ខេត្តមណ្ឌលគិរី ៖ រមណីយដ្ឋានទឹកជ្រោះដំណាក់ស្តេច ឬទឹកជ្រោះសែនមនោរម្យ មានចម្ងាយប្រមាណ៧គីឡូម៉ែត្រប៉ុណ្ណោះពីរង្វង់មូលគោព្រៃ ស្ថិតនៅភូមិជ្រៃសែន សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី មានទឹកធ្លាក់ច្រើនដំណាក់ អមទៅដោយសម្រស់ព្រៃព្រឹក្សាដ៏ល្អឯកដែលមានទឹកធ្លាក់ខួបប្រាំវស្សា ។
ទឹកជ្រោះនេះជាទីសោយក្រយារបស់អតីតព្រះមហាក្សត្រខ្មែរ ព្រះបរមរតនកោដ្ឋ កាលដែលទ្រង់ទើបបង្កើតខេត្តមណ្ឌលគិរី ដំបូងហើយមានព្រះរាជដំណាក់នៅជិតទីនោះ ទើបជាប់ឈ្មោះ«ទឹកជ្រោះដំណាក់ស្តេច» ។
មគ្គុទេសទេសចរនៅក្រុងសែនមនោរម្យឲ្យដឹងកាលពីពេល ថ្មីៗកន្លងមកថា ភ្ញៀវទេសចរណ៍ដែលទៅលេងកម្សាន្តនៅខេត្តមណ្ឌលគិរី១០០% បានទៅទស្សនានៅទឹកជ្រោះដំណាក់ស្តេច ឬទឹកជ្រោះសែនមនោរម្យ ពោលគឺគ្មានភ្ញៀវណាម្នាក់ដែលរំលងរមណីយដ្ឋានដ៏ស្រល់ស្អាតនេះទេ ។
ទោះជាយ៉ាងណាក្តីផ្លូវជាង១គីឡូម៉ែត្រក្នុងចម្ងាយសរុបជាង៧គីឡូម៉ែត្រ ចូលទៅកាន់ទឹកជ្រោះដំណាក់ស្តេច ឬទឹកជ្រោះសែនមនោរម្យ បានខូចខាតស្ទើរមិនអាចធ្វើដំណើរកើតអស់រយៈពេលជាច្រើនឆ្នាំមកហើយ។ ខណៈទីធ្លានៅជិតមាត់ជ្រោះក៏មានសភាពក្រហេងក្រហូងពិបាកចតយានយន្តគ្រប់ប្រភេទ។ ចំណែកខ្យូសសម្រាប់ភ្ញៀវអង្គុយលេង ក៏ខូចគ្មានសល់ ថែមទាំងមានព្រៃដុះព័ទ្ធជុំជិត ។ ដោយឡែកផ្លូវដើរចុះទៅលេងទឹកនៅផ្នែកខាងក្រោមក៏មិនមានការសាងសង់ឲ្យភ្ញៀវដើរចុះស្រួលនោះដែរ ។
បើយោងតាមរបាយការណ៍ដែលមន្ទីរទេសចរណ៍ខេត្តមណ្ឌលគិរីថា មានភ្ញៀវទេសចរកើនឡើងជារៀងរាល់ឆ្នាំ តែតំបន់រមណីយដ្ឋានជាច្រើនមិនទាន់មានការអភិវឌ្ឍល្អទេ សូម្បីផ្លូវធ្វើដំណើរក៏ពិបាកចេញចូល ហើយនៅកន្លែងខ្លះមិនទាន់មានស្លាក ឬសញ្ញាសម្រាប់សម្គាល់តំបន់ភូមិសាស្ត្ររមណីយដ្ឋានគ្រប់គ្រាន់នៅឡើយ ។
ប្រធានមន្ទីរទេសចរណ៍ខេត្តមណ្ឌលគិរីឲ្យដឹងកាលពីពេលកន្លងទៅថា ភ្ញៀវទេសចរបានកើនឡើងប្រមាណ២២,៨៣% បើប្រៀបធៀបរយៈពេលដូចគ្នាកាលពីឆ្នាំ២០១៦ ។
លោកថា រយៈពេលនៃពិធីបុណ្យអុំទូក អកអំបុក សំពះព្រះខែ គិតចាប់ពីថ្ងៃទី២ដល់ទី៤ ខែវិច្ឆិកានោះ ភ្ញៀវទៅលេងសរុបចំនួន១៣.៧៧២នាក់ ក្នុងនោះភ្ញៀវអន្តរជាតិចំនួន២៩៦នាក់ ។
របាយការណ៍នោះគឺបញ្ជាក់ពីការចាប់អារម្មណ៍កាន់តែច្រើនពីភ្ញៀវទេសចរទៅលេងកម្សាន្តនៅខេត្តមណ្ឌលគិរី និងបានជំរុញឲ្យសេដ្ឋកិច្ចរបស់ប្រជាពលរដ្ឋក្នុងតំបន់មានភាពល្អប្រសើរ ប៉ុន្តែបើក្រឡេកទៅមើលពីការរីកចម្រើននៅតាមតំបន់កម្សាន្តធម្មជាតិដែលខេត្តមួយនេះមាន គឺនៅមានកម្រិតនៅឡើយ ធ្វើឲ្យភ្ញៀវទេសចររអ៊ូរទាំថា ពិបាកទៅលេងនៅលើកក្រោយទៀតណាស់ ។
អ្នកទេសចរក៏ដូចជាប្រជាពលរដ្ឋរស់នៅខេត្តមណ្ឌលគិរី បានស្នើរដល់អាជ្ញាធរខេត្តពិនិត្យមើលពីភាពអវិជ្ជមាននៅតាមតំបន់រមណីដ្ឋានក្នុងខេត្តផង ដោយណែនាំឱ្យមន្ទីរទេសចរណ៍យកចិត្តទុកដាក់អភិវឌ្ឍរមណីយដ្ឋាននានា ដើម្បីទាញភ្ញៀវទេសចរឲ្យទៅលេងខេត្តមណ្ឌលគិរីកាន់តែច្រើន ដើម្បីភាពរីកចម្រើនក្នុងខេត្តតំបន់ភ្នំមួយនេះ ៕
ចែករំលែកព័តមាននេះ