រាជធានីភ្នំពេញ ៖ ស្ត្រីចំណាស់ម្នាក់បានសន្លប់បាត់ស្មារតី ខណៈពេលកំពុងដើរឆ្លងផ្លូវចូលទៅមន្ទីរពេទ្យព្រះកុសុមៈត្រូវបានរថយន្តកូរ៉េចំណុះ១តោនកន្លះមួយគ្រឿងដឹកទឹកសុទ្ធបុកចំពីមុខពេញទំហឹង កាលពីវេលាម៉ោង៥និង២០នាទីព្រឹកថ្ងៃទី២១ វិច្ឆិកា នៅមុខមន្ទីរពេទ្យព្រះកុសុមៈតាមបណ្តោយផ្លូវ២៧១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ។ រថយន្តបង្កបានបើកគេចបាត់ស្រមោលក្រោយពីគ្រោះថ្នាក់រួច។
នៅកន្លែងកើតហេតុប៉ូលិសបានឱ្យដឹងថា ស្ត្រីចំណាស់រងគ្រោះគឺឈ្មោះប៊ុន ណារ័ត្ន អាយុ៧៣ឆ្នាំ ស្នាក់នៅភូមិ-សង្កាត់កើតហេតុខាងលើ ពេលកំពុងដើរឆ្លងផ្លូវដើម្បីចូលទៅមន្ទីរពេទ្យព្រះកុសុមៈ ស្រាប់តែមានរថយន្តកូរ៉េចំណុះ១តោនកន្លះមួយគ្រឿងដឹកទឹកសុទ្ធបើកដោយបុរសម្នាក់តាមបណ្តោយផ្លូវ២៧១ ពីជើងទៅត្បូងយ៉ាងលឿនក៏ជ្រុលទៅបុកស្ត្រីចំណាស់នោះយ៉ាងពេញទំហឹង បណ្តាលឱ្យដួលបោកទៅនឹងរថយន្តប៉ើងប្រមាណ៥ម៉ែត្ររងរបួសធ្ងន់ដោយបាក់ជើងខាងស្តាំ និងបែកក្បាលខាងក្រោយហូរឈាមស្រោចពេញខ្លួនសន្លប់ស្តូកស្តឹងនៅលើផ្លូវ។ស្ត្រីរងគ្រោះត្រូវបានគេបញ្ជូនទៅសង្គ្រោះនៅមន្ទីរពេទ្យភ្លាមៗផងដែរ ។ ចំណេករថយន្តខាងលើបានបើករត់ដោយសុវត្ថិភាព ៕
ចែករំលែកព័តមាននេះ