ខេត្តកំពត ៖ ដើម្បីចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ ក៏ដូចជាការបំផុសភ្នាត់គំនិតស្មារតីក្នុងការចូលរួមគោរពអនុវត្តច្បាប់ ស្ដីពីចរាចរណ៍ផ្លូវគោក ឲ្យបានទូលំទូលាយដល់ពលរដ្ឋទូទៅ ។ នៅព្រឹកថ្ងៃទី២៩ ខែធ្នូ…
ខេត្តកំពត ៖ ដើម្បីចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ ក៏ដូចជាការបំផុសភ្នាត់គំនិតស្មារតីក្នុងការចូលរួមគោរពអនុវត្តច្បាប់ ស្ដីពីចរាចរណ៍ផ្លូវគោក ឲ្យបានទូលំទូលាយដល់ពលរដ្ឋទូទៅ ។ នៅព្រឹកថ្ងៃទី២៩ ខែធ្នូ ឆ្នាំ២០១៧ ។ រដ្ឋបាលខេត្តកំពត ក្រោមកិច្ចចូលរួមរៀបចំដោយមន្ទីរសាធារណៈការ និងដឹកជញ្ជូនខេត្ត និងនគរបាលចរាចរណ៍ខេត្ត ។ បានធ្វើយុទ្ធនាការផ្សព្វផ្សាយស្ដីពី «ការអនុវត្តរឹតបន្តឹង ការពាក់មួកសុវត្ថិ» ។
ក្នុងគោលបំណងពញ្ញាក់ស្មារតីអ្នកប្រើប្រាស់ផ្លូវ និងលើកកម្ពស់ការយល់ដឹង ដើម្បីបង្កើនការពាក់មួកសុវត្ថិភាព ក្នុងចំណោមពលរដ្ឋអ្នកបើកបរម៉ូតូ ពិសេសនាឱកាសមុនពិធីបុណ្យចូលឆ្នាំសកលឆ្នាំ២០១៨ ខាងមុខនេះចូលមកដល់ ។
ជាមួយនឹងឱកាសនេះ ក៏មានវត្តមាន លោក ចាន់ ចេស្ដា អភិបាល នៃគណៈអភិបាលខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត បានចូលរួមដើម្បីឲ្យយុទ្ធនាការនេះកាន់តែមានការយកចិត្តទុកដាក់ខ្ពស់ថែមទៀតផងដែរ ។
លោក ចាន់ ចេស្ដា បានធ្វើការសម្ភាសន៍ស្វែងយល់ព្រមទាំងបានអប់រំណែនាំដល់ប្រជាពលរដ្ឋអ្នកបើកបរម៉ូតូ និងអ្នករួមដំណើរជាមួយ ដែលខកខានពុំមានពាក់មួកសុវត្ថិភាពលើដងផ្លូវ ។ ដោយលោកអភិបាលខេត្តបានគូសបញ្ជាក់ថា ការផ្ដល់មួកសុវត្ថិភាពនាពេលនេះ គឺមិនមែនជាថ្នូរលក់ ឬទិញទៅនឹងប្រាក់ ដែលនគរបាលចរាចរណ៍ផាកពិន័យនោះទេ ។
ប៉ុន្តែការផ្ដល់មួកសុវត្ថិភាពនាពេលនេះ គឺជាយុទ្ឋនាការ នៃការអនុវត្តទៅតាមស្មារតីណែនាំរបស់គណៈកម្មាធិការជាតិសុត្ថិភាពចរាចរណ៍ផ្លូវគោក ក៏ដូចជាក្រសួងសាធារណៈការ និងដឹកជញ្ជូន និងការចូលរួមយកចិត្តទុកដាក់របស់អាជ្ញាធរខេត្តតែប៉ុណ្ណោះ ។
ក្នុងបំណងដើម្បីរួមចំណែកផ្សព្វផ្សាយណែនាំ និងជំរុញពញ្ញាក់ស្មារតីដល់ប្រជាពលរដ្ឋយើងឲ្យមានការភ្ញាក់រឭកបន្ថែមទៀត ក្នុងការចូលរួមគោរពច្បាប់ចរាចរណ៍ផ្លូវគោក ។ ពិសេសការបង្កើនការពាក់មួកសុវត្ថិភាពក៏ដូចជាការលើកកម្ពស់ការយល់ដឹង ពីផលប៉ះពាល់ នៃគ្រោះថ្នាក់ចរាចរផ្លូវគោក ដែលបច្ចុប្បន្ន សង្គមក៏ដូចជារាជរដ្ឋាភិបាលយើងមានការបារម្ភ និងយកចិត្តទុកដាក់យ៉ាងខ្លាំង ។
ក្នុងចំណោមគ្រោះថ្នាក់ចរាចរតាមរយៈការធ្វើដំណើរដោយមធ្យោបាយម៉ូតូ សង្កេតឃើញថា បាននាំមកនូវផលវិបាកធ្ងន់ធ្ងរភាគច្រើន គឺដោយសារការប៉ះទង្គេចទៅលើក្បាល និងខួរក្បាលពីការបោក ឬប៉ះទង្គេច ដែលអាចឈានដល់ពិការ ឬស្លាប់បានដោយសារមិនបានពាក់មួកសុវត្ថិភាពឲ្យបានត្រឹមត្រូវ ។
លោក ចាន់ ចេស្ដា ក៏បានណែនាំ និងអំពាវនាវផងដែរ ដល់ប្រជាពលរដ្ឋទូទៅ ត្រូវមានស្មារតីភ្ញាក់រឭកឡើងដើម្បីចូលរួមគោរពច្បាប់ចរាចរណ៍ទាំងអស់គ្នា ចៀសវាងការគោរពខ្លាចតែនគរបាលចរាចរណ៍ ហើយមិនបានគោរពច្បាប់ត្រឹមត្រូវ ដែលនាំឲ្យជួបគ្រោះថ្នាក់ និងនាំមកផលវិបាកដល់គ្រួសារ និងសង្គមជាតិយើង ។ ព្រោះថាការធ្វើដំណើរដោយម៉ូតូបានពាក់មួកសុវត្ថិភាពត្រឹមត្រូវ និងគោរពច្បាប់ចរាចរណ៍ គឺដើម្បីការពារជីវិតខ្លួនឯង និងគ្រួសារព្រមទាំងអ្នកដទៃ ។
សូមបញ្ជាក់ថា ៖ យុទ្ធនាការនៃកម្មវិធីនេះមួកសុវត្ថិភាពចំនួន៥០០មួក រួមនិងឯកសារច្បាប់ និងខិតប័ណ្ណបទបញ្ញត្តិសំខាន់ៗ ស្ដីពីចរាចរណ៍ផ្លូវគោករាប់ពាន់សន្លឹក និងក្បាល (សៀវភៅ) ដែលផ្ដល់ដោយក្រសួងសាធារណៈការ និងដឹកជញ្ជូន សម្រាប់ផ្សព្វផ្សាយចែកជូនប្រជាពលរដ្ឋនាឱកាសនោះ ។
ប៉ុន្តែសម្រាប់មួកសុវត្ថិភាពបានបំពាក់ជូនអ្នកបើកបរម៉ូតូ ឬអ្នកជិះជាមួយដែលខកខានពុំមានពាក់មួកសុវត្ថភាពក៏ត្រូវបានផ្ដល់ជូនម្នាក់មួយក្រោយពីសមត្ថកិច្ចបានឃាត់ផាកពិន័យប្រាក់ចំនួន១៥,០០០រៀល ។ នេះគឺគ្រាន់តែជាការដាស់តឿនពញ្ញាក់ស្មារតីបង្កើនឲ្យមានការចូលរួមគោរពច្បាប់ចរាចរណ៍ផ្លូវគោកតែប៉ុណ្ណោះ ៕
ចែករំលែកព័តមាននេះ