រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញនាព្រឹកថ្ងៃទី២៦ ខែធ្នូ ឆ្នាំ២០១៧ បានប្រកាសសាលក្រមសម្រេចផ្ដន្ទាទោសស្ត្រីម្នាក់ដាក់ពន្ធនាគារកំណត់២ឆ្នាំ និង៦ខែ ក្រោមការចោទប្រកាន់ពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន ។ ការផ្ដន្ទាទោសនេះតុលាការបានបង្គាប់ឲ្យជនត្រូវចោទសងសំណងប្រាក់ចំនួន៧ម៉ឺនដុល្លារ និងជំងឺចិត្តចំនួន២០លានរៀលដល់ដើមបណ្ដឹងរដ្ឋប្បវេណី និងពិន័យប្រាក់ឲ្យបង់ចូលថវិការដ្ឋចំនួន២លានរៀលផងដែរ ។
ជនជាប់ចោទឈ្មោះធូ ប៊ុនច័ន្ទតារា ភេទស្រី អាយុ៤៥ឆ្នាំ មានទីលំនៅផ្ទះលេខ១១បេ បុរីប៉េងហួត ផ្លូវ៥៩៨ សង្កាត់ភ្នំពេញថ្មី ខណ្ឌសែនសុខ មុខរបរនៅផ្ទះ ឃាត់ខ្លួននៅមុខបុរីប៉េងហួត សង្កាត់ភ្នំពេញថ្មី ខណ្ឌសែនសុខ ។ រឿងក្ដីនេះត្រូវបានលោកចៅក្រមលី លីបម៉េង លើកមកបើកសវនាការកាលពីថ្ងៃទី១២ ខែធ្នូនេះ ហើយបានប្រកាសសាលក្រមនៅព្រឹកថ្ងៃទី២៦ ខែធ្នូ នេះ ។
សូមបញ្ជាក់ថា កាលក្នុងសវនាការជនជាប់ចោទបានសារភាពថា នៅអំឡុងខែតុលា ឆ្នាំ២០១៤ ខ្លួនបានទទួលទិញដីមួយកន្លែងពីឈ្មោះឆយ លក្ខណា ភេទស្រី ក្នុងតម្លៃ២៧ម៉ឺនដុល្លារ ដោយបានប្រគល់ប្រាក់សុទ្ធមុនចំនួន២០ម៉ឺនដុល្លារ ចំណែកនៅសល់៧ម៉ឺនដុល្លារទៀតឈ្មោះឆយ លក្ខណា បានឲ្យខ្លួនចេញមូលប្បទានប័ត្រ (សែក) ចុះថ្ងៃទី០៨ ខែតុលា ឆ្នាំ២០១៤ ដើម្បីទុកតម្កល់ ប៉ុន្តែសែកនោះមិនទាន់មានប្រាក់ទេ ។
លុះក្រោយមកស្រាប់តែឈ្មោះឆយ លក្ខណា យកសែកដែលខ្លួនចេញទុកតម្កល់នោះមកប្ដឹងតែម្ដង ។ ករណីនេះជនជាប់ចោទសារភាពថា ខ្លួនពិតជាបានចេញសែកអត់មានប្រាក់មែន ដូច្នេះបានតំណាងអយ្យការតម្កល់ទុកការចោទប្រកាន់ពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន ។ គួរបញ្ជាក់ទៀតថាស្ត្រីឈ្មោះធូ ប៊ុនច័ន្ធតារា ត្រូវបានសមត្ថកិច្ចនគរបាលក្រសួងមហាផ្ទៃឃាត់ខ្លួន តាមដីកាបង្គាប់ឲ្យចាប់ខ្លួន និងឃុំខ្លួនលេខ០៣ ដកឧ ២០១៥ ចុះថ្ងៃទី១៦ ខែមិថុនា ឆ្នាំ២០១៥ ចេញដោយលោកឃុន លាងម៉េង ចៅក្រមជំនុំជម្រះសាលាឧទ្ធរណ៍ មូលហេតុចេញមូលប្បទានប័ត្រគ្មានសាច់ប្រាក់ កាលពីថ្ងៃទី០៨ ខែតុលា ឆ្នាំ២០១៤ ប្រព្រឹត្តនៅរាជធានីភ្នំពេញ ៕
ចែករំលែកព័តមាននេះ