រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) កាលពីថ្ងៃទី២៧ ខែធ្នូ ឆ្នាំ២០១៧ បានឲ្យដឹងថា សាធារណរដ្ឋប្រជាមានិតចិនតាមការស្នើសុំរបស់ គ.ជ.ប ធ្វើឡើងកាលពីពេលថ្មីៗនេះ ការិយាល័យនៃទីប្រឹក្សាសេដ្ឋកិច្ច និងពាណិជ្ជកម្មនៃស្ថានទូត នៃសាធារណរដ្ឋប្រជាមានិតចិន ប្រចាំនៅព្រះរាជាណាចក្រកម្ពុជាបានសម្រេចផ្តល់សម្ភារៈបរិក្ខារចំនួន៣០មុខដល់ គ.ជ.ប សម្រាប់ការបោះឆ្នោតជ្រើសតាំងតំណាងរាស្ត្រនីតិបាលទី៦ ឆ្នាំ២០១៨។
យោងតាមសេចក្តីប្រកាសព័ត៌មានរបស់ គ.ជ.ប បានលើកឡើងថា៖ «ភាគីចិនសន្យាថានឹងបន្តផ្តល់ជំនួយដល់ គ.ជ.ប បន្ថែមទៀត សម្រាប់ការរៀបចំជាបន្តបន្ទាប់ឲ្យប្រព្រឹត្តទៅដោយរលូនមានភាពត្រឹមត្រូវ មានតម្លាភាព និងគណនេយ្យភាព»។
គ.ជ.ប បញ្ជាក់ថា ចំនួនសម្ភារៈ បរិក្ខារដែលចិននឹងផ្តល់ជូនស្ថាប័នរៀបចំការបោះឆ្នោតនេះ មិនទាន់អាចវាយតម្លៃជាទឹកប្រាក់បាននៅឡើយទេ ។ សូមបញ្ជាក់ថា សហរដ្ឋអាមេរិក និងសហគមន៍អឺរ៉ុបបានសម្រេចព្យួរការផ្តល់ជំនួយរបស់ខ្លួនសម្រាប់ស្ថាប័នរៀបចំការបោះឆ្នោតនេះ បន្ទាប់ពីគណបក្សសង្គ្រោះជាតិ (CNRP) ត្រូវបានតុលាការកំពូលរំលាយបក្សប្រឆាំង និងហាមមនុស្ស១១៨នាក់ មិនឲ្យធ្វើនយោបាយតាមអំណាចសាលដីកាចុះ ថ្ងៃទី១៦ ខែវិច្ឆិកា កន្លងទៅ៕
ចែករំលែកព័តមាននេះ