រាជធានីភ្នំពេញ ៖ ក្រុមហ៊ុនយក្សរបស់អាមេរិក វ៉លម៉ាត (Walmart) ដែលជាក្រុមហ៊ុនបញ្ជាទិញដ៏ធំមួយពីរោងចក្រកាត់ដេរសម្លៀកបំពាក់ និងវាយនភ័ណ្ឌនៅកម្ពុជា បានសរសេរលិខិតជូនលោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដោយអះអាងថា ក្រុមហ៊ុននឹងបន្តបញ្ជាទិញទំនិញសម្លៀកបំពាក់ និងស្បែកជើងបន្តទៀត ឆ្នាំ២០១៨នេះ ជាពិសេសក្រុមហ៊ុន និងបញ្ជាទិញទំនិញថ្មីមួយមុខទៀត ពីកម្ពុជា នោះ គឺសម្ភារៈធ្វើដំណើរពីកម្ពុជាថែមទៀត។
យ៉ាងណាមិញ លោក សុខ ឥសាន អ្នកនាំពាក្យគណបក្សកាន់អំណាចបានឲ្យដឹងនៅថ្ងៃទី២៧ ខែធ្នូ នេះថា ចេតនាអាក្រក់របស់អតីតមន្ត្រីបក្សប្រឆាំងត្រូវទទួលបរាជ័យយ៉ាងអាម៉ាស់ ក្នុងពេលដែលមន្ត្រីអតីតបក្សប្រឆាំងបាននិងកំពុងធ្វើយុទ្ធនាការឱបដៃឱបជើងចៅហ្វាយនាយបរទេសឲ្យបិទទីផ្សារនាំចូលផលិតផលឧស្សាហកម្មកាត់ដេរពីកម្ពុជា ដែលជាការចង់កម្ទេចឆ្នាំងបាយកម្មករ និយោជិតកម្ពុជា ដោយសារតែក្រុមហ៊ុនយក្សអាមេរិក វ៉ុលម៉ាត់ (Walmart) បានថ្លែងសរសើរលក្ខខណ្ឌការងារកម្មករនិយោជិតកម្ពុជា ដែលត្រូវបានរាជរដ្ឋាភិបាលកម្ពុជា យកចិត្តទុកដាក់ជាប់ជាប្រចាំ ហើយបានប្តេជ្ញាបង្កើនការនាំចូលទំនិញកាត់ដេរពីកម្ពុជាថែមទៀត ដែលជាការលើកទឹកចិត្តកម្មករនិយោជិតកម្ពុជា ឲ្យកាន់តែមានកម្លាំងចិត្ត និងមានក្តីសង្ឃឹមចំពោះអនាគតការងាររបស់ខ្លួនតទៅថ្ងៃមុខទៀត ។
លោកបញ្ជាក់ថា៖ «ការប្តេជ្ញាចិត្តរបស់ក្រុមហ៊ុនយក្សអាមេរិក Walmart គឺជាការសំពងក្បាលពួកអតីតមន្ត្រីបក្សប្រឆាំងដែលត្រូវរលាយហើយនោះ ឲ្យកាន់តែទទួលបរាជ័យធ្ងន់ធ្ងរថែមទៀត ចំពោះរាល់ទង្វើក្បត់ជាតិរបស់ខ្លួនដែលនៅមិនអស់ចិត្តចង់សម្លាប់ជាតិឯងនោះ»។
យោងតាមលិខិតរបស់លោក Scott Price អនុប្រធានប្រតិបត្តិក្រុមហ៊ុន Walmart បានឲ្យដឹងថា នៅអំឡុងពេលទស្សនកិច្ចរបស់លោកមកកាន់ប្រទេសកម្ពុជា លោកបានទៅទស្សនកិច្ចរោងចក្រផលិតស្បែងជើង និងជួបជាមួយសហការរីរបស់វ៉ុលម៉ាត ដែលធ្វើការនៅរាជធានីភ្នំពេញផងដែរ ។ លោកបានបន្តថា ប្រទេសកម្ពុជា គឺជាប្រភពទីផ្សារចម្បងសម្រាប់ Walmart ហើយក្រុមហ៊ុនលោកជាអ្នកនាំចេញនូវផលិតផលស្បែងជើង ឈានមុខគេ និងជាអ្នកនាំចេញឈានមុខលំដាប់ទី២ នៃសម្លៀលបំពាក់របស់ប្រទេសកម្ពុជា ។
លិខិតរបស់លោក Scott Price បញ្ជាក់ថា៖ «នៅឆ្នាំខាងមុខ យើងសង្ឃឹមថា នឹងចាប់ផ្តើមនាំចេញនូវផលិតផលធ្វើដំណើរ។ យើងរីករាយចែករំលែកនូវបទពិសោធន៍ការងាររបស់យើងជាមួយប្រភពទីផ្សារផ្សេងទៀត និងដើម្បីជួយដល់ហេដ្ឋរចនាសម្ព័ន្ធកម្ពុជាដើម្បីបង្កើនផលិតភាព ការប្រកួតប្រជែង និងប្រសិទ្ធភាព»។ លិខិតបន្តថា កំណើននៃការនាំចេញរបស់យើងនៅប្រទេសកម្ពុជា អាស្រ័យលើបរិកាស ពាណិជ្ជកម្មសរឹងមាំមួយ ។ ស្ថិរភាព ភាពអាចព្យាករបាន និងនីតិរដ្ឋ បង្កើតជាមួយមូលដ្ឋានមួយនៃការចូលរួមធ្វើពាណិជ្ជកម្មរបស់យើងជុំវិញពិភពលោក និងអនុញ្ញាតឲ្យយើងធ្វើការប្តេជ្ញាចិត្ត និងវិនិយោគទុនក្នុងវិស័យទីផ្សាររយៈពេលយូរអង្វែង ។
ប៉ុន្តែ លោក Scott price ក៏បានសសេរក្នុងលិខិតបញ្ជាក់យ៉ាងច្បាស់ថា អតិថិជនរបស់ Walmart តម្រូវឲ្យក្រុមហ៊ុនមានបទដ្ឋានខ្ពស់ និងយកចិត្តទុកដាកលើលក្ខខណ្ឌសង្គមកិច្ច និងការងារនៅក្នុងបណ្តាប្រទេសដែលក្រុមហ៊ុនកំណត់ប្រភពទីផ្សារផលិត ។
លោក Scott price បញ្ជាក់បន្ថែមថា៖ «ខណៈដែលយើងត្រូវបានតម្រូវឲ្យមានបទដ្ឋានខ្ពស់បែបនេះ យើងសូមស្នើដោយសេចក្តីគោរពឱ្យរដ្ឋាភិបាលរបស់អ្នកបន្តធ្វើឲ្យប្រសើរឡើងដល់លក្ខខណ្ឌការងារសម្រាប់កម្មកររោងចក្រកម្ពុជា និងប្រព្រឹត្តទៅលើរដ្ឋាភិបាលរបស់យើង និងសង្គមស៊ីវិលដោយភាពយុត្តិធម៌ ស្របទៅតាមស្តង់ដា និងបទដ្ឋានអន្តរជាតិនានា» ។
លិខិតដដែលក៏បានបង្ហាញនូវការកោតសរសើរដល់កម្ពុជាសម្រាប់ការការពារ និងផ្តល់សិទ្ធិដល់ប្រជាជនកម្ពុជា ដែលសម្រេចជ្រើសរើសការងារនៅក្រៅប្រទេស៕
ចែករំលែកព័តមាននេះ