ទីក្រុងសៀងហៃ ៖ ការលូតលាស់នៃពលរដ្ឋថ្នាក់កណ្តាលក្នុងប្រទេសចិន និងការផ្លាស់ប្តូរផ្នែកប្រជាសាស្ត្រផ្សេងៗដូចជា ចំនួនមនុស្សចាស់ជរាកើនឡើង ហើយពលរដ្ឋចាប់ផ្តើមរៀបការ និងយកកូនក្នុងអាយុចាស់ជាងមុន បានធ្វើឲ្យមនុស្សជាច្រើនក្នុងសង្គមចិនចំណាយប្រាក់លើសត្វចិញ្ចឹម ។ យោងតាមការព្យាកររបស់…
ទីក្រុងសៀងហៃ ៖ ការលូតលាស់នៃពលរដ្ឋថ្នាក់កណ្តាលក្នុងប្រទេសចិន និងការផ្លាស់ប្តូរផ្នែកប្រជាសាស្ត្រផ្សេងៗដូចជា ចំនួនមនុស្សចាស់ជរាកើនឡើង ហើយពលរដ្ឋចាប់ផ្តើមរៀបការ និងយកកូនក្នុងអាយុចាស់ជាងមុន បានធ្វើឲ្យមនុស្សជាច្រើនក្នុងសង្គមចិនចំណាយប្រាក់លើសត្វចិញ្ចឹម ។
យោងតាមការព្យាកររបស់ Euromonitor ឲ្យដឹងថា អតិថិជនក្នុងប្រទេសនេះអាចចំណាយប្រាក់ប្រមាណ៧ប៊ីលានដុល្លារសម្រាប់សត្វចិញ្ចឹមរបស់ពួកគេក្នុងឆ្នាំ២០២២ ច្រើនជាង២,៦ប៊ីលានដុល្លារក្នុងឆ្នាំនេះ ខណៈទីផ្សារលូតលាស់ប្រមាណ២០%ក្នុង១ឆ្នាំ។ ទីផ្សារនេះនៅសហរដ្ឋអាមេរិកអាចនឹងធំជាងនេះទៅទៀត ដោយគេព្យាករថា ពលរដ្ឋនឹងចំណាយប្រាក់ប្រមាណ៤៤,៤ប៊ីលានដុល្លារ ប៉ុន្តែវាលូតលាស់តែ២%ប៉ុណ្ណោះក្នុង១ឆ្នាំ ។
តម្រូវការកើនឡើងក្នុងប្រទេសចិន មិនត្រឹមតែជាព័ត៌មានដ៏ល្អសម្រាប់ក្រុមហ៊ុនផលិតចំណីសត្វទេ ប៉ុន្តែក៏សម្រាប់ក្រុមហ៊ុនលក់ចំណីនិងផលិតផលសត្វចិញ្ចឹមក្នុងប្រទេសផងដែរ ។ លើសពីនេះ មានការចាប់ផ្តើមបើកដំណើរការហាងកាត់សក់សត្វ និងសណ្ឋាគារសម្រាប់សត្វទៀតផង ។
លោក Liu Yonghao អគ្គនាយកក្រុមហ៊ុន New Hope Group ក្នុងប្រទេសចិន បានកត់សម្គាល់ថា ពលរដ្ឋក្មេងៗកំពុងមានទំនាក់ទំនងកាន់តែជិតស្និទ្ធជាមួយសត្វចិញ្ចឹមរបស់ពួកគេ ។ លោកថា ៖« ទីផ្សារប្រទេសចិនមានសក្តានុពលលូតលាស់យ៉ាងធំ ។ ពលរដ្ឋសុខចិត្តចំណាយប្រាក់ជាច្រើនលើសត្វចិញ្ចឹម ហើយពួកវាបានក្លាយជាផ្នែកមួយនៃគ្រួសារ » ។
ប្រជាប្រិយភាពកើនឡើងនេះ ក៏បានទាក់ទាញក្រុមហ៊ុនក្នុងស្រុក និងបរទេសផងដែរ។ ការលូតលាស់នៃការលក់ផលិតផលសម្រាប់សត្វចិញ្ចឹមបានជំរុញដល់ការនាំចូល និងអាជីវកម្មក្នុងស្រុក ។
ទោះជាយ៉ាងណា និន្នាការនេះទើបតែចាប់ផ្តើមទេក្នុងប្រទេសចិន ។ សត្វចិញ្ចឹមមួយចំនួននៅមិនទាន់ទទួលបានការមើលថែដិតដល់នៅឡើយ ហើយពលរដ្ឋនៅមិនទាន់យល់ដឹងពីការចាក់ថ្នាំបង្ការ ឬការសម្លាប់មេរោគផ្សេងៗទេ ។ ច្បាប់តានតឹងទាក់ទងនឹងការនាំចូលចំណីសត្វ ក៏ជំរុញដល់ទីផ្សារងងឹតផងដែរ ៕
ចែករំលែកព័តមាននេះ