ធនាគារ​ក្ដាម​កំពុង​រួមចំណែក​លើក​ស្ទួយ​សហគមន៍​អ្នកនេសាទ​សមុទ្រ


ខេត្ត​កែប ៖ កំណើន​នៃ​តម្រូវការ និង​ប្រជា​នេសាទ​កើនឡើង បាន​ធ្វើ​ឲ្យ​ក្ដាមសេះ​កាន់តែ​ខ្សត់ខ្សោយ​ទៅ​ៗ ពិសេស​ការ​នេសាទ​បាន​ក្ដាម​ពង​កូន​យក​មក​ទទួលទាន កង្វះ​ការ​អភិរក្ស និង​ការ​យល់​ដឹង​ពី​ហានិភ័យ​នៃ​មច្ឆា​សមុទ្រ ។ ដើម្បី​ធានា​បាន​នូវ​ការ​ផ្គត់ផ្គង់​ក្ដាមសេះ ក៏​ដូច​ជា​រួមចំណែក​អភិរក្ស​ស្មៅ​សមុទ្រ និង​ផ្កាថ្ម​ផង​នោះ ខេត្ត​បាន​បង្កើត​ធនាគារ​ក្ដាម សម្រាប់​ជួយ​ជ្រោមជ្រែង និង​ជួយ​សម្រួល​ដល់​អ្នកនេសាទ​ដែល​បាន​ចូល​ជា​សមាជិក ។

នាយ​រង​ជលផល​ខេត្ត លោក ធឺ​ន ផល្លា បាន​ប្រាប់​ឲ្យ​ដឹង​ថា ធនាគារ​នេះ​បាន​បង្កើត​ឡើង​តាំងពី​ឆ្នាំ​២០០៨​មក​ម្ល៉េះ ដើម្បី​ជួយ​សម្រួល​ដល់​ប្រជា​នេសាទ​ដែល​បាន​ចូល​ជា​សមាជិក ជា​ពិសេស ជួយ​ឲ្យ​ក្ដាមសេះ​មាន​និរន្តរភាព​នៅ​ក្នុង​សមុទ្រ ។

លោក ធឺ​ន ផល្លា ថ្លែង​ថា ៖ « ធនាគារ​ក្ដាម​ផ្ដល់​ថវិកា​ដល់​សមាជិក​នៅ​ក្នុង​សហគមន៍​អ្នកនេសាទ ដោយ​មិន​គិតការ​ប្រាក់​ទេ ប៉ុន្ដែ​សមាជិក​ទាំងនោះ​នៅ​ពេល​នេសាទ​បាន​ក្ដាមសេះ ពួក​គាត់​ត្រូវ​បាន​កំណត់​ឲ្យ​យក​ក្ដាម​មេ​ពង ក្នុង​១​ខែ​ចាប់ពី​១៥​ទៅ​២០​ក្បាល ដើម្បី​ឲ្យ​ធនាគារ​យើង​យក​ទៅ​ភ្ញាស់​នៅ​ស្ថានីយ​បែប​ធម្មជាតិ » ។ លោក​ថា​៖« នៅ​ពេល​ក្ដាម​នោះ​ដល់​អាយុកាល​អាច​រស់​ដោយ​ខ្លួន​វា​បាន យើង​បាន​យក​វា​ទៅ​លែង​ក្នុង​សមុទ្រ ឲ្យ​រស់នៅ​តាម​ធម្មជាតិ​វិញ ។ ការ​ធ្វើ​ដូច្នេះ មិន​ត្រឹមតែ​ជួយ​រក្សា​ក្ដាមសេះ​ឲ្យ​សម្បូរ​ឡើង​វិញ​ប៉ុណ្ណោះ​ទេ ថែម​ទាំង​ជួយ​អ្នកនេសាទ​យើង​ផង​ដែរ » ។

លោក​លើក​ឡើង​ថា ក្ដាម​មេ​១ វា​មាន​ពង​កូន​រាប់​លាន​ក្បាល ហើយ​បើ​យើង​នាំ​គ្នា​ទទួល​ទាន​ទាំង​ពង​នោះ ថ្ងៃ​អនាគត​នឹង​ខ្សត់​ទៅ​ៗ ។ ជាមួយ​គ្នា​នេះ ការ​អភិរក្ស​ស្មៅ​សមុទ្រ និង​ផ្កាថ្ម ក៏​ជួយ​ឲ្យ​ក្ដាមសេះ​បាន​រស់រាន និង​គេចខ្លួន​បាន​ខ្លះ​ពី​ការ​នេសាទ​ផង​ដែរ ។

ធនាគារ​ក្ដាម​បាន​គិតគូរ​យ៉ាង​ខ្លាំង​ទៅ​លើ​ការ​នេសាទ​ក្ដាម ដរាបណា​គាត់​នៅ​តែ​នេសាទ អីចឹង​ក្ដាម​ធម្មជាតិ​នឹង​អស់ ដូចនេះ ធនាគារ​ក្ដាម​ត្រូវ​តែ​បង្កើត​ការ​ផ្គត់ផ្គង់​ថ្មី​សម្រាប់​ពួក​គាត់​បន្ថែម​ទៀត​ដើម្បី​ការពារ​កុំ​ឲ្យ​អស់​ស្តុក​ក្ដាម ។

លោក ធឺ​ន ផល្លា បាន​បន្ថែម​ថា ៖ «​សម្រាប់​សមាជិក​ធនាគារ​ក្ដាម នៅ​ពេល​គាត់​បាន​ក្ដាម​​ពង​មក គាត់​ផ្ដល់​ឲ្យ​មក​សមាគម​យើង ហើយ​ក្ដាម​មិន​ពង គាត់​យក​ទៅ​លក់​នៅ​ទីណា​ក៏​បាន​ដែរ » ។ លោក​បាន​បញ្ជាក់​ថា ៖«​កន្លង​មក ក៏​មាន​អ្នក​ដែល​មិនមែន​ជា​សមា​ជិក​ធនាគារ បាន​ផ្ដល់​ក្ដាម​ពង​ឲ្យ​មក​យើង​ដែរ តែ​មិន​បាន​ទាំងអស់​ទេ » ។

លោក គី​ង សុ​ផា​នី នាយ​រង​ខណ្ឌ​រដ្ឋបាល​ជលផល​កែប បាន​មាន​ប្រសាសន៍​ថា នៅ​ខេត្ត​កែប ធនាគារ​ក្ដាម មាន​៣​កន្លែង​គឺ នៅ​តំបន់​ផ្សារ​ក្ដាម ឆ្នេរ​អង្កោល និង​អូរ​ក្រសារ ក្នុង​នោះ​រួម​មាន​ទាំង​កន្លែង​អ្នក​ប្រមូល​ទិញ គឺ​គាត់​បាន​ចូលរួម​ប្រស់ក្ដាម​ដើម្បី​ទុក​មួយ​រយៈ​ឲ្យ​វា​ជម្រុះ​ពង​ដែរ នៅ​ពេល​គាត់​ទិញ​មក ។

លោក​ថា ៖« ពាក់ព័ន្ធ​នឹង​ធនាគារ​ក្ដាម​នេះ ជា​រៀង​រាល់​ឆ្នាំ តាម​រយៈ​សហគមន៍​នៃ​ក្រុម​ធនាគារ​ក្ដាម តែងតែ​ប្រមូល​មេ​ក្ដាម​ដែល​ពង​ក្រៅ គឺ​ក្នុង​១​ឆ្នាំ ទទួល​បាន​ប្រមាណ​ជាង​១​ពាន់​គីឡូក្រាម បើ​គិត​ជា​ក្ដាម​ចំនួន​១០​ពាន់​ក្ដាម ដែល​ខាង​សមាជិក​ផ្ដល់​មក​ឲ្យ​ធនាគារ​ក្ដាម ដាក់​ទៅ​ក្នុង​បែ​មួយ​រយៈ​ដើម្បី​ជម្រុះ​ពង » ។

លោក​បាន​បញ្ជាក់​ថា បើ​តាម​ចំនួន​ក្ដាម​ដែល​យើង​ប្រលែង​វិញ យើង​មិន​អាច​វាយតម្លៃ ឬ​តាមដាន​បាន​នៅឡើយ​ទេ ព្រោះ​តាម​វិទ្យាសាស្ត្រ ក្ដាម​រស់នៅ​ពេញវ័យ​មាន​ចំនួន​តិច​បើ​គិត​ជា​ភាគរយ ប៉ុន្តែ​បើ​គិត​ពី​ចំនួន​ក្ដាម វា​នៅ​សល់​រាប់​ពាន់​ក្ដាម​ដែរ ព្រោះ​ចំនួន​ពង អាស្រ័យ​​ទៅ​លើ​ទំហំ​របស់​វា យ៉ាងតិច​បំផុត​ប្រមាណ​៨០​ម៉ឺន ទៅ​១​លាន​ពង​ក្នុង​ក្ដាម​មេ​១ ។

អ្នកលក់​ក្ដាម​នៅ​ផ្សារ​ក្ដាម បាន​ប្រាប់​ថា​សព្វថ្ងៃ ធនាគារ​ក្ដាម​បាន​ជួយ​សម្រួល​ដល់​សមាជិក​សហគមន៍​អ្នកនេសាទ​បាន​ច្រើន ហើយ​ក៏​ជួយ​ផ្គត់ផ្គង់​ដល់​អាជីវករ​លក់​ក្ដាម​បាន​មួយ​ចំណែក​ដែរ ពិសេស​នៅ​ពេល​អាកាសធាតុ​មិន​អំណោយផល ធ្លាក់​ខ្យល់​ខ្លាំង អ្នកនេសាទ​មិន​អាច​ចេញ​ទូក​បាន ។

អ្នកស្រី ណុះ ណា​វី និយាយ​ថា ៖« ធនាគារ​នេះ​មាន​យូរណាស់​ហើយ តែ​អាជីវករ ឬ​អ្នក​នេសាទ​ខ្លះ​មិន​បានដឹង ហើយ​ចាប់តាំងពី​មាន​ធនាគារ​ក្ដាម​នេះ​មក គឺថា ខេត្ត​យើង​អាច​ផ្គត់ផ្គង់​ក្ដាមសេះ​ដល់​ភ្ញៀវ​បាន​គ្រប់គ្រាន់ និង​ពេល​ខ្លះ​ក៏​មាន​អ្នក​មក​ពី​ខាងក្រៅ​ទិញ​ទៅ​លក់​បន្ត​ផង​ដែរ » ។

អាជីវករ​រូប​នេះ​បាន​បញ្ជាក់​ថា ៖« បើសិនជា​មាន​ភ្លៀង មាន​ព្យុះ ជាក់ស្ដែង ដូច​ជា​ខែ​នេះ​អីចឹង យើង​មិន​អាច​ចេញ​ទៅ​រក​នៅ​ឆ្ងាយ​ៗ​បាន​ទេ អីចឹង​ហើយ​យើង​មាន​ក្ដាម​តិចតួច​ណាស់ ប៉ុន្តែ​យើង​នៅ​តែ​អាច​ផ្គត់ផ្គង់​បាន » ។

លោក ធឺ​ន ផល្លា នាយ​រង​ជលផល​ខេត្ត បាន​បន្ថែម​ទៀត​ថា ចាប់តាំងពី​ការ​បង្កើត​ធនាគារ​​ក្ដាម​នេះ​ឡើង​អាច​ថា ក្ដាម​កើនឡើង ។ បច្ចុប្បន្ន​នេះ ធនាគារ​ក្ដាម មាន​សមាជិក​ជាង​៨០​គ្រួសារ ហើយ​យើង​កំពុង​តែ​បន្ត​ស្វែងរក​ថវិកា​ដើម្បី​ធានា​នូវ​ការ​ការពារ បើ​យើង​មិន​ការពារ​ទេ វា​នឹង​អស់​ដោយសារ​កំណើន​អ្នកនេសាទ និង​តម្រូវការ ។

គួរ​បញ្ជាក់​ថា ជលផល​ខេត្ត​កែប​មាន​យន្តការ​ចំនួន​៣ រួម​មាន ៖

១-​បង្កើត​មជ្ឈមណ្ឌល​ធនាគារ​ក្ដាមសេះ​នៅ​តំបន់​ផ្សារ​ក្ដាម ធ្វើ​ជា​រូបសំណាក​ក្ដាម​ពង ដើម្បី​ឲ្យ​ភ្ញៀវ​ទេសចរ និង​ប្រជា​នេសាទ​ដែល​មានចិត្ត​បរិច្ចាគ​ក្ដាម​មេ​ចូល​ក្នុង​ធនាគារ​ក្ដាម ដើម្បី​ឲ្យ​និរន្តរភាព​ក្ដាមសេះ​របស់​យើង​នៅ​តែ​មាន ។

២-​បង្កើត​គោលការណ៍​សម្រាប់​ធនាគារ​ក្ដាម​នៅ​ពេល​មានបុណ្យ​ទាន​ម្ដង​ៗ គឺ​មានការ​ផ្សព្វផ្សាយ​ទៅ​អ្នកនេសាទ​ក្នុង​ការ​បរិច្ចាគ​ក្ដាម ។

៣-​មាន​គោលការណ៍​បញ្ឈប់​ការ​នេសាទ​ក្ដាម​តូច​ៗ ដែល​ប៉ះពាល់​ដល់​កូន​ក្ដាម​ក្នុង​កា​រវិ​វត្ត​នៅ​ថ្ងៃ​ខាង​មុខ តាម​រយៈ​ការ​ផ្សព្វផ្សាយ​ច្បាប់​ស្ដី​ពី​ជលផល និង​ការ​ប្រកាស​ហាម​ឃាត់​​របស់​ជលផល ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ