ខេត្តបន្ទាយមានជ័យ ៖ លោកឧត្តមសេនីយ៍ឯក ឃុន សំបូរ អគ្គនាយករង នៃអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ បានលើកឡើងថា មានមុខសញ្ញាស្នងការរង១រូប…
ខេត្តបន្ទាយមានជ័យ ៖ លោកឧត្តមសេនីយ៍ឯក ឃុន សំបូរ អគ្គនាយករង នៃអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ បានលើកឡើងថា មានមុខសញ្ញាស្នងការរង១រូប និងមេឃុំ២រូប អាចប្រឈមនឹងផ្លូវច្បាប់ ក្រោយរកឃើញថា ស្នងការរង និងមេឃុំទាំង៣រូប បានបន្តចេញឯកសាររដ្ឋបាលខ្មែរ ដល់ជនបរទេសកាន់កាប់ប្រើប្រាស់ខុសច្បាប់ ក្រោយពេលដែលច្បាប់ធ្វើការហាមឃាត់ បញ្ឈប់មិនឱ្យអាជ្ញាធរមូលដ្ឋាន និងសមត្ថកិច្ចពាក់ព័ន្ធចេញឯកសាររដ្ឋបាលខ្មែរដល់ជនបរទេសខុសច្បាប់ទៀតនោះ ។
ខណៈដែលសមត្ថកិច្ចកម្ពុជា កំពុងតែបើកយុទ្ធនាការលុបចោល និងដកហូតប្រមូលរាល់ឯកសាររដ្ឋបាលខ្មែរ មានភាពមិនប្រក្រតីពីជនបរទេសខុសច្បាប់មកវិញ ដែលបានកំពុងកាន់កាប់ប្រើប្រាស់ ។ ស្នងការរង និងមេឃុំទាំង៣រូប នឹងប្រឈមផ្លូវច្បាប់ លោកអគ្គនាយករងអន្តោប្រវេសន៍ មិនបានបង្ហាញអត្តសញ្ញាណពួកគាត់ ធ្វើការងារនៅក្នុងខេត្តក្រុងណាមួយនោះទេ ។ ក៏ប៉ុន្តែលោកបញ្ជាក់ថា និងបានបញ្ជូនឯកសារសំណុំរឿងទៅ សម្តេចក្រឡាហោម ស ខេង ដើម្បីពិនិត្យមើល និងសម្រេច ។
ការថ្លែងនេះ ក្នុងឱកាសអគ្គនាយករង នៃអគ្គនាយកដ្ឋានអន្តោរប្រវេសន៍ លោកឧត្តមសេនីយ៍ឯក ឃុន សំបូរ តំណាងនាយឧត្តមសេនីយ៍សន្តិបណ្ឌិត សុខ ផល អគ្គនាយក នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ បានធ្វើឡើងក្នុងកិច្ចប្រជុំផ្សព្វផ្សាយ និងអនុវត្តអនុក្រឹត្យលេខ១២៩ របស់រាជរដ្ឋាភិបាល ស្តីការលុបចោល និងការដកហូតឯកសាររដ្ឋបាលខ្មែរ មិនប្រក្រតីពីជនបរទេសនៅខេត្តបន្ទាយមានជ័យ នៅព្រឹកថ្ងៃព្រហស្បត្តិ៍ ១១កើត ខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៨ ខែធ្នូ គ.ស២០១៧ ប្រព្រឹត្តទៅនៅស្នងការស្នងការដ្ឋាននគរបាលខេត្តបន្ទាយមានជ័យ ដោយមានការចូលរួមពី៝ លោក សួន បវរ អភិបាលខេត្តបន្ទាយមានជ័យ អាជ្ញាធរមូលដ្ឋានស្រុក ក្រុង ឃុំ សង្កាត់ អធិការ និងប៉ុស្តិ៍រដ្ឋបាលទាំង៦៥ ។
ក្នុងកិច្ចប្រជុំនោះដែរ អភិបាលខេត្តបន្ទាយមានជ័យ លោក សួន បវរ ក៏បានជំរុញឱ្យ ក្រុមការងារសមត្ថកិច្ចដែលចុះធ្វើការដកហូតឯកសាររដ្ឋបាលខ្មែរ ពីជនបរទេសកំពុងកាន់កាប់មានភាពមិនប្រក្រីធ្វើយ៉ាងណាត្រូវអនុវត្តឱ្យបានត្រឹមត្រូវតាមគោលការណ៍ច្បាប់ ។
លោកក៏បានរំឭកដល់មន្ត្រីអាជ្ញាធរមូលដ្ឋាន និងសមត្ថកិច្ចពាក់ព័ន្ធ ដែលមានតួនាទីចេញឯកសាររដ្ឋបាលខ្មែរ ត្រូវធ្វើឱ្យបានប្រុងប្រយ័ត្ន ជាពិសេសកុំប្រព្រឹត្តអំពើពុករលួយទទួលបានប្រាក់បន្តិចបន្តួចពីការសូកប៉ាន់ ហើយចេញឯកសាររដ្ឋបាលទៅជនបរទេសកាន់កាប់ប្រើប្រាស់ជាអំពើខុសច្បាប់ និងប្រឈមផ្លូវច្បាប់ ។
បើយោងតាមរបាយការណ៍ ស្នងការដ្ឋាននគរបាលខេត្ត លោកឧត្តមសេនីយ៍ត្រី សិទ្ធិ ឡោះ ស្នងការរងទទួលផែនព្រហ្មទណ្ឌ ក្នុងនាមជួសមុខឲ្យ លោកឧត្តមសេនីយ៍ទោ អាត់ ខែម ឱ្យដឹងថា ខេត្តបន្ទាយមានជ័យ បានបញ្ជាក់ថា តាមជំរឿនគិតត្រឹមឆ្នាំ២០១៥ ជនបរទេសអន្តោប្រវេសន៍ស្នាក់នៅដែលបានកាន់កាប់ និងប្រើប្រាស់ឯកសាររដ្ឋបាលខ្មែរ មានចំនួន១៨៦គ្រួសារ ស្មើនឹង៤១៥នាក់ និងជនបរទេសដែលគ្មានឯកសាររដ្ឋបាលខ្មែរ តែស្នាក់នៅយូរមានសរុប៥០គ្រួសារ ស្មើនឹង៨០នាក់ ។ ជនបរទេសស្នាក់នៅធ្វើការងាររយៈពេលវែងមានចំនួនសរុប២៣សញ្ជាតិ ស្មើនឹង១,៣០៩នាក់ ៕
ចែករំលែកព័តមាននេះ