ខេត្តព្រៃវែង ៖ រថយន្តគ្រប់ប្រភេទរាប់រយគ្រឿងបានកកស្ទះនៅតាមបណ្តោយផ្លូវជាតិលេខ១១ ត្រង់ចំណុចស្ពានឈើទី៣ ចេញពីទីរួមខេត្តព្រៃវែង មកស្ថិតក្នុងសង្កាត់បារាយ ក្រុងព្រៃវែង ។ ប្រភពព័ត៌មានពីអ្នកធ្វើដំណើរក៏ដូចជាអ្នកបើកបររថយន្តឱ្យដឹងថា ការកកស្ទះចរាចរណ៍នេះចាប់ផ្តើមពីវេលាម៉ោង៣និង១៥នាទីរហូតដល់វេលាម៉ោង៥ល្ងាច ថ្ងៃទី២០ វិច្ឆិកា ២០១២ ។
មូលហេតុនៃការកកស្ទះនេះគឺបណ្តាលមកពីរថយន្តម៉ាក HYUNDAI ផ្ទុកទំនិញធ្ងន់ពេក លើសចំណុះ លុះបើកមកដល់ចំណុចស្ពានឈើនេះក៏កល់ជាប់នឹងរថយន្តទៅមុខមិនរួច ថយក្រោយក៏មិនរួច បណ្តាលឱ្យរថយន្តមកពីខាងជើងកកស្ទះរាប់រយគ្រឿង និងមកពីខាងត្បូងកកស្ទះរាប់រយគ្រឿងយ៉ាងដូចនេះ ។ អ្នកធ្វើដំណើរទាំងអស់មានការរអ៊ូរទាំ និងស្តីបន្ទោសទៅមន្ទីរសាធារណការខេត្តថា មិនបានយកចិត្តទុកដាក់ពិនិត្យមើលស្ពានឱ្យបានត្រឹមត្រូវ ។ ក្រោយមានការកកស្ទះនេះឃើញមានមន្ត្រីពាក់ព័ន្ធទាំងអស់មកពិនិត្យ និងជួយធ្វើអន្តរាគមន៍ ដើម្បីឆាប់បានធ្វើចរាចរណ៍បន្តទៀត ។ ប្រភពព័ត៌មានចុងក្រោយឱ្យដឹងថា រថយន្តកកស្ទះទាំងអស់នោះអាចធ្វើចរាចរណ៍បានវិញនៅវេលាម៉ោង៦ល្ងាចថ្ងៃទី២០ វិច្ឆិកា ២០១២ សូមបញ្ជាក់ថា អ្នកយកព័ត៌មានកោះសន្តិភាពបានផ្តល់ព័ត៌មាននៅព្រឹកថ្ងៃនោះទៅលោកប្រធានមន្ទីរសាធារណការ បន្ទាប់ពីបានជិះម៉ូតូឆ្លងកាត់ស្ពានឈើនេះ ឃើញមានហេតុការណ៍មិនល្អ ដោយឈើកំណាត់ដែលក្រាលបណ្តោយស្ពានរបើកចេញ១កំណាត់ល្មមផុងកង់រថយន្តបាន ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ