រាជធានីភ្នំពេញ ៖ តំណាងអយ្យការសាលាដំបូងរាជធានីភ្នំពេញ លោក រៀល សុភិន ព្រះរាជអាជ្ញារង កាលពីរសៀលថ្ងៃទី២៨ ខែធ្នូនេះ បានសម្រេចធ្វើការចោទប្រកាន់មន្ត្រីសាលាខណ្ឌពោធិសែនជ័យ២នាក់…
រាជធានីភ្នំពេញ ៖ តំណាងអយ្យការសាលាដំបូងរាជធានីភ្នំពេញ លោក រៀល សុភិន ព្រះរាជអាជ្ញារង កាលពីរសៀលថ្ងៃទី២៨ ខែធ្នូនេះ បានសម្រេចធ្វើការចោទប្រកាន់មន្ត្រីសាលាខណ្ឌពោធិសែនជ័យ២នាក់ ពីបទ ហិង្សាដោយចេតនា តាមមាត្រា២១៧ នៃក្រមព្រហ្មទណ្ឌ។ ក្រោយពីតំណាងអយ្យការបានធ្វើការចោទប្រកាន់មន្ត្រីសាលាខណ្ឌនោះជាផ្លូវការហើយ សំណុំរឿងនេះបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួន ឬមិនឃុំខ្លួនតាមនីតិវិធី ។ ជនជាប់សង្ស័យម្នាក់ឈ្មោះ ស៊ុំ សុវណ្ណរិទ្ធ អាយុ៣០ឆ្នាំ និងម្នាក់ឈ្មោះ ស៊ុំ សត្យាពណ្ណរាយ អាយុ២៦ឆ្នាំ ត្រូវជាបងប្អូនបង្កើតនឹងគ្នា មានទីលំនៅផ្ទះលេខ៥អេហ្វ ផ្លូវ២០០៨ ភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ។
គួរបញ្ជាក់ថា មន្ត្រីសាលាខណ្ឌពោធិ៍សែនជ័យពីរនាក់បងប្អូន កាលពីថ្ងៃទី២៤ ធ្នូ ២០១៧ ត្រូវបានកម្លាំងសមតត្ថកិច្ចចាប់ឃាត់ខ្លួន បន្ទាប់ពីស្ត្រីរងគ្រោះបានដាក់ពាក្យប្តឹង ក្រោយពេលកើតហេតុភ្លាមៗ។ ស្ត្រីរងគ្រោះបានប្តឹងសមតត្ថកិច្ចថា ពីរនាក់បងប្អូនបានបើករថយន្តបុកនាង ហើយខឹងនាងជេរបន្តិចបន្តួច ក៏បើករថយន្តតាមពីក្រោយ ហើយចុះលោតទៅទាត់ធាក់នាង រហូតដួលម៉ូតូបណ្តាលឲ្យរងរបួសទៀត។ ពាក្យបណ្តឹងជនរង គ្រោះឈ្មោះ ឆែ សុផល អាយុជាង២០ឆ្នាំ បន្តថា មុនពេលកើតហេតុ នាងកំពុងបើកម៉ូតូចេញពីកន្លែងធ្វើការនៅម្តុំទួលគោក បំណងទៅផ្ទះនាង។ លុះមកដល់ផ្លូវ២០០៤ ត្រង់ស្ថានីយប្រេងតូតាល់ សង្កាត់ទឹកថ្លា ខណ្ឌសែនសុខ ស្រាប់តែជនសង្ស័យទាំង២នាក់ បើករថយន្តម៉ាកកូរ៉ូឡា ពណ៌កណ្តុរប្រមេះ ពាក់ស្លាកលេខ ភ្នំពេញ 2Q-4653 បុកនាងពីក្រោយ។
បន្ទាប់មកនាងក៏បានរបូតមាត់ជេរ អ្នកបើកបរនោះបន្តិចបន្តួច ហើយបានបន្តដំណើរទៅមុខ ពេលនោះស្រាប់តែពួកគេទាំង២នាក់ បើករថយន្តតាមទាន់នៅចំណុចស្តុបវត្តអង្គតាម៉ិញ ក៏បើកទ្វារចុះមកទាត់ធាក់បណ្តាលឲ្យដួលរងបួសតែម្តង និងបានធ្វើឲ្យមានការភ្ញាក់ផ្អើល រហូតសមត្ថកិច្ចទៅឃាត់ខ្លួន។ លុះថ្ងៃទី២៥ ធ្នូ មន្ត្រីសាលាខណ្ឌពោធិ៍សែនជ័យពីរនាក់បងប្អូន បានសរសេរលិខិតសុំទោស និងសុំសងសំណងជំងឺចិត្តចំនួន៦៥០០ដុល្លារអាមេរិក ជាថ្នូរនឹងការដកពាក្យបណ្តឹង ដើម្បីបានរួចខ្លួនពីចំណាត់ការផ្កូវច្បាប់។ ប៉ុន្តែទោះបីជាបណ្តឹងរដ្ឋប្បវេណីត្រូវបានបញ្ចប់យ៉ាងណាក្តី សមត្ថកិច្ចនៅបានកសាងសំណុំរឿង និង ជនសង្ស័យពីរនាក់បងប្អូន ទៅកាន់សាលាដំបូងរាជធានីភ្នំពេញ តាមបណ្តឹងអាជ្ញាបន្តទៀត៕
ចែករំលែកព័តមាននេះ