ខេត្តបាត់ដំបង ៖ បុរសវ័យចំណាស់ម្នាក់បានចង.កសម្លាប់ខ្លួននៅមុនពេលថ្ងៃរះដែលជាថ្ងៃភ្ញាប់ឡើងត្រូវភ្ជាប់ពាក្យកូនស្រី ។ នេះជាការរៀបរាប់របស់ក្រុមគ្រួសារប្រាប់ទៅសមត្ថកិច្ចដែលចុះទៅកាន់កន្លែងកើតហេតុ ។
សមត្ថកិច្ចបានប្រាប់ថា សាកសពបុរសនេះត្រូវក្រុមគ្រួសារប្រទះឃើញនៅម៉ោង៥ព្រឹកថ្ងៃទី២៦ ខែធ្នូនេះ នៅភូមិទួលតាថុន ឃុំជ្រៃ ស្រុកមោងឫស្សី ។ ជនរងគ្រោះឈ្មោះសុង សល់ ភេទប្រុស អាយុ៥៦ឆ្នាំ មុខរបរធ្វើស្រែ រស់នៅភូមិ-ឃុំកើតហេតុខាងលើ ។ មន្ត្រីដដែលបានបញ្ជាក់ថា ជនរងគ្រោះបានយកកន្សែងទៅចង.ក លើដើមស្វាយនៅក្រោយផ្ទះប្រហែល១០ម៉ែត្រ ប៉ុន្តែក្រុមគ្រួសារមិនបានដឹងថា គាត់ធ្វើអត្តឃាតខ្លួនឯងបែបនេះពីពេលណានោះទេ លុះនៅម៉ោង៥ព្រឹក ពេលងើបពីដំណេកទើបមានការភ្ញាក់ផ្អើលឃើញគាត់ចង.កសម្លាប់នៅលើដើមស្វាយទៅហើយ ។
ការអះអាងរបស់ក្រុមគ្រួសារ ដែលសមត្ថកិច្ចបានស្រង់សម្រីបាននិយាយថា ជនរងគ្រោះនឹងត្រូវរៀចចំផ្ទះសម្បែង ដើម្បីរៀបចំពិធីភ្ជាប់ពាក្យកូនស្រីនៅព្រឹកថ្ងៃទី២៦ ខែធ្នូនេះ តែមុនពេលថ្ងៃរះគាត់បានធ្វើអត្តឃាតខ្លួនឯងបាត់ទៅហើយ ។ ប្រភពពីសាច់ញាតិដដែលបានប្រាប់សមត្ថកិច្ចថា ជនរងគ្រោះហាក់មានអារម្មណ៏មិនល្អមួយរយៈកន្លងទៅនេះ ។ គាត់តែងរអ៊ួរទាំពីរឿងទឹកលិចស្រូវអស់ និងផ្ទះតូចចង្អៀតពិបាករៀបចំពិធីភ្ជាប់ពាក្យឲ្យកូនស្រី ។ ទំនងផលវិបាកទាំងនេះហើយ ដែលនាំឲ្យគាត់សម្រេចបញ្ចប់បញ្ហាគ្រប់បែបយ៉ាងតាមរយៈការធ្វើអត្តឃាតបែបនេះ ។ ប៉ុន្តែទាំងក្រុមគ្រួសារ ទាំងអ្នកភូមិមានការរន្ធត់ចិត្ត និងសោកស្ដាយចំពោះជនរងគ្រោះ ដែលមិនគួរជ្រើសរើសយកផ្លូវទាល់ច្រកបែបនេះ ។
លោកសោម រ៉ាវុធ មន្ត្រីនគរបាលនិយាយថា មូលហេតុខាងលើនេះ គឺជាការបំភ្លឺខ្លះៗពីក្រុមគ្រួសារជនរងគ្រោះ ជុំវិញការធ្វើអត្ដឃាតរបស់ជនរងគ្រោះ ។ ប៉ុន្តែបន្ទាប់ពីមានសេចក្ដីរាយការណ៏មន្ត្រីជំនាញបានចុះទៅពិនិត្យដល់កន្លែងកើតហេតុភ្លាមៗដែរ ។
មន្ត្រីដដែលបានបញ្ជាក់ថា គេមិនទាន់ដឹងថា ក្រោយពីក្រុមគ្រួសារជួបសោកនាដកម្មបែបនេះ តើពិធីភ្ជាប់ពាក្យកូននឹងលើកពេលឬបែបណានោះទេ ព្រោះពេលនេះសាច់ញាតិនិងអ្នកភូមិកំពុងរៀបចំធ្វើបុណ្យជនរងគ្រោះនៅក្នុងលំនៅឋានដ៏តូចចង្អៀតនេះ ៕
ចែករំលែកព័តមាននេះ