រាជធានីភ្នំពេញ ៖ អតីតប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ បានអះអាងតាមរយៈលិខិតមួយថា លោកមិនអាចចូលបំភ្លឺជូនតុលាការតាមការកោះហៅ (ជាលើកទី៣) នោះទេ…
រាជធានីភ្នំពេញ ៖ អតីតប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ បានអះអាងតាមរយៈលិខិតមួយថា លោកមិនអាចចូលបំភ្លឺជូនតុលាការតាមការកោះហៅ (ជាលើកទី៣) នោះទេ ដោយសារតែពេលនេះ លោកកំពុងស្ថិតនៅប្រទេសបារាំង ដើម្បីពិនិត្យសុខភាព។
ការបដិសេធន៍របស់អតីតប្រធានគណបក្សដែលធ្លាប់ឆ្លងកាត់ជាប់ពន្ធនាគារនាពេលកន្លងមកនេះ បន្ទាប់ពីចៅក្រមស៊ើបសួរសាលាដំបូងរាជធានីភ្នំពេញ បានកោះហៅឱ្យលោកចូលទៅតុលាការនៅថ្ងៃទី ១១ ខែមករា ឆ្នាំ២០១៨ ក្នុងនាមជាសាក្សី លើសំណុំរឿង «បទសន្ទិដ្ឋិភាពជាមួយបរទេស» របស់លោក កឹម សុខា មេបក្សប្រឆាំងដែលកំពុងជាប់ឃុំក្នុងពន្ធនាគារត្រពាំងផ្លុង ។
ក្នុងលិខិតរបស់ លោក ម៉ម សូណង់ដូ ដែលសរសេរជូន លោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ ហើយបង្ហោះនៅលើបណ្តាញសង្គមសហ្វេសប៊ុក បានបញ្ជាក់យ៉ាងដូច្នេះថា រូបលោកបានទទួលព័ត៌មានពីបណ្តាញសង្គមហ្វេសប៊ុក អំពីដីកាកោះហៅ (លើកទី៣) របស់សាលារាជធានីភ្នំពេញ ចុះថ្ងៃទី២២ ខែ ធ្នូឆ្នាំ ២០១៧ អញ្ជើញគាត់ធ្វើជាសាក្សី លើសំណុំព្រហ្មទណ្ឌលេខ ៥៦៤២ ចុះថ្ងៃ ទី៣ ខែ កញ្ញាឆ្នាំ ២០១៧ ពីដំណើររឿង សន្ឋិដ្ឋិភាពជាមួយបរទេស ប្រព្រឹត្តដោយលោក កឹម សុខា ។
លោក ម៉ម សូណង់ដូ បានបន្ថែមទៀតថា៖ «ខ្ញុំសូមបញ្ជាក់ និងជម្រាបជូន លោកចៅក្រមជ្រាបថា ខ្ញុំមិនដែលបានទទួលដីកាកោះហៅណាមួយសោះឡើយ ខ្ញុំសូមជម្រាបលោកចៅក្រមមេត្តាជ្រាបថា ខ្ញុំមិនអាចចូលបំភ្លឺតាមការកំណត់បានទេ ព្រោះខ្ញុំកំពុងនៅក្នុងប្រទេសបារាំង ដើម្បីពិនិត្យបញ្ហាសុខភាព »។
ចែករំលែកព័តមាននេះ