ទីក្រុងវ៉ាស៊ីនតោន ៖ រដ្ឋាភិបាលលោកត្រាំ បានដាក់ទណ្ឌកម្មថ្មីមួយទៀតលើអ្នកដឹកនាំសំខាន់របស់កូរ៉េខាងជើងចំនួន២រូប ខណៈសហរដ្ឋអាមេរិកចង់រឹតត្បិតរាល់ទំនាក់ទំនងហិរញ្ញវត្ថុ ដែលជួយដល់កម្មវិធីផលិតអាវុធនុយក្លេអ៊ែររបស់កូរ៉េខាងជើង ។
ការសម្រេចចិត្តរបស់រតនាគារអាមេរិកនេះ បន្ទាប់ពីមានសេចក្តីសម្រេចពីក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃសុក្រមុន ស្តីពីការដាក់ទណ្ឌកម្មថ្មីលើកូរ៉េខាងជើង ដើម្បីផ្អាកការស្វែងរកថវិការបស់ប្រទេសនេះ ។
លោក Steven Mnuchin រដ្ឋមន្ត្រីរតនាគារ បានថ្លែងក្នុងសេចក្តីប្រកាសកាលពីថ្ងៃអង្គារថា៖ « រតនាគារកំពុងដាក់គោលដៅលើអ្នកដឹកនាំកម្មវិធីផលិតអាវុយនុយក្លេអ៊ែររបស់កូរ៉េខាងជើង ដើម្បីបន្ថែមសម្ពាធផ្តាច់ប្រទេសនេះ និងសម្រេចគោលដៅរបស់ឧបទ្វីបកូរ៉េគ្មានអាវុធនុយក្លេអ៊ែរ » ។
វិធានការនេះមានគោលដៅលើមន្ត្រី២រូបដែលចូលរួមអភិវឌ្ឍន៍កម្មវិធីកាំជ្រួចអន្តរទ្វីប រួមមាន Kim Jong Sik និង Ri Pyong Chol។ ជាលទ្ធផល បុគ្គលទាំង២រូបនេះនឹងត្រូវបានហាមឃាត់ក្នុងការទិញ ឬលក់ជាមួយបុគ្គលិក និងអាជីវកម្មនានានៅសហរដ្ឋអាមេរិក ។
ការសម្រេចចិត្តនេះ កើតមានឡើងប៉ុន្មានសប្តាហ៍ក្រោយពីកូរ៉េខាងជើងសាកល្បងកាំជ្រួចរបស់ខ្លួន ។ បន្ទាប់ពីការសាកល្បង អ្នកដឹកនាំប្រទេសនេះ លោក Kim Jong Un និយាយថា ប្រទេសលោកអាចវាយប្រហារសហរដ្ឋអាមេរិកដោយប្រើកាំជ្រួចផ្ទុកសារធាតុនុយក្លេអ៊ែរ ។
លើសពីនេះ រតនាគារអាមេរិកបានដាក់ចូលក្នុងបញ្ជីទណ្ឌកម្មលើធនាគារកូរ៉េខាងជើង៨ និងជនជាតិកូរ៉េខាងជើងប្រមាណ២៤នាក់ទៀត ដែលនៅក្នុងប្រទេសចិន រុស្ស៊ី និងលីប៊ី ។
រតនាគារក៏បានដាក់ទណ្ឌកម្មលើអាជីវករចិនម្នាក់ ក្រុមហ៊ុន និងនាវាពាណិជ្ជកម្មរបស់កូរ៉េខាងជើងជាច្រើនផងដែរ ។
ប្រទេសកូរ៉េខាងជើងបានប្រើប្រាស់បណ្តាញក្រុមហ៊ុនជាច្រើនដើម្បីប្រកបអាជីវកម្មក្នុងប្រទេសចិន និងប្រទេសដទៃទៀត ដើម្បីជៀសវាងការហាមឃាត់ផ្នែកសេដ្ឋកិច្ច ។ ប្រទេសនេះក៏ល្បីល្បាញផ្នែកនាំចេញខុសច្បាប់ និងលាក់បាំងផងដែរ ៕
ចែករំលែកព័តមាននេះ