រាជធានីភ្នំពេញ ៖ ថ្មីៗនេះ មានការយល់ច្រឡំពីការជួញដូររូបិយប័ណ្ណឌីជីថល (Bitcoin) និងការជួញដូរឧបករណ៍និស្សន្ទ ខណៈវិស័យហិរញ្ញវត្ថុមួយនេះបានមកដល់ប្រទេសកម្ពុជា និងបានប្រកាសជួញដូរនៅក្នុងទីផ្សារកម្ពុជាផងដែរ ។ លោក…
រាជធានីភ្នំពេញ ៖ ថ្មីៗនេះ មានការយល់ច្រឡំពីការជួញដូររូបិយប័ណ្ណឌីជីថល (Bitcoin) និងការជួញដូរឧបករណ៍និស្សន្ទ ខណៈវិស័យហិរញ្ញវត្ថុមួយនេះបានមកដល់ប្រទេសកម្ពុជា និងបានប្រកាសជួញដូរនៅក្នុងទីផ្សារកម្ពុជាផងដែរ ។
លោក Lawrence Kook អ្នកជំនាញផ្នែកហិរញ្ញវត្ថុមួយរូប បានឲ្យដឹងថា Bitcoin និងឧបករណ៍និស្សន្ទមានភាពខុសគ្នាដាច់ស្រឡះ។ Bitcoin ជាទស្សនៈមួយទាក់ទងនឹងរូបិយប័ណ្ណឌីជីថលថ្មី ដែលត្រូវបានណែនាំទៅកាន់ពិភពលោក ដូចជា កុំព្យូទ័រ និងបច្ចេកវិទ្យាឌីជីថលជាដើម ដែលទទួលបានប្រជាប្រិយភាពជុំវិញពិភពលោក ។ Bitcoin គ្មានផលិតផលអ្វីជាក់លាក់ជាគោលឡើយ ខណៈឧបករណ៍និស្សន្ទមានផលិតផលជាគោលពិតប្រាកដដូចជា ទ្រឹស្តីសេដ្ឋកិច្ចស្ដីពីការផ្គត់ផ្គង់ និងតម្រូវការ ។
នាយកក្រុមហ៊ុន Golden FX Link Cambodia រូបនេះបាននិយាយថា ៖« ផលិតផលឧបករណ៍និស្សន្ទត្រូវបានប្រើប្រាស់ក្នុងគោលបំណងការពារហានិភ័យដោយក្រុមពាណិជ្ជករ ដើម្បីជៀសវាងការប្រែប្រួលថ្លៃខ្ពស់ ក្នុងអំឡុងពេលនៃភាពមិនច្បាស់លាស់នៃស្ថានភាពសេដ្ឋកិច្ច និងភូមិសាស្ត្រនយោបាយជាដើម ។ ដោយឡែក Bitcoin គឺជាផលិតផលដែលមានហានិភ័យខ្ពស់មួយ ហើយមានវត្តមានរយៈពេលប៉ុន្មានឆ្នាំមកហើយ ។ ដូចយើងឃើញពីប៉ុន្មានខែមុន ថ្លៃ Bitcoin បានបង្ហាញការប្រែប្រួលយ៉ាងខ្លាំង»។
លោកបន្តថា កាលពីឆ្នាំទៅ មានប្រទេសមួយចំនួន និងអ្នកវិភាគជំនាញៗជាច្រើនបានប្រាប់ផងដែរថា យើងទាំងអស់គ្នាគួរតែប្រុងប្រយ័ត្នខ្ពស់ទៅលើភាពស្របច្បាប់ និងដំណើរការរបស់វា ព្រមទាំងពិចារណាថា តើយើងគួរតែចាត់ទុក Bitcoin ជាការវិនិយោគ ឬផលិតផលមានហានិភ័យខ្ពស់ ។ ថ្មីៗនេះ រដ្ឋាភិបាលចិនបានហាមឃាត់រាល់សកម្មភាព Bitcoin ទាំងអស់នៅក្នុងប្រទេសរបស់ខ្លួន ហើយបានចាត់ទុកវាជាឧបករណ៍ ឬការវិនិយោគខុសច្បាប់។
លោកបន្ថែមថា បើទោះបីជា Bitcoin អាចត្រូវបានជួញដូរពីកន្លែងផ្សេងៗគ្នាទូទាំងពិភពលោក ដោយគ្មានច្បាប់អនុញ្ញាតពេញលេញក៏ដោយ តែមានកម្មវិធីមួយដែលគេហៅថា blockchain បានជួយដំណើរការប្រតិបត្តិរួមទាំងការផ្ទេរ ឬផ្តល់សិទ្ធិជាម្ចាស់ Bitcoin។ បច្ចុប្បន្ននេះ ការជួញដូរត្រូវបានធ្វើឡើងដោយអ្នកបង្កើតតម្លៃទីផ្សារ ឬក្រុមហ៊ុនជួញដូរ Bitcoin តែម្តង ។ លោកថា ៖« មានកត្តាជាច្រើនដែលអ្នកជួញដូរ Bitcoin គួរតែយល់ដឹងដូចជា បញ្ហាសន្ទនីយ៍សាច់ប្រាក់ ការការពារពីពួកហែកប្រព័ន្ធអ៊ីនធើរណេត (Hackers) ការប្រើប្រាស់ថាមពលអគ្គិសនីដែលអាចផ្គត់ផ្គង់ដល់តម្រូវការនាពេលអនាគត ភាពស្របច្បាប់នៃយុត្តាធិការផ្សេងៗគ្នា ដែលជាចំណុចគួរពិចារណាចម្បងៗក្នុងពេលជួញដូរ Bitcoin » ។
លោកបញ្ជាក់ថា សេចក្តីប្រកាសថ្មីៗ របស់ធនាគារជាតិនៃកម្ពុជា គឺច្បាស់ណាស់ថា នឹងប៉ះពាល់ដល់ការជួញដូររូបិយប័ណ្ណឌីជីថល ហើយចំពោះបញ្ហានេះដែរ លោកជឿថា គណៈកម្មការមូលបត្រកម្ពុជា នឹងមិននៅស្ងៀមទេ ។ លោកថា ៖« ចាប់ពីឆ្នាំ២០១៦ គណៈកម្មការមូលបត្រកម្ពុជា (SECC) បានខិតខំប្រឹងប្រែងយ៉ាងខ្លាំងដើម្បីជំរុញការជួញដូរឧបករណ៍និស្សន្ទ រួមទាំងការខិតខំប្រឹងប្រែង និងការប្តេជ្ញាចិត្តរបស់ក្រុមហ៊ុនសមភាគីកណ្តាល (CCPs) ការជួញដូរឧបករណ៍និស្សន្ទមិនត្រឹមតែដឹកនាំប្រទេសកម្ពុជាឈានទៅមុខប៉ុណ្ណោះទេ ថែមទាំងដឹកនាំប្រទេសជិតខាងយើង ក្នុងការវិនិយោគយ៉ាងសម្បូរបែបសម្រាប់អ្នកវិនិយោគជាសាធារណៈទាំងអស់ » ។
គួរបញ្ជាក់ថា កាលពីពេលថ្មីៗនេះដែរ ធនាគារជាតិនៃកម្ពុជាបានប្រកាសមិនទទួលស្គាល់ការជួញដូររូបិយប័ណ្ណឌីជីថល (Bitcoin) នៅក្នុងប្រទេសកម្ពុជា ហើយបានព្រមានថា បើសិនជាមានបញ្ហាអ្វីនៅថ្ងៃខាងមុខ ធនាគារជាតិនឹងមិនទទួលខុសត្រូវចំពោះហានិភ័យដែលកើតឡើងដោយសាររូបិយប័ណ្ណឌីជីថលមួយនេះឡើយ ៕
ចែករំលែកព័តមាននេះ