រាជធានីភ្នំពេញ ៖ ក្នុងឆ្នាំ២០១៧នេះសិល្បករមួយចំនួនមានជំងឺធ្ងន់ រហូតអ្នកខ្លះត្រូវបញ្ជូនទៅសង្គ្រោះនៅមន្ទីរពេទ្យក្រៅប្រទេសទៀតផង ។
តារាកំប្លែងនាយវីតាមីនសេ ៖ ក្នុងវ័យជាង៧០ឆ្នាំមានជំងឺដុំសាច់ក្នុងថ្លើម ហើយត្រូវអ្នកនាងប៉េងប៉ោងជាកូន និងក្រុមគ្រួសារបញ្ជូនទៅសង្គ្រោះនៅមន្ទីរពេទ្យប្រទេសថៃជាបន្ទាន់ ។
នាយវីតាមីនសេត្រូវបានសប្បុរសជនមួយចំនួនជួយឧបត្ថម្ភសម្រាប់ការព្យាបាល ពិសេសបានការអាណិតពីសម្តេចតេជោហ៊ុន សែន នាយករដ្ឋមន្ត្រីផ្តល់ប្រាក់៦ម៉ឺនដុល្លារសម្រាប់ព្យាបាល ។
តារាសម្តែងស្រីពេជ្រ ចរណៃ ៖ តារាស្រីម្នាក់នេះមានជំងឺបេះដូងធ្ងន់ ហើយត្រូវការប្រាក់ច្រើនសម្រាប់ព្យាបាល ។ នាងត្រូវសាច់ញាតិបញ្ជូនទៅព្យាបាលនៅប្រទេសថៃ ហើយអ្នកអាណិតមួយចំនួនបានជួយប្រាក់ឧបត្ថម្ភ ក្នុងនោះអតីតតារាភាពយន្តលោកខៃ ប្រសិដ្ឋ បានចេញពីអូស្ត្រាលីទៅកាន់ប្រទេសថៃជូនប្រាក់រាប់ពាន់ដុល្លារដល់នាងដើម្បីសង្គ្រោះជីវិត ។
តារាសម្តែងលោកយូ ឌីស្កូ ៖ មកទល់ពេលនេះការវះកាត់ប្តូរក្រលៀនរបស់តារាសម្តែងយូឌីស្កូ ហាក់នៅមានសង្ឃឹមតិច បន្ទាប់ពីលោកចំណាយលើការព្យាបាលអស់ច្រើនអំឡុងពេលសម្រាកនៅមន្ទីរពេទ្យ ។
គ្រាន់តែជាស្បើយខ្លះមកលោកយូ ឌីស្កូ វិលទៅរកការសម្តែងវិញទាំងស្លេកស្លាំងដើម្បីដោះស្រាយជីវភាពចំពោះមុខ ។
តារាសម្តែងលោកយូ ឌីស្កូ មានជំងឺទឹកនោមប្រៃ ហើយបានចុះស្គមខ្លាំង ។
តារាចម្រៀងមនោសញ្ចេតនាលោកសួស សងវាចា ៖ លោកមានជំងឺលើសឈាមរហូតទាញដៃជើងបង្អាក់អាជីពសិល្បៈប្រមាណ២ឆ្នាំមកហើយ ។ រហូតមកទល់ពេលនេះលោកសួស សងវេចា នៅតែមិនទាន់ជាស្បើយនៅឡើយ ។
លោកតាផ្លុង មឿក ៖ អ្នកចម្រៀងអាយ៉ៃជើងចាស់រូបនេះឈានដល់វ័យជរា និងមានជំងឺរ៉ាំរ៉ៃច្រើនមុខ ។ គាត់ទទួលបានការឧបត្ថម្ភពីសប្បុរសជនជាបន្តបន្ទាប់ តែរហូតដល់បច្ចុប្បន្នគាត់នៅមិនទាន់ជាស្បើយនៅឡើយ ខណៈក្រុមគ្រួសារកំពុងជួបការខ្វះខាត ៕
ចែករំលែកព័តមាននេះ