ខេត្តព្រះវិហារ ៖ អាជីវករខ្មែរលក់ដូរនៅលើច្រកទ្វាអានសេះ ខេត្តព្រះវិហារ ព្រំដែនកម្ពុជា-ថៃកំពុងកាក់កប ចំពោះជំនួញផ្សិតឈើ ឬផ្សិតរងាលក់ទៅឲ្យ ប្រជាជនថៃ យកទៅធ្វើជាម្ហូបអាហារដែលជាអាហារដ៏ពេញនិយម ពួកគេបរិភោគក្នុងរដូវលំហើយនេះ ។
អ្នកយកព័ត៌មានលើផ្សារច្រកទ្វាអានសេះអ្នកស្រីថន ស្រីមុំ បានលើកឡើងថា នៅក្នុងរដូវលំហើយ ឬរដូវធ្លាក់ទឹកសន្សើមចន្លោះពីខែវិច្ឆិកាដល់ខែមករាប្រជាជនខ្មែរដែលរស់នៅក្បែរតំបន់ព្រៃភ្នំនៃខេត្តព្រះវិហារ ពិសេសពលរដ្ឋរស់នៅតាមបណ្តោយព្រំដែនកម្ពុជាថៃ បាននាំគ្នាបេះផ្សិតឈើ នេះមកលក់ឲ្យអាជីវករខ្មែរ ដែលកំពុងលក់ដូរនៅ លើផ្សារច្រកទ្វាអានសេះ បន្ទាប់មកអាជីវករនៅទីនោះបានលក់បន្តឲ្យទៅប្រជាជនថៃ ដែលចូលទៅលេងច្រកទ្វាអានសេះ រៀងរាល់ថ្ងៃ បើកច្រកទ្វាក្នុង១សប្តាហ៍មាន៣ថ្ងៃ ។ អ្នកស្រីបន្តថា ប្រជាជនថៃបានពេញនិយមជាមួយនឹងបន្លែធម្មជាតិរបស់ខ្មែរ នឹងបាននាំគ្នាសម្រុកចូលមកទិញបន្លែព្រៃរបស់ប្រជាជនខ្មែរ ទៅតាមរដូវនីមួយៗ ជាក់ស្តែងរដូវលំហើយនេះ អាជីវករខ្មែរមានបន្លែព្រៃដូចជា ផ្សិតឈើ ឬហៅម្យ៉ាងទៀតថាផ្សិតរងា ផ្លែកន្ទួតព្រៃ និងកសិផលកសិកម្ម ផ្សេងៗទៀតជាច្រើនមុខ ។
អាជីវករដដែលលើកឡើងថា តម្លៃផ្សិតឈើដែលលក់ទៅឲ្យប្រជាជនថៃក្នុង១គីឡូក្រាមថ្លៃ៣៥ទៅ៤០បាត ដោយក្នុងមួយថ្ងៃ អាជីវករម្នាក់ៗអាចលក់ផ្សិតនេះ បានរហូតដល់១០០គីឡូក្រាម ទៅ១៥០គីឡូក្រាម នឹងទទួលបានប្រាក់ចំណេញ បានច្រើនគួរសម សម្រាប់ដោះស្រាយជីវភាពប្រចាំថ្ងៃ ។
អ្នកស្រីជៀម សុធា ជាអាជីវករខ្មែរក៏បានលើកឡើងថា ក្រៅពីបន្លែព្រៃផ្សិតឈើប្រជាជនថៃក៏នៅពេញនិយមជាមួយនឹងផ្លែកន្ទួតព្រៃ ផ្លែស្រម៉ ចុងព្រិច ចុងផ្តៅ និងដំណាំកសិកម្ម ដូចជា ដំឡូង ស្វាយ ល្ពៅ ត្រឡាច ព្រោះពួកគេជឿជាក់ថា បន្លែរបស់ខ្មែរទាំងអស់នេះ សុទ្ធតែធម្មជាតិពិតៗ ពុំមានលាយឡំ និងសារធាតុគីមីធ្វើឲ្យប៉ះពាល់ដល់សុខភាពឡើយ ។
ជនជាតិថៃម្នាក់ឈ្មោះរស់ ហៀម បានប្រាប់ថា មូលហេតុដែលប្រជាជនរបស់ពួក គេចូលចិត្តបរិភោគបន្លែព្រៃដែលអាជីវករខ្មែរយកមកលក់លើច្រកទ្វាអានសេះនេះ មិនមែននៅប្រទេសថៃពុំមានបន្លែព្រៃ ដូចកម្ពុជានោះទេ តែនៅប្រទេសថៃតាមតំបន់ព្រៃភ្នំ ជនបទ ប្រជាជនពុំអាចដើររកបេះបន្លែព្រៃ នៅក្នុងព្រៃបាននោះទេ ព្រោះនៅគ្រប់ព្រៃសម្បូរ ទៅដោយ គ្រាប់មីន ទើបប្រជាជនមិនហ៊ានចូលព្រៃបេះបន្លែព្រៃ ខ្លាចប៉ះពាល់អាយុជីវិត ។
សូមបញ្ជាក់ថា ក្នុងមួយថ្ងៃ អាជីវករទាំងអស់ដែលលក់ដូរនៅទីនោះ អាចលក់ផ្សិតឈើនេះ បានចន្លោះពី៥ ទៅ៦តោន ក្នុង១ថ្ងៃ អោយទៅប្រជាជនថៃ នឹងកសិផលជាច្រើនមុខទៀត មានដូចជា ស្វាយ ល្ពៅ ដំឡូងជាដើម ។
គួររំឭកថា ច្រកទ្វាអានសេះខេត្តព្រះវិហារព្រំដែនកម្ពុជាថៃនេះ ពុំទាន់ក្លាយជាច្រកអន្តរជាតិនៅឡើយទេ ដោយបច្ចុប្បន្នច្រកនេះបើកឲ្យដំណើរការ៣ថ្ងៃ ក្នុង១សប្តាហ៍ប៉ុណ្ណោះដោយគិតចាប់ពីថ្ងៃអង្គារដល់ថ្ងៃពុធ សម្រាប់ឲ្យប្រជាជនទាំងពីរធ្វើការដោះដូរទំនិញគ្នាទៅវិញទៅមក ៕
ចែករំលែកព័តមាននេះ