រាជធានីភ្នំពេញ ៖ លោកសុវណ្ណ រិទ្ធី ហៅ តាវិចទ័រ ចាត់ទុកការផ្តាច់ពាក្យកូនស្រីរបស់លោកគឺកញ្ញាវ៉ាន់ នីឡា និងគូដណ្តឹងដោយសារគ្មាននិស្ស័យរស់នៅជាមួយគ្នា ។
លោកតាវិចទ័រ ប្រកាន់ជំហរនៅរាប់ងានគ្នាដដែលជាមួយគ្រួសារខាងប្រុស បើទោះបីជា កូនៗបានបែកបាក់គ្នាក៏ដោយ ។
អ្នករៀបចំកម្មវិធីកម្សាន្តរបស់ស្ថានីយទូរទស្សន៍CTNលោកសុវណ្ណ ឫទ្ធី ប្រាប់កោះសន្តិភាពថា «រឿងរបស់ ក្មេងៗខ្ញុំជាចាស់ទុំគឺមិនចង់និយាយអ្វីច្រើនទេ ប៉ុន្តែការបែកបាក់គ្នារបស់វ៉ាន់ នីឡា នាពេលនេះគឺជានិស្ស័យ ។
បើកូនទាំងពីរគ្មាននិស្ស័យរស់នៅជាមួយគ្នាបានទេ គឺត្រូវតែបែកគ្នាដោយជៀសមិនរួច ប៉ុន្តែសម្រាប់ ចាស់ៗទាំងសងខាងគឺនៅតែមានទំនាក់ទំនងល្អនឹងគ្នាដដែល »។
លោកសុវណ្ណ រិទ្ធី ហៅតាវិចទ័រ មិនបានបញ្ជាក់ថា ចំណងស្នេហ៍រវាងកូនស្រីរបស់លោក វ៉ាន់ នីឡា និងគូដណ្តឹងអាចនឹងឈានទៅរកការផ្សះផ្សាគ្នាវិញ ឬយ៉ាងណានោះឡើយ។ កន្លងមកលោកធ្លាប់អះអាងថា រឿង ក្មេងៗរូបលោកមិនលូកដៃចូលឡើយ បើទោះបីជាពិធីភ្ជាប់ពាក្យដែលបានកើតឡើងរវាងវ៉ាន់ នីឡា និងគូដណ្តឹងផ្តើមចេញពីការផ្សំផ្គុំពី ចាស់ៗទាំងសងខាងក៏ដោយ ។
បន្ទាប់ពីការប្រកាសផ្តាច់ចំណងស្នេហ៍ពីគូដណ្តឹងជាសាធារណៈរួចមកវ៉ាន់ នីឡា បានបង្ហោះសារតាម Instargrame របស់នាងថា នាងមិនប្រាថ្នាបុរសដែលមានទ្រព្យច្រើនទេ សំខាន់បុរសរូបនោះចេះស្រឡាញ់នាងដូចប៉ាម៉ាក់របស់នាង ហើយចេះយល់ចិត្តនាង។
តារាកំប្លែងកញ្ញាវ៉ាន់ នីឡា បានភ្ជាប់ពាក្យយ៉ាងឱឡារិកជាមួយគូដណ្តឹងជាកូនប្រុសថៅកែល្ខោនបាសាក់ភី សុគន្ធី គឺលោកផន រង្សី កាលពីថ្ងៃទី១៩ ខែឧសភា ឆ្នាំ២០១៦ ៕
ចែករំលែកព័តមាននេះ