ខេត្តមណ្ឌលគិរី ៖ ដំរីទេសចរណ៍មានចំនួន៣១ក្បាលហើយ ដែលបានងាប់ជាបន្តបន្ទាប់ក្នុងរយៈពេល១០ឆ្នាំកន្លងមកនេះ ដែលបានបង្កការព្រួយបារម្ភជាខ្លាំងចំពោះបរិមាណដំរីដែលមានមាឌធំដ៏កម្រ និងកំពុងបម្រើដល់វិស័យទេសចរណ៍នាពេលអនាគត ។ ហើយស្ទើរតែ១០០% ដំរីទេសចរណ៍ទាំងនោះ មិនអាចបង្កើតកូនចៅបាន…
ខេត្តមណ្ឌលគិរី ៖ ដំរីទេសចរណ៍មានចំនួន៣១ក្បាលហើយ ដែលបានងាប់ជាបន្តបន្ទាប់ក្នុងរយៈពេល១០ឆ្នាំកន្លងមកនេះ ដែលបានបង្កការព្រួយបារម្ភជាខ្លាំងចំពោះបរិមាណដំរីដែលមានមាឌធំដ៏កម្រ និងកំពុងបម្រើដល់វិស័យទេសចរណ៍នាពេលអនាគត ។ ហើយស្ទើរតែ១០០% ដំរីទេសចរណ៍ទាំងនោះ មិនអាចបង្កើតកូនចៅបាន ដោយសារតែប្រពៃណីដ៏តឹងតែងរបស់បងប្អូនជនជាតិដើមភាគតិច ។
ព័ត៌មានច្បាស់ការណ៍បញ្ជាក់ថា រយៈពេលប្រហែល១០ឆ្នាំចុងក្រោយនេះ ដំរីស្រុកនៅខេត្តមណ្ឌលគិរី បានងាប់ជាបន្តបន្ទាប់ ខណៈដំរីស្រុកនៅក្នុងខេត្តមួយនេះពុំមានឱកាសក្នុងការបង្កកំណើតថ្មី ដែលធ្វើឱ្យមន្ត្រីជំនាញកំពុងបារម្ភយ៉ាងខ្លាំង ចំពោះការបាត់បង់វត្តមានដំរីស្រុកនាពេលខាងមុខ ។ មន្ត្រីអភិរក្សសត្វដំរី ក៏កំពុងរកវិធីសាស្ត្រដើម្បីស្ដារចំនួនសត្វដំរីឡើងវិញ ប៉ុន្តែក្រុមមន្ត្រីជំនាញខាងសត្វដំរីថា មានសង្ឃឹមតិចតួចប៉ុណ្ណោះ គ្រាដែលសត្វដំរីទាំងនោះមានវ័យកាន់តែជរាទៅហើយមិនអាចមានលក្ខណៈគ្រប់គ្រាន់ដើម្បីបន្តពូជបាន ។
ប្រធានអង្គការសត្វដំរីខេត្តមណ្ឌលគិរីលោក ឃុន ឌីយូ៉ន បានឱ្យដឹងថា ក្នុងអំឡុងឆ្នាំ២០០៧នៅខេត្ត មណ្ឌលគិរី មានចំនួនដំរីស្រុករហូតដល់៧៣ក្បាល តែវាបានងាប់ជាបន្តបន្ទាប់ដោយសារជម្ងឺ និងអាយុ កាលរបស់វាដោយបច្ចុប្បន្ននៅសល់ប្រហែល៤២ក្បាល ឬអាចក្រោមនេះហើយដំរីស្រុកដែលនៅសល់ក្នុងខេត្តមណ្ឌលគិរី គឺមានវ័យចាស់ៗអស់ហើយ ដែលវ័យរបស់ពួកវាពិបាកនិងមានលទ្ធភាពបង្កកំណើតបានណាស់ ។
លោកបញ្ជាក់ថា ក្នុងចំណោមដំរីទាំង៤២ក្បាលក្នុងខេត្តមណ្ឌលគិរី ដែលនៅរស់ វាមានអាយុចន្លោះចាប់ពី៣៨ឆ្នាំ ទៅ៨០ឆ្នាំ ក្នុងនោះដំរីញីភាគច្រើន គឺមានវ័យចំណាស់ជាងដំរីឈ្មោល ដែលមិនអាចបង្កកំណើតបាន ។ កន្លងមកខាងអង្គការសត្វដំរីធ្លាប់បានសិក្សាយកមេជីវិតរបស់ដំរីមកពីប្រទេសថៃ មកចាក់បញ្ចូលដំរីញីទាំងនោះ ដើម្បីឱ្យវាបង្កកំណើត តែត្រូវបានបរាជ័យដោយសារដំរីញីនៅខេត្តមណ្ឌលគិរីនេះចូលដល់វ័យចាស់ជរាអស់ទៅហើយ ។
លោកប្រធានអង្គការសត្វដំរីខេត្តមណ្ឌលគិរីបន្ថែមថា គិតសម្រាប់តែក្នុងឆ្នាំ២០១៧នេះ នៅក្នុងខេត្ត មណ្ឌលគិរី គឺមានដំរីស្រុក៥ក្បាលហើយដែលបានងាប់ ក្នុងនោះគឺមាន១ក្បាលត្រូវសមត្ថកិច្ចបាញ់សម្លាប់ ដោយសារវាចុះប្រេង មានភាពកាចសាហាវវាយប្រហារមកលើភូមិអ្នកស្រុកមិនអាចគ្រប់គ្រងបាន ទើបឈានដល់ការបាញ់សម្លាប់ ។ ចំណែកដំរីចុងក្រោយដែលបានងាប់ក្នុងខេត្តមណ្ឌលគិរី គឺជាដំរីញី១ក្បាល មានវ័យ៨៥ឆ្នាំនៅភូមិពូទ្រូក្រោម ឃុំសែនមនោរម្យ ស្រុកអូររាំង ។ រីឯមូលហេតុដែលវាងាប់គឺបណ្ដាលមកពីអាកាសធាតុចុះត្រជាក់ខ្លាំងពេក បូករួមទាំងវ័យរបស់វាចំណាស់ផងនោះមិនអាចទប់ទល់ជាមួយអាកាស ធាតុត្រជាក់បាន ។ លោកថាទោះបីមានការជួយសង្គ្រោះពីសំណាក់មន្ត្រី អង្គការសត្វដំរីខេត្តមណ្ឌលគិរីចំនួន២ថ្ងៃយ៉ាងណាក្ដី តែមិនអាចសង្គ្រោះជីវិតដំរី មីឡុត បានឡើយដោយវាបានងាប់កាលពីល្ងាចថ្ងៃទី២២ ធ្នូ ២០១៧នេះ ។
លោក ឃុន ឌីយ៉ូន បញ្ជាក់ទៀតថា សត្វដំរីស្រុកដែលបានងាប់ជាបន្តបន្ទាប់នៅខេត្តមណ្ឌលគិរីនារយៈ ពេល១០ឆ្នាំចុងក្រោយនេះ គឺស្ទើរទាំងស្រុងងាប់ដោយសារជម្ងឺ មានតែ១ក្បាលប៉ុណ្ណោះងាប់ដោយការបាញ់សម្លាប់ ហើយមូលហេតុរួមផ្សំមួយទៀតដែលធ្វើឱ្យសត្វដំរីនៅខេត្តមណ្ឌលគិរី មិនអាចបង្កកំណើតបាន គឺព្រោះដំរីស្រុកទាំងនោះ ភាគច្រើនជាកម្មសិទ្ធិរបស់ជនជាតិភាគតិចព្នង ដែលប្រពៃណីរបស់ជនជាតិព្នង គឺដាច់ខាតមិនឱ្យសត្វដំរីបន្តពូជមុនរៀបការនោះទេ ។ ចំណែកការរៀបការរបស់ពួកវាគឺធ្វើឡើងដូចរៀបការមនុស្សដែរ ដែលធ្វើឱ្យជនជាតិព្នងពុំមានលទ្ធភាពរៀបការឱ្យពួកវា ដូច្នេះហើយទើបដំរីស្រុកនៅខេត្តមណ្ឌលគិរីមានអត្រាថយចុះរហូតមក ៕
ចែករំលែកព័តមាននេះ