អ្នកជំនាញរកដំណោះស្រាយសង្គ្រោះដើមឈើក្នុងប្រាសាទតាព្រហ្ម
- សៀមរាប
ខេត្តសៀមរាប ៖ កាលពីថ្ងៃទី២៦ ខែធ្នូ ឆ្នាំ២០១៧ ក្រុមអ្នកជំនាញព្រៃឈើរបស់អាជ្ញាធរជាតិអប្សរា ដឹកនាំដោយលោកបណ្ឌិត ហង់ ពៅ អគ្គនាយករងអាជ្ញាធរជាតិអប្សរា…
ខេត្តសៀមរាប ៖ កាលពីថ្ងៃទី២៦ ខែធ្នូ ឆ្នាំ២០១៧ ក្រុមអ្នកជំនាញព្រៃឈើរបស់អាជ្ញាធរជាតិអប្សរា ដឹកនាំដោយលោកបណ្ឌិត ហង់ ពៅ អគ្គនាយករងអាជ្ញាធរជាតិអប្សរា សហការជាមួយអ្នកជំនាញឥណ្ឌា ប្រចាំការក្នុងការដ្ឋានជួសជុលប្រាសាទតាព្រហ្ម បានពិភាក្សារិះរកវិធានការដោះស្រាយ ដើម្បីរក្សាជីវិតដើមឈើទាំងអស់នោះឱ្យបន្តរស់បានរាប់រយឆ្នាំទៀត កុំឱ្យវារលំទៅលើអ្នកទេសចរ ។
ប្រាសាទតាព្រហ្មត្រូវបានភ្ញៀវទេសចរជាទូទៅស្គាល់ថាជាប្រាសាទដែលមានដើមឈើធំៗ ព្រោះប្រាសាទនេះក្រៅមានពីមានប្រាង្គប្រាសាទដ៏ល្អឥតខ្ចោះ ក៏មានដើមឈើ ធំៗជាច្រើនអាយុកាលរាប់រយឆ្នាំដុះព័ទ្ធព័ន្ធនៅលើតួប្រាសាទគួរឱ្យចង់ទស្សនា និងផ្តិតរូបភាពទុកជាអនុស្សាវរីយ៍ ។
ភាពទាក់ទាញនៃប្រាសាទ និងដើមឈើ បានធ្វើឱ្យមានលំហូរភ្ញៀវទេសចរមកទស្សនាប្រចាំថ្ងៃមិនតិចជាង៥០០០នាក់ ដែលអាចបង្កឱ្យមានហានីភ័យយ៉ាងខ្លាំងដល់ដើមឈើក្នុងប្រាសាទតាមរយៈសកម្មភាពដើរជាន់ ឬឈរថតជាដើម ។
លោកនិន ចាន់សាមៀន ប្រធាននាយកដ្ឋានគ្រប់គ្រងព្រៃឈើ បរិស្ថាន និងទេសភាពវប្បធម៌ បានឱ្យដឹងថា នាពេល ឆាប់ៗខាងមុខនេះ ក្រុមការងារនឹងរៀបចំក្រាលក្តារនៅលើដី និងលើឫសឈើផ្ទាល់ ដើម្បីកុំឱ្យភ្ញៀវទេសចរជាន់លើនាំឱ្យហាប់ដី ប៉ះពាល់ដល់ឫសនាំឱ្យក្រិន មានដំបៅ កើតជំងឺ អាចងាប់បាន។ ការក្រាលក្តារនោះដែរ គឺមានប្រហោង តូចៗ អនុគ្រោះដល់ការលូតលាស់ និងការដកដង្ហើមរបស់ឫសឈើបាន ហើយក៏ធានាសុវត្ថិភាពដល់ភ្ញៀវទេសចរផងដែរ ៕
ចែករំលែកព័តមាននេះ