អ្នកវិទ្យាសាស្ត្របានឱ្យដឹងថា iPad ទូរទស្សន៍ និងកុំព្យូទ័រ ដែលប្រើក្នុងបន្ទប់គេង ប្រហែលជាឧបករណ៍ជម្រុញឱ្យមនុស្សធាត់ជ្រុល ដោយសារតែបន្ទប់មិនអាចមានភាពងងឹតគ្រប់គ្រាន់ សម្រាប់សកម្មភាពរំលាយអាហារក្នុងខ្លួនធ្វើការបានល្អ ។ ការសិក្សាមួយបានឱ្យដឹងទៀតថា…
អ្នកវិទ្យាសាស្ត្របានឱ្យដឹងថា iPad ទូរទស្សន៍ និងកុំព្យូទ័រ ដែលប្រើក្នុងបន្ទប់គេង ប្រហែលជាឧបករណ៍ជម្រុញឱ្យមនុស្សធាត់ជ្រុល ដោយសារតែបន្ទប់មិនអាចមានភាពងងឹតគ្រប់គ្រាន់ សម្រាប់សកម្មភាពរំលាយអាហារក្នុងខ្លួនធ្វើការបានល្អ ។
ការសិក្សាមួយបានឱ្យដឹងទៀតថា អ្នកគេងត្រូវការក្រណាត់ខ្មៅបាំងភ្នែក ដើម្បីឱ្យរាងកាយអាចផលិតនូវអ៊័រម៉ូនក្នុងកម្រិតមានសុខភាពល្អ និងសម្របសម្រួលដល់ការបម្លែងអាហារ និងភេសជ្ជៈទៅជាថាមពល ។
ចំណែកឯពន្លឺពាសវាលពាសកាលចេញពីកញ្ចក់ឧបករណ៍នានា ឬភ្លើងបំភ្លឺតាមផ្លូវដែលចាំងលើវាំងនន អាចផ្តល់គ្រោះថ្នាក់ដល់ការផលិតរបស់អ៊័រម៉ូន Melatonin និងបញ្ឈប់រាងកាយមិនឱ្យរំលាយអាហារកាន់តែមានប្រសិទ្ធភាពទៀតផង ។
អ៊័រម៉ូន Melatonin គឺជាសារធាតុធម្មជាតិមួយ ដែលមានក្នុងរុក្ខជាតិ សត្វ និងមនុស្ស ហើយមានមុខងារជាអ៊័រម៉ូនបញ្ជូនសញ្ញា ព្រមទាំងត្រូវបានបញ្ចេញមកក្រៅនៅពេលយប់ ។ ថ្មីៗនេះ ដំណើរមួយនេះត្រូវបានរំខានជាញឹកញាប់ ដោយសារតែការប៉ះពាល់នឹងពន្លឺយ៉ាងច្រើននៅពេលយប់ ។ ឧទាហរណ៍ មានមនុស្សច្រើនណាស់ ដែលមានទម្លាប់គេងបើកភ្លើង បើកទូរទស្សន៍ ឬកុំព្យូទ័រ ។ ហេតុដូច្នេះហើយ យកល្អអ្នកគួរតែសាកល្បងគេងក្នុងស្ថានភាពដែលងងឹតឈ្លប់តែម្តង ដើម្បីជៀសវាងការរំខានដល់ការផលិតរបស់អ៊័រម៉ូន Melatonin ។
មនុស្សវ័យជំទង់ម្នាក់ក្នុងចំណោមបួនក្នុងប្រទេសអង់គ្លេស មានអាការធាត់ជ្រុល ហើយចំនួននេះស្មើនឹង៦០ភាគរយសម្រាប់បុរស និង ៥០ភាគរយសម្រាប់ស្ត្រី ដែលវានឹងកើនឡើងក្នុងឆ្នាំ២០៥០ ។ ចំណែកឯ ក្មេងៗវិញ គឺមាន ៣នាក់ក្នុងចំណោម១០នាក់ ដែលមានអាយុ ២ទៅ១៥ឆ្នាំ ក៏ឈានទៅរកអាការធាត់ខុសធម្មតា ឬធាត់ជ្រុលនេះដែរ ។
អត្រានៃអ្នកធាត់ជ្រុល គឺកើតឡើងដោយសាររបៀបរស់នៅបែប ស៊ីដេកៗ ញ៉ាំអាហារសម្បូរកាឡូរីពេក និងការប៉ះពាល់នឹងពន្លឺច្រើនពេក ដែលជាហេតុនាំឱ្យកាត់បន្ថយចំនួនអ៊័រម៉ូន Melatonin ។
ការបើកភ្លើងចោលរហូតពេលអ្នកគេង អាចទៅរំខានដល់ចង្វាក់នៃការផ្លាស់ប្តូរបែបធម្មជាតិរបស់រាងកាយ និងផ្តល់គ្រោះថ្នាក់ដល់ការរំលាយអាហារ ៕
ចែករំលែកព័តមាននេះ