រាជធានីភ្នំពេញ ៖ សេចក្តីរាយការណ៍ឱ្យដឹងថា មនុស្ស២នាក់ស្លាប់ និងម្នាក់ទៀតបានរងរបួសធ្ងន់ កើតឡើងក្នុងករណី២ផ្សេងៗគ្នា ក៏ប៉ុន្តែប្រភពខ្លះនិយាយថា អាចជារឿងទាក់ទងគ្នាតែមួយ ។
សេចក្តីរាយការណ៍បន្តថា ករណីទី១ គឺបានកើតឡើងកាលពីវេលាម៉ោង១២រំលងអធ្រាត្រ ឈានចូលថ្ងៃទី២៦ ធ្នូ នេះ ស្ថិតលើផ្លូវលំ ផ្ទះលេខ០១ ឃុំទួលពង្រ សង្កាត់ចោមចៅ១ ខណ្ឌពោធិ៍សែនជ័យ ក្រោយពីមានជនមិនស្គាល់មុខ៥នាក់ជិះម៉ូតូមក ព្រួតវាយសម្លាប់នៅមុខផ្ទះ បណ្តាលឱ្យម្នាក់ស្លាប់ ម្នាក់រងរបួសធ្ងន់ ។ ជនរងគ្រោះដែលស្លាប់មានឈ្មោះសឿង សូរិយា អាយុ២៨ឆ្នាំ ជាអ្នកលីសែង មានស្រុកកំណើតនៅខេត្តព្រៃវែង រីឯម្នាក់ទៀត ឈ្មោះសុវ៉ាន់ណាក់ អាយុ២៥ឆ្នាំ របួសធ្ងន់ ជាគ្រូបង្រៀន មានស្រុកកំណើតនៅខេត្តបាត់ដំបង ។
ទាក់ទិនករណីនេះ គឺត្រូវបានសង្ស័យអាចផ្តើមចេញពីរឿងគំនុំ ព្រោះកាលពីវេលាប្រហែល០៤រសៀលថ្ងៃទី២៥ ធ្នូ ក្រោយពីឈ្មោះសឿង សូរិយា (អ្នកស្លាប់) ជិះម៉ូតូទៅយកប្រពន្ធមកពីផ្សារទៅផ្ទះវិញ ក៏ត្រូវក្រុមអ្នកផឹកស៊ី បានគប់ដបទឹកសុទ្ធពីលើខ្លួន ហើយក៏បានជិះម៉ូតូត្រឡប់ទៅសួរនាំក្រុមទាំងនោះវិញថា (ហេតុអីក៏គប់ដបទឹកសុទ្ធលើខ្លួនចឹង) ប៉ុន្តែពេលនោះ មិនមានកើតហិង្សាអ្វីនោះទេ ។ លុះដល់វេលាកើតហេតុ ខណៈជនរងគ្រោះកំពុងឈរមុខផ្ទះជួលនោះ ស្រាប់តែលេចមុខក្រុមជិះម៉ូតូមកឈប់ព្រួតវាយពួកគេ បណ្តាលឱ្យមានម្នាក់ស្លាប់ និងម្នាក់ទៀតរបួសធ្ងន់តែម្តង ហើយក្រុមទាំងនោះជិះគេចខ្លួនអស់ទៅ ។
ដោយឡែក ករណីទី២ គឺយុវជនម្នាក់ឈ្មោះធឿន បុរី ហៅរាក់ អាយុ១៧ឆ្នាំ ត្រូវបានម្តាយប្រទះឃើញដេកស្លាប់នៅក្នុងផ្ទះវីឡារបស់ខ្លួន ស្ថិតក្នុងភូមិ-ឃុំខាងលើ (ដូចករណីទី១) បង្កឱ្យមានការភ្ញាក់ផ្អើល កាលពីវេលាម៉ោង០៩ព្រឹកថ្ងៃទី២៦ ធ្នូ ដែលករណីនេះ មានអ្នកខ្លះនិយាយថា ជនរងគ្រោះដែលស្លាប់នេះ គឺជាក្រុមផឹកស៊ីគប់ដបទឹកសុទ្ធ (ជាភាគីម្ខាង) ។
បើតាមស្តីម្តាយជនរងគ្រោះថា កាលពីវេលាម៉ោងជាង១២រំលងអធ្រាត្រ ឈានចូលថ្ងៃទី២៦ ធ្នូ កូនប្រុសគាត់ (ជនរងគ្រោះ)បានដើរត្រឡប់ពីផឹកស៊ីក្នុងភូមិមកផ្ទះវិញ ហើយឃើញមានរបួសក្បាល ។ គាត់បានសួរទៅកូនប្រុសគាត់ថា មានរឿងអី? កូនប្រុសគាត់ឆ្លើយថា មិនអីទេ ហើយឃើញកូនដើរចូលទៅក្នុងបន្ទប់ដេកបាត់ទៅ ។ លុះដល់ម៉ោង០៩ព្រឹក មិនឃើញកូនប្រុសងើបពីដេក ទៅរកមើល ស្រាប់តែប្រទះឃើញស្លាប់តែម្តង ។
ទាំង២ករណីនេះ សមត្ថកិច្ចកំពុងសង្ស័យថា អាចជារឿងតែមួយផ្តើមចេញពីរឿងគំនុំ គ្រាន់តែជាភាគីម្ខាងៗតែប៉ុណ្ណោះ ។ បច្ចុប្បន្ន សមត្ថកិច្ចកំពុងធ្វើការស្រាវជ្រាវបន្ត ។
ចែករំលែកព័តមាននេះ