៉ាប៉ាវរបស់ស្ថានីយទូរទស្សន៍បាយ័ន បានរកឃើញអ្នកឈ្នះលើកពានពីកម្មវិធីនេះ កាលពីរាត្រីថ្ងៃទី៣០ ខែធ្នូ ឆ្នាំ២០១៧នេះ។
ម្ចាស់ពានកម្មវិធីប្រឡងចម្រៀង «សំនៀងឯក» គឺបានទៅលើបេក្ខនារី ហ៊ុន សុរន្ត ដែលកញ្ញាមកពីខេត្តព្រៃវែង និងជាកូនក្រុមរបស់អ្នកចម្រៀងលំដាប់កំពូលអ្នកនាង ហ៊ឹម ស៊ីវន ។ សម្រាប់ពានរង្វាន់ដែលបេក្ខនារីឈ្នះពីកម្មវិធីនេះ គឺទទួលបាននូវវិញ្ញាបណ្ណប័ត្រមួយ, ទឹកប្រាក់៥០លានរៀល និងពានចំនួន១ផងដែរ។
សម្រាប់បេក្ខនារី និងបេក្ខជនបួនរូបផ្សេងទៀត ក៏ទទួលបានវិញ្ញាបណ្ណប័ត្រម្នាក់មួយ ទឹកប្រាក់សម្រាប់បេក្ខនារីលេខ ២ ចំនួន ៣០ លានរៀល, បេក្ខជនលេខ៣ ចំនួន ២០លានរៀល និងបេក្ខជនមួយរូបទៀតដែលទទួលបានពានកិត្តិយស ក៏ទទួលបាននូវទឹកប្រាក់ចំនួន ១០ លានរៀលផងដែរ។
ក្នុងកម្មវិធីនោះផងដែរ ក៏មានវត្តមានលោកស្រី ហ៊ុន ម៉ាណា អគ្គនាយិកាស្ថានីយទូរទស្សន៍បាយ័ន និងវត្តមានលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ។
បេក្ខនាររីជ័យលាភី កញ្ញា ហ៊ុន សុរន្ត ទទួលបានការបោះឆ្នោតពីមហាជនសរុប ៦.៤៣១ សម្លេង នាំមុខបេក្ខនារីដែលបានចំណាត់លេខ២ គឺកញ្ញា ចាន់ស៊ីជីង ដែលទទួលបានចំនួន ៦.៤០៤សម្លេង ។
សូមចូលរួមអបអរសារទរអ្នកព្រៃវែង ដែលទទួលបានជ័យជំនះនៃការប្រកួតចម្រៀងដ៏ធំមួយនេះ៕
ចែករំលែកព័តមាននេះ