ខេត្តកំពង់ធំ ៖ ខេត្តកំពង់ធំ ជាទឹកដីទេសចរណ៍ប្រវត្តិសាស្ត្រ និងធម្មជាតិមួយក្នុងចំណោមខេត្តសក្ដានុពលទេសចរណ៍ដទៃទៀតរបស់ព្រះរាជាណាចក្រកម្ពុជា ។ បន្ទាប់ពីប្រាសាទសំបូរព្រៃគុក ត្រូវបានដាក់បញ្ចូលជាបេតិកភណ្ឌពិភពលោក ខេត្តមួយនេះបានទទួលស្វាគមន៍ភ្ញៀវទេសចរជាតិ និងអន្តរជាតិមានកំណើនគួរឲ្យកត់សម្គាល់…
ខេត្តកំពង់ធំ ៖ ខេត្តកំពង់ធំ ជាទឹកដីទេសចរណ៍ប្រវត្តិសាស្ត្រ និងធម្មជាតិមួយក្នុងចំណោមខេត្តសក្ដានុពលទេសចរណ៍ដទៃទៀតរបស់ព្រះរាជាណាចក្រកម្ពុជា ។ បន្ទាប់ពីប្រាសាទសំបូរព្រៃគុក ត្រូវបានដាក់បញ្ចូលជាបេតិកភណ្ឌពិភពលោក ខេត្តមួយនេះបានទទួលស្វាគមន៍ភ្ញៀវទេសចរជាតិ និងអន្តរជាតិមានកំណើនគួរឲ្យកត់សម្គាល់ ។
បើតាមប្រធានមន្ទីរទេសចរណ៍ខេត្តបានរាយការណ៍ថា សម្រាប់ឆ្នាំ២០១៧នេះ ខេត្តកំពង់ធំទទួលបានភ្ញៀវប្រមាណជាង៦៣ម៉ឺននាក់ ក្នុងនោះភ្ញៀវទេសចរជាតិមានចំនួនជាង៦១,៥ម៉ឺននាក់ កើនឡើង២៣២,២៧% ខណៈភ្ញៀវទេសចរអន្តរជាតិមានចំនួនជាង១,៩ម៉ឺននាក់ កើនឡើង៤,៨%បើធៀបនឹងឆ្នាំ២០១៦ ។
លោក សេង អាន ប្រធានមន្ទីរទេសចរណ៍ខេត្ត បានឲ្យដឹងថា ក្នុងចំណោមភ្ញៀវទេសចរទាំងនោះ ភ្ញៀវដែលបានចូលទស្សនារមណីយដ្ឋានប្រាសាទសំបូរព្រៃគុក គឺមានចំនួនច្រើនជាងគេ រហូតដល់ជាង៥៣,៩ម៉ឺននាក់ ។ ចំណែករមណីយដ្ឋានស្ទឹងជីនិត ទទួលស្វាគមន៍ភ្ញៀវទេសចរចំនួនជាង២ម៉ឺននាក់, រមណីយដ្ឋានទេសចរណ៍បឹងសំរិទ្ធ ចំនួនជាង៦,៦ពាន់នាក់, រមណីយដ្ឋានទេសចរណ៍ភ្នំសន្ទុក ចំនួនជាង៦,៤ម៉ឺននាក់ និងរមណីយដ្ឋានប្រាសាទគុកនគរចំនួន៤.៣៩២នាក់ ។
លោក សេង អាន បានអះអាងថា សន្ទស្សន៍ភ្ញៀវទេសចរដែលបានចូលមកសម្រាកលម្ហែកាយ និងទស្សនាកម្សាន្ដនៅរមណីយដ្ឋានសំខាន់ៗក្នុងខេត្តកំពង់ធំ គឺសុទ្ធតែបង្ហាញនូវការកើនឡើងគួរឲ្យកត់សម្គាល់ ក្នុងនោះរមណីយដ្ឋានទេសចរណ៍ប្រាសាទសំបូរព្រៃគុក ចំនួនភ្ញៀវទេសចរកើនឡើងច្រើនជាងគេ បន្ទាប់ពីតំបន់នោះត្រូវបានដាក់បញ្ចូលក្នុងសម្បត្តិវប្បធម៌បេតិកភណ្ឌពិភពលោក ។
លោកប្រធានមន្ទីរក៏បានអំពាវនាវ និងក្រើនរម្លឹកអាជីវករ និងប្រជាពលរដ្ឋទូទាំងខេត្តកំពង់ធំ ឲ្យចូលរួមលើកកម្ពស់គុណភាពសេវាកម្មទេសចរណ៍ រួមទាំងផ្តល់នូវភាពកក់ក្តៅ ដើម្បីទាក់ទាញភ្ញៀវទេសចរឲ្យមកសម្រាកកម្សាន្ដនៅក្នុងខេត្តកាន់តែច្រើនថែមទៀត សំដៅរួមចំណែកដល់ការលើកកម្ពស់ជីវភាពរស់នៅរបស់ប្រជាពលរដ្ឋ ។
ខេត្តកំពង់ធំមានតំបន់ទេសចរណ៍ជាច្រើនកន្លែង ប៉ុន្តែតំបន់ដែលទាក់ទាញភ្ញៀវទេសចរចូលទៅទស្សនាកម្សាន្ដច្រើនជាងគេមាន៣កន្លែងគឺ រមណីយដ្ឋានប្រាសាទសំបូរព្រៃគុក ស្ថិតនៅភូមិសំបូរ ឃុំសំបូរ ស្រុកសំបូរ និងមានចម្ងាយប្រមាណ៣៥គីឡូម៉ែត្រពីទីរួមខេត្ត។ រមណីយដ្ឋានភ្នំសន្ទុក ស្ថិតក្នុងភូមិកកោះ ឃុំកកោះ ស្រុកសន្ទុក និងមានចម្ងាយ១៧គីឡូម៉ែត្រពីទីរួមខេត្ត និងតំបន់ទេសចរណ៍ស្ទឹងព្រៃប្រស់ ជាស្ទឹងមួយដែលហូរកាត់ខេត្តកំពង់ធំ ស្ថិតក្នុងស្រុកកំពង់ស្វាយ នៅតាមបណ្តោយផ្លូវជាតិលេខ៦ ពីភ្នំពេញទៅសៀមរាប ។ ស្ទឹងនេះជារមណីយដ្ឋានទេសចរណ៍ធម្មជាតិមួយកន្លែងដែលល្បីល្បាញក្នុងខេត្តកំពង់ធំ ។
ក្រៅពីនេះ មានតំបន់ទេសចរណ៍ជាច្រើនកន្លែងទៀតដូចជា ទំនប់ទឹកធ្លាក់៧មករា នៅកំពង់ថ្ម, សួនច្បារនៅទីរួមខេត្ត, បុស្សម្កាក់នៅស្រុកកំពង់ស្វាយ និងទឹកស្រះដងអន្ទាក់ ព្រមទាំងវត្តអារាមដែលមានបារមីស័ក្ដិសិទ្ធិផ្សេងៗទៀត ៕
ចែករំលែកព័តមាននេះ