រាជធានីភ្នំពេញ ៖ ការកើនឡើងនៃបណ្តាញទំនាក់ទំនងសង្គម ស្របនឹងបច្ចេកវិទ្យាកាន់តែរីកចម្រើនដូចសព្វថ្ងៃនេះ ការប្រើប្រាស់បណ្តាញទំនាក់ទំនងផ្តល់នូវគុណសម្បត្តិច្រើន និងធ្វើឱ្យពលរដ្ឋដែលចេះប្រើប្រាស់ ចំណេញទាំងពេលវេលា និងថវិកា ។ លោក…
រាជធានីភ្នំពេញ ៖ ការកើនឡើងនៃបណ្តាញទំនាក់ទំនងសង្គម ស្របនឹងបច្ចេកវិទ្យាកាន់តែរីកចម្រើនដូចសព្វថ្ងៃនេះ ការប្រើប្រាស់បណ្តាញទំនាក់ទំនងផ្តល់នូវគុណសម្បត្តិច្រើន និងធ្វើឱ្យពលរដ្ឋដែលចេះប្រើប្រាស់ ចំណេញទាំងពេលវេលា និងថវិកា ។
លោក ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម មានប្រសាសន៍ថា ៖« កាលណាបច្ចេកវិទ្យាកាន់តែទំនើបធ្វើឱ្យកាន់តែចំណេញពេលវេលា ។ បើនិយាយពីការលក់ទំនិញតាមអនឡាញ គ្រាន់តែកុម្មង់ ឬទិញទំនិញគេនឹងដឹកជញ្ជូនដល់ផ្ទះ ធ្វើឱ្យពលរដ្ឋចំណេញពេលវេលា តែបើគាត់ជិះទៅទិញផ្ទាល់អាចស្ទះចរាចរណ៍ ឬចំណាយពេលរង់ចាំជាដើម ។ ប៉ុន្តែបើគាត់យកពេលវេលាទាំងនេះទៅធ្វើអ្វីផ្សេង វាចំណេញច្រើន » ។
លោកបញ្ជាក់ថា ៖« កាលណាយើងធ្វើអ្វីកាន់តែលឿននោះ នឹងធ្វើឱ្យយើងចំណេញខាងសេដ្ឋកិច្ចកាន់តែលឿន » ។
តាមស្ថាបនិករបស់ក្រុមហ៊ុន Codingate មានប្រសាសន៍ថា ពេលប្រព័ន្ធអ៊ីនធើរណេតនៅកម្ពុជាមានស្ថិរភាព ល្បឿនលឿន និងចំណាយតិច ធ្វើឱ្យប្រជាពលរដ្ឋដែលប្រើទូរស័ព្ទស្មាតហ្វូន បានតភ្ជាប់ជាមួយបច្ចេកវិទ្យាប្រើប្រាស់បណ្តាញទំនាក់ទំនងសង្គម ហើយរាល់ការទំនាក់ទំនងទាំងនេះមានប្រសិទ្ធភាពខ្ពស់ និងមានឱកាសបង្កើតអាជីវកម្មបាន ។
លោក សុខ សុភមង្គល ស្ថាបនិកក្រុមហ៊ុន Codingate មានប្រសាសន៍ថា ប្រទេសកម្ពុជាកំពុងតែអភិវឌ្ឍន៍ ដូចនេះ ការរីកចម្រើននៃបច្ចេកវិទ្យា និងបណ្តាញទំនាក់ទំនង អាចជាឱកាសមួយចាប់ផ្តើមអាជីវកម្ម និងចំណាយដើមទុនតិចនៅពេលចេះបច្ចេកវិទ្យា ។ លើសពីនេះ ធ្វើឱ្យការផ្សព្វផ្សាយផលិតផលនៅតាមបណ្តាញសង្គមដូចជា ហ្វេសប៊ុកមានប្រសិទ្ធភាព និងដឹងពីចំនួនអតិថិជនដែលចាប់អារម្មណ៍ទៅលើផលិតផលបាន ខុសប្លែកពីការផ្សព្វផ្សាយតាមទូរទស្សន៍ ឬកាសែតកន្លងមក ។
លោកលើកឡើងថា ៖« ការប្រើប្រាស់បណ្តាញសង្គម វាផ្តល់នូវគុណសម្បត្តិច្រើនជាងគុណវិបត្តិ សម្រាប់ប្រើប្រាស់សព្វថ្ងៃ ។ ប្រសិន នៅក្នុងបណ្តាញសង្គម មិត្តភក្តិរបស់យើង គាត់ចែករំលែកនូវព័ត៌មានល្អៗទាក់ទងនឹងការធ្វើអាជីវកម្ម ការសិក្សា ឬសកម្មភាពចូលរួមសង្គម អាចឱ្យយើងរៀនសូត្រតាមរយៈនេះបាន តែបើមិត្តភក្តិរបស់យើងចូលចិត្តចែករំលែកតែព័ត៌មានអវិជ្ជមាន អីចឹង វានឹងធ្វើឱ្យប៉ះពាល់ដល់ការគិត និងការសម្រេចចិត្តទៅលើរឿងអ្វីមួយបាន » ។
ទាក់ទងនឹងការប្រើប្រាស់បណ្តាញសង្គមសព្វថ្ងៃនេះ លោក ឡាយ សុខហេង សាស្ត្រាចារ្យនៅសាកលវិទ្យាល័យភូមិន្ទភ្នំពេញ មានប្រសាសន៍ថា ៖« ព័ត៌មានដែលចែកចាយនៅក្នុងបណ្តាញទំនាក់ទំនងសង្គមមានច្រើន មានទាំងព័ត៌មានផ្លូវការ និងក្រៅផ្លូវការ ។ ជាទូទៅខ្ញុំមើលឃើញថា ការប្រើប្រាស់បណ្តាញទំនាក់ទំនងសង្គមនេះ វាផ្តល់នូវគុណសម្បត្តិច្រើនជាងគុណវិបត្តិ » ។
លោកបន្តថា ៖« ក្នុងករណីការចែករំលែកព័ត៌មានផ្លូវការទាក់ទងនឹងហិរញ្ញវត្ថុនៅតាមបណ្តាញទំនាក់ទំនងសង្គម នឹងធ្វើប្រជាពលរដ្ឋយល់ដឹងអំពីផលិតផល និងសេវាកម្មទាក់ទងនឹងវិស័យហិរញ្ញវត្ថុ និងងាយស្រួលក្នុងការសម្រេចចិត្តផ្នែកសេដ្ឋកិច្ចផងដែរ »៕
ចែករំលែកព័តមាននេះ