រាជធានីភ្នំពេញ ៖ កម្មវិធី (Apps) សម្រាប់់ផ្ដល់ព័ត៌មានដល់មហាជនតាមទូរស័ព្ទចល័តរបស់ក្រសួងពាណិជ្ជកម្ម ត្រូវបានប្រកាសដាក់ឲ្យដំណើរការហើយ នៅលើប្រព័ន្ធប្រតិបត្តិការ Android ដោយលោកអ្នកអាចស្វែងរកបាននៅក្នុង Play Store ដោយប្រើពាក្យ « Ministry of Commerce Cambodia» ហើយនៅក្នុងពេលឆាប់ៗខាងមុខនេះ មន្ត្រីបច្ចេកទេសរបស់ក្រសួងពាណិជ្ជកម្ម នឹងធ្វើការអភិវឌ្ឍកម្មវិធីនេះបន្តទៀត ដើម្បីដំណើរការលើប្រព័ន្ធប្រតិបត្តិការ IOS ថែមទៀត ។
កម្មវិធីនេះជាផ្នែកមួយនៃយុទ្ធសាស្ត្រទំនាក់ទំនងសាធារណៈ ដើម្បីជំរុញលំហូរព័ត៌មានរបស់ក្រសួងទៅដល់ដៃសាធារណជនគ្រប់ពេលវេលា និងគ្រប់ទីកន្លែង ក្នុងគោលបំណងធ្វើឲ្យរដ្ឋបាលសាធារណៈកាន់តែភ្ជាប់ជិតស្និទ្ធជាមួយប្រជាពលរដ្ឋ ដែលជាអ្នកប្រើប្រាស់សេវា និងប្រកបមុខរបរវិជ្ជាជីវៈ ។
ថ្លែងក្នុងពិធីដាក់ឱ្យប្រើប្រាស់ជាផ្លូវការកាលពីថ្ងៃទី២៦ ធ្នូ ម្សិលមិញ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម មានប្រសាសន៍ថា កម្មវិធីព័ត៌មានសម្រាប់ទូរស័ព្ទចល័តនេះ នឹងរួមចំណែកលើកកម្ពស់ប្រសិទ្ធភាពនៃការផ្សព្វផ្សាយ និងការចែកចាយព័ត៌មានកាន់តែទូលំទូលាយ ស្តីពីសកម្មភាពការងារប្រចាំថ្ងៃរបស់ថ្នាក់ដឹកនាំ និងមន្ត្រីនៅក្នុងក្រសួងពាណិជ្ជកម្ម ព្រមទាំងសមិទ្ធផលសំខាន់ៗដែលក្រសួងសម្រេចបាននាពេលកន្លងមក ជូនដល់សាធារណជនគ្រប់មជ្ឈដ្ឋានជ្រាបកាន់តែច្បាស់អំពីតួនាទី, ភារកិច្ច និងការទទួលខុសត្រូវរបស់ក្រសួងពាណិជ្ជកម្ម ។
លោកស្រីនាយិកាក្រុមហ៊ុនផលិតនំស្រួយ លីលី មានប្រសាសន៍ថា ការទទួលបានព័ត៌មានពីក្រសួងពាណិជ្ជកម្ម សម្រាប់ពាណិជ្ជករក្នុងស្រុក ពាក់ព័ន្ធនឹងព័ត៌មាននៃការរៀបចំពិព័រណ៍ ពិសេសទាក់ទងនឹងច្បាប់ គឺជារឿងមួយល្អចំពោះពាណិជ្ជករ ។
លោកស្រី កែវ មុំ នាយិការូបនេះមានប្រសាសន៍ថា ៖« ចំពោះពាណិជ្ជករក្នុងស្រុក វាជារឿងចាំបាច់ក្នុងការទទួលបាននូវព័ត៌មានផ្សេងៗពីក្រសួងពាណិជ្ជកម្ម ពីព្រោះយើងជាពាណិជ្ជករ ដាច់ខាតត្រូវដឹងឱ្យច្បាស់ពីច្បាប់ទម្លាប់ ។ ក្រៅពីនេះ ព័ត៌មានពីការរៀបចំដាក់តាំងពិព័រណ៍ ជារឿងល្អ ពេលយើងបានដឹង » ។
លោកស្រីបន្តថា ៖« កម្មវិធីព័ត៌មានរបស់ក្រសួងពាណិជ្ជកម្ម (Apps) នេះសម្រាប់យុវវ័យបច្ចុប្បន្នគេចេះប្រើប្រាស់ និងដឹងពីរបៀបរកព័ត៌មាន តែសម្រាប់មនុស្សមានអាយុច្រើន ឬពាណិជ្ជករនៅតាមបណ្តាខេត្ត ពួកគាត់ហាក់មិនសូវយល់ដឹងអំពីកម្មវិធីនោះទេ ។ ដូចនេះ ទន្ទឹមនឹងក្រសួងបង្កើតនូវកម្មវិធីនេះឡើង ក្រសួងត្រូវធ្វើការផ្សព្វផ្សាយឱ្យទូលំទូលាយជាងនេះបន្ថែមទៀតថា ត្រូវធ្វើយ៉ាងម៉េចទើបអាចយកមកប្រើប្រាស់បាន»។
លោករដ្ឋមន្ត្រីសង្កត់ធ្ងន់ថា ៖« ប្រជាពលរដ្ឋអាចទូទៅ គឺអាចដកស្រង់ព័ត៌មាន និងលិខិតបទដ្ឋានគតិយុត្តនានាដែលតម្ដល់ក្នុងគេហទំព័រ ព្រមទាំងធ្វើ Comment Like ជាមួយនឹងគណនី Facebook របស់ក្រសួងពាណិជ្ជកម្ម ដោយមានការភ្ជាប់ជាស្វ័យប្រវត្តិជាមួយកម្មវិធីព័ត៌មានទូរស័ព្ទចល័តនេះ ។ សាធារណជនទាំងអស់ចូលរួមប្រើប្រាស់កម្មវិធីនេះ នឹងទទួលបានព័ត៌មានសំខាន់ៗ ជាពិសេស ការអនុវត្តគោលនយោបាយពាណិជ្ជកម្ម និងកម្មវិធីកំណែទម្រង់ស៊ីជម្រៅ ដើម្បីជំរុញការអភិវឌ្ឍវិស័យឯកជន ដែលជាសរសៃឈាមដ៏សំខាន់របស់សេដ្ឋកិច្ចកម្ពុជា » ។
លោករដ្ឋមន្ត្រីបន្ដថា ក្រៅពីបានដឹងពីសកម្មភាព និងសមិទ្ធផលការងារទាំងអស់នេះ មិនត្រឹមតែជាកញ្ចក់ឆ្លុះបញ្ចាំងអំពីកិច្ចប្រឹងប្រែងរបស់ក្រសួងពាណិជ្ជកម្ម និងរាជរដ្ឋាភិបាលប៉ុណ្ណោះទេ ប៉ុន្តែវាក៏ជាចំណេះដឹងយ៉ាងល្អ សម្រាប់និស្សិត, បញ្ញវន្ត, អ្នកសារព័ត៌មាន,សេដ្ឋវិទូ និងអ្នកសិក្សាស្រាវជ្រាវទូទៅផងដែរ ដើម្បីយកធ្វើជាឯកសារយោងសម្រាប់ជំនួយក្នុងការបំពេញការងាររបស់ខ្លួនប្រកបដោយប្រសិទ្ធភាព ៕
ចែករំលែកព័តមាននេះ