ខេត្តបាត់ដំបង៖ ជនមិនស្គាល់មុខម្នាក់ដែលមានកាន់កាំភ្លើងខ្លីក្នុងដៃផង បានចូលទៅធ្វើសកម្មភាពភ្ជង់ប្លន់អ្នកលក់មាស ប្ដូរលុយមួយកន្លែង កាលពីវេលាម៉ោង៤:២៥នាទីល្ងាចថ្ងៃទី២៧ធ្នូ នៅខាងត្បូងផ្សារណាត់ ដែលមានយីហោផ្ទះ «៧៤» ស្ថិតក្នុងក្រុមទី២៤ ភូមិ២០ឧសភា សង្កាត់ស្វាយប៉ោ ក្រុងបាត់ដំបង ប៉ុន្តែមិនបានសម្រេចទេដោយសារម្ចាស់ផ្ទះប្រតាយប្រតប់ដណ្ដើមកាំភ្លើង បង្កឲ្យមានការភ្ញាក់ផ្អើល តែមិនរំខានដល់សមត្ថកិច្ចដែលយាមតាមគោលដៅនៅជុំវិញផ្សារនោះទេ។
សមត្ថកិច្ចបានប្រាប់ថា ជនរងគ្រោះឈ្មោះគង់ សុខថា ស្រីអាយុ៤១ឆ្នាំ ជាអាជីវករលក់មាសដូរលុយដែលមានយីហោផ្ទះ «៧៤» ដែលស្ថិតនៅខាងត្បូងផ្សារណាត់បាត់ដំបង។ មន្ត្រីដដែលបានប្រាប់ថា ជនសង្ស័យពាក់មួកសុវត្ថិភាព ជិះម៉ូតូម៉ាកZoomer ពណ៌ខ្មៅ-ទឹកក្រូច គ្មានស្លាកលេខទេ ។ ជននេះបានឈប់ម៉ូតូនៅចិញ្ចើមថ្នល់រួចចុះដើរចូលទៅភ្ជង់ម្ចាស់ផ្ទះគំរាមយកលុយតែម្ដង។ ប៉ុន្តែត្រូវស្ត្រីរងគ្រោះនិងកូនប្រុសចាប់កាំភ្លើងនោះប្រតាយប្រតប់គ្នាបង្កឲ្យមានការភ្ញាក់ផ្អើលធ្វើឲ្យចោរមិនអាចប្លន់បានសម្រេចក៏រត់ឡើងជិះម៉ូតូគេចខ្លួនបាត់ភ្លាមៗដែរ តែគ្រប់សកម្មភាពរបស់ខ្មាន់កាំភ្លើងនេះ ត្រូវថតជាប់នៅក្នុងកាមេរ៉ាសុវត្ថិភាពម្ចាស់ផ្ទះ និងកាមេរ៉ាសុវត្ថិភាពអ្នកនៅក្បែរខាងនោះ។
បើតាមបំភ្លឺពីស្ត្រីរងគ្រោះឈ្មោះគង់ សុខថា បានប្រាប់សមត្ថកិច្ចថា ជននោះបានចូលទៅរកដូរលុយ ហើយស្របពេលនេះស្រាប់តែដកថង់ខ្មៅ ដែលមានកាំភ្លើងខ្លីផងភ្ជង់គាត់ គំរាមយកលុយតែម្ដង។ គាត់និយាយថា ខ្មាន់កាំភ្លើងនោះ បានភ្ជង់កាំភ្លើងបង្ខំឲ្យគាត់យកលុយច្រកក្នុងថង់ខ្មៅឲ្យវា តែពេលនោះគាត់និងកូនប្រុសក៏ចាប់កាំភ្លើងជាប់ប្រតាយប្រតប់គ្នាតែម្ដង ។ ជនរងគ្រោះបញ្ជាក់ថា ចោរនោះប្លន់មិនបានសម្រេចទេ ដោយសារមានការភ្ញាក់ផ្អើល ហើយជននោះក៏រត់ឡើងម៉ូតូជិះគេចខ្លួនដោយសុវត្ថិភាព។
សូមបញ្ជាក់ថា ផ្ទះលក់មាស និងដូរលុយនេះ នៅជាប់ផ្លូវខាងត្បូងផ្សារណាត់ ដែលមានកម្លាំងនគរបាល និងកម្លាំងកងរាជអាវុធហត្ថយាមតាមគោលដៅការពារសន្តិសុខជុំវិញផ្សារនេះ គ្រប់ពេលវេលា។ ប៉ុន្តែពេលត្រូវចោរប្លន់ក្បែរគោលដៅសមត្ថកិច្ចប្រហែល៣០ម៉ែត្រទាំងថ្ងៃ បែរជាសមត្ថកិច្ចមិនអាចបង្ក្រាបបាន រហូតបណ្ដោយឲ្យខ្មាន់កាំភ្លើងជិះគេចខ្លូនបានដោយសារសុវត្ថិភាព។ បើតាមសាក្សីបាននិយាយថា ក្រោយធ្វើសកម្មភាពខ្មាន់កាំភ្លើងនោះ បានជិះម៉ូតូត្រឡប់កាត់មុខគោលដៅយាមកាមរបស់សមត្ថកិច្ច រួចបត់តាមផ្លូវលេខ២កន្លះឆ្ពោះទៅទិសខាងត្បូង។ ប៉ុន្តែបន្តិចក្រោយមកគេឃើញសមត្ថកិច្ចបានជិះតាមខ្មាន់កាំភ្លើងនោះ បន្ទាប់ពីមានការភ្ញាក់ផ្អើល តែបាត់តំណឹងទាំងចោរ បាត់ទាំងសមត្ថកិច្ចឈឹងទៅ។
ជុំវិញករណីចោរថ្លើមធំធ្វើសកម្មភាពប្លន់ទូមាសទាំងថ្ងៃចំកណ្ដាលក្រុងនេះ លោកប៉ាង ហៀង អធិការក្រុងបាត់ដំបង បានបំភ្លឺថា នៅជុំវិញផ្សារណាត់នោះពិតជាមានកម្លាំងសមត្ថកិច្ចយាមតាមគោលដៅមែន។ លោកថា គោលដៅនៅខាងលិច និងខាងជើងផ្សារគឺកម្លាំងរបស់អធិការក្រុង រីឯនៅប៉ែកខាងត្បូងផ្សារក្បែរកន្លែងកើតហេតុ គឺមានកម្លាំងកងរាជអាវុធហត្ថផង កម្លាំងនគរបាល នៃស្នងការខេត្តផង។
ប៉ុន្តែលោកអធិការរូបនេះបានបញ្ជាក់ដូច្នេះថា ក្រោយកើតហេតុភ្លាមៗ គឺសមត្ថកិច្ចបានជិះម៉ូតូដេញតាមចោរនោះដែរ តែបានបាត់ដាន ពេលដល់ផ្លូវបំបែកក្បែរធនាគារអេស៊ីលីដា ដែលមានមនុស្សច្រើន។ លោកប៉ាង ហៀង បានបញ្ជាក់បន្ថែមអំពីសកម្មភាពជនសង្ស័យនោះថា បើតាមការសួរនាំជនរងគ្រោះ និងពិនិត្យសកម្មភាពនៅក្នុងកាមេរ៉ាសុវត្ថិភាព កាំភ្លើងខ្លីដែលជនសង្ស័យប្រើប្រាសអាចជាកាំភ្លើងជ័រ មិនមែនកាំភ្លើងពិតប្រាដកទេ។ ដោយឡែកមុខសញ្ញាជនសង្ស័យនេះ បើតាមលោកអធិការបានប្រាប់ថា រហូតដល់ពេលនេះយើងមិនទាន់មានតម្រុយនៅឡើយទេ។
ប៉ុន្តែលោកឧត្តសេនីយត្រី ជេត វណ្ណនី ស្នងការរងខេត្ត ដែលចុះដល់ទិតាំងកើតហេតុដែរ បានប្រាប់ថា មុខសញ្ញាជនសង្ស័យអាចជាមនុស្សនៅក្នុងខេត្ត មិនមែនមកពីក្រៅទេ ហើយបើពិនិត្យលើសកម្មភាពជននេះ ទំនងក៏ជាមុខសញ្ញាថ្មីដែរ ហើយលោកក៏សង្ស័យដែរទៅលើកាំភ្លើងខ្លីដែលជននោះប្រើប្រាស ដែលមិនមែនជាកាំភ្លើងពិត។ ទោះជាយ៉ាងណាមន្ត្រីជំនាញកំពុងធ្វើការស៊ើបអង្កេតល់ករណីនេះហើយ៕
ចែករំលែកព័តមាននេះ