ខេត្តកណ្ដាល ៖ យុវជនម្នាក់ត្រូវបាននគរបាលស្រុកមុខកំពូល ចាប់ខ្លួន បន្ទាប់ពីបានធ្វើសកម្មភាពចូលក្នុងគេលួចលុយបានសម្រេចចំនួនពីរលើក ញ៉ាមចូលទៅលួចម្ដងទៀត ម្ចាស់គេទាន់ ហេតុការណ៍នេះកើតឡើងកាលពីម៉ោង៦និង៤០នាទីព្រឹក ថ្ងៃទី២៨ ធ្នូ…
ខេត្តកណ្ដាល ៖ យុវជនម្នាក់ត្រូវបាននគរបាលស្រុកមុខកំពូល ចាប់ខ្លួន បន្ទាប់ពីបានធ្វើសកម្មភាពចូលក្នុងគេលួចលុយបានសម្រេចចំនួនពីរលើក ញ៉ាមចូលទៅលួចម្ដងទៀត ម្ចាស់គេទាន់ ហេតុការណ៍នេះកើតឡើងកាលពីម៉ោង៦និង៤០នាទីព្រឹក ថ្ងៃទី២៨ ធ្នូ ស្ថិតនៅចំណុចបន្ទប់ដេក ក្នុងភូមិស្វាយជ្រុំ ឃុំព្រែកដំបង ស្រុកមុខកំពូល ខេត្តកណ្ដាល។
មន្ត្រីនគរបាលស្រុកបានឱ្យដឹងថា ជនសង្ស័យឈ្មោះ ត្រា សុខទ្រី ភេទប្រុស អាយុ១៦ឆ្នាំ មុខរបរមិនពិតប្រាកដ រស់នៅភូមិស្វាយជ្រុំ ឃុំព្រែកដំបង ស្រុកមុខកំពូល ហើយវត្ថុតាងចាប់យកបានមាន ប្រាក់រៀលចំនួន១៦៦.០០០រៀល ។ ចំណែកជនរងគ្រោះឈ្មោះ ខុន សុធា ភេទប្រុស អាយុ៣២ឆ្នាំ មុខរបរលក់ដូរ រស់នៅភូមិស្វាយជ្រុំ ឃុំព្រែកដំបង ស្រុកមុខកំពូល ។
មន្ត្រីនគរបាលបានបន្តទៀតថា កន្លងមក ជនសង្ស័យធ្លាប់ធ្វើសកម្មភាពចូលលួចប្រាក់ក្នុងផ្ទះជនរងគ្រោះ២លើកមកហើយ តែជនរងគ្រោះមិនដែលចាប់បានទេ សរុបបាត់ប្រាក់អស់ចំនួន ១០០ដុល្លារ និងប្រាក់រៀលប្រហែល៥០ម៉ឺនរៀល។ លុះដល់ថ្ងៃកើតហេតុ ជនសង្ស័យបានដើរចូលផ្ទះជនរងគ្រោះជាលើកទី៣ ដើម្បីលួចប្រាក់ដូចមុនទៀត ហើយចូលទៅក្នុងផ្ទះសំងំក្នុងបន្ទប់ដេករបស់ជនរងគ្រោះ រួចធ្វើសកម្មភាពរើកកាយអីវ៉ាន់ក្នុងបន្ទប់ និងរូតកាបូបស្ពាយយកប្រាក់របស់ជនរងគ្រោះចំនួន១៦៦.០០០រៀល ។
មន្ត្រីនគរបាលបន្តទៀតថា ពេលនោះម្តាយជនរងគ្រោះឈ្មោះ ស៊ុយ គឹមសៀង បានដើរចូលបន្ទប់ជនរងគ្រោះ ក៏ឃើញជនសង្ស័យកំពុងរើពូកបន្តទៀត ពេលនោះជនរងគ្រោះក៏ទូរស័ព្ទរាយការណ៍ទៅសមត្ថកិច្ចប៉ុស្តិ៍ នៅវេលាម៉ោង៧ព្រឹក ហើយសមត្ថកិច្ចប៉ុស្តិ៍ព្រែកដំបងក៏ទៅដល់កន្លែងកើតហេតុ និងឃាត់ខ្លួនជនសង្ស័យបញ្ជូនមកអធិការដ្ឋាននគរបាលស្រុក ដើម្បីកសាងសំណុំរឿងចាត់ការបន្តតាមនីតិវិធីច្បាប់ ៕
ចែករំលែកព័តមាននេះ