ទីក្រុង STANFORD ៖ រាល់រង្វាស់សេដ្ឋកិច្ចម៉ាក្រូធំៗរួមមាន ការលូតលាស់នៃអត្រាអ្នកគ្មានការងារធ្វើ និងអត្រាអតិផរណាបានបង្ហាញថា សេដ្ឋកិច្ចរបស់សហរដ្ឋអាមេរិកក្នុងឆ្នាំ២០១៧ ស្ថិតក្នុងកម្រិតល្អជាងគេសម្រាប់រយៈពេល១០ឆ្នាំមកនេះ ។ សេដ្ឋកិច្ចពិភពលោកកំពុងតែលូតលាស់យ៉ាងខ្លាំង និងស្របគ្នាច្រើនជាងការគិតទុក ។ ប៉ុន្តែតើវាអាចបន្តដល់ឆ្នាំ២០១៨ដែរឬទេ ?
យើងត្រូវពឹងផ្អែកទៅលើគោលនយោបាយរូបិយប័ណ្ណ, ហិរញ្ញវត្ថុ, ពាណិជ្ជកម្ម និងគោលនយោបាយជាប់ពាក់ព័ន្ធជាច្រើនទៀតនៅសហរដ្ឋអាមេរិក និងប្រទេសដទៃនៅជុំវិញពិភពលោក ។ វាពិតជាពិបាកណាស់ក្នុងការទស្សន៍ទាយដឹងពីសំណើ ដែលនឹងលេចឡើងនៅឆ្នាំ២០១៨ខាងមុខ ។
សហរដ្ឋអាមេរិក បារាំង និងចក្រភពអង់គ្លេសសុទ្ធតែមានអ្នកដឹកនាំថ្មី ហើយអ្នកដឹកនាំក្នុងប្រទេសអាល្លឺម៉ង់មិនទាន់បានរៀបចំក្រុមអភិបាលឡើយ តាំងពីការបោះឆ្នោតជាតិនៅខែកញ្ញា ខណៈធនាគារជាតិអាមេរិកនៅមិនទាន់មានប្រធានដែលទទួលបានការយល់ព្រម។
លើសពីនេះ ការផ្លាស់ប្តូរសំខាន់ៗក្នុងប្រទេសកំពុងអភិវឌ្ឍន៍ដូចជា អាហ្សង់ទីន, អារ៉ាប៊ីសាអូឌីត និងប្រេស៊ីលបានធ្វើឲ្យទស្សនវិស័យសម្រាប់អនាគតកាន់តែមានភាពមិនប្រាកដប្រជា។ ប៉ុន្តែយើងគួរតែសង្ឃឹមថា នឹងមានរឿងល្អៗក្នុងឆ្នាំ២០១៨នេះ ។
១-យើងត្រូវសង្ឃឹមថា ការលូតលាស់សេដ្ឋកិច្ចពិភពលោក៤% នឹងបន្តក្នុងឆ្នាំ២០១៨ ដូចការព្យាកររបស់មូលនិធិរូបិយវត្ថុអន្តរជាតិ។ ការលូតលាស់មិនត្រឹមតែបង្កើនប្រាក់ចំណូលទេ ប៉ុន្តែអាចដោះស្រាយបញ្ហាជាច្រើនទៀតដូចជា កម្ចីពីធនាគារ និងឱនភាពថវិកាជាដើម ។
២-យើងត្រូវសង្ឃឹមថា ធនាគារជាតិរបស់អាមេរិកនឹងមានការគ្រប់គ្រងយ៉ាងស្ថិតស្ថេរដោយលោក Jerome Powell ។ ពួកយើងគួរតែសង្ឃឹមថា ស្ថានភាពសេដ្ឋកិច្ចនឹងអនុញ្ញាតឲ្យធនាគារជាតិធំៗ ជាពិសេស ធនាគារជាតិអឺរ៉ុបធ្វើតាមនេះ ។
៣-យើងគួរសង្ឃឹមថា សំណើរបស់គណបក្សសាធារណរដ្ឋទាក់ទងនឹងច្បាប់រដ្ឋាករនៅសហរដ្ឋអាមេរិក នឹងអាចជំរុញការវិនិយោគ ទិន្នផល សមត្ថភាពផលិត និងប្រាក់បៀវត្សរ៍ដូចដែលបានសន្យាក្នុងរយៈពេល១០ឆ្នាំខាងមុខ ។
ប្រាកដណាស់ ការមើលឃើញថា តើការវិនិយោគនឹងកើនឡើងឬអត់ គឺនឹងពឹងផ្អែកលើកត្តាជាច្រើនលើសពីអត្រាពន្ធក្រុមហ៊ុន ។ ច្បាប់ថ្មីអាចនឹងជំរុញដល់ទិន្នផល សមត្ថភាពផលិត និងប្រាក់បៀវត្សរ៍មែន ប៉ុន្តែចំណុចសំខាន់ គឺនៅពេលណា ។
លទ្ធផលប្រហែលជាមិនអាចមើលឃើញទេនៅមុនឆ្នាំ២០១៨ ឬការបោះឆ្នោតឆ្នាំ២០២០ ហើយវាអាចនឹងប៉ះពាល់ដល់ផ្នែកនយោបាយផងដែរ ។ អ្វីគ្រោះថា្នក់ជាងនេះទៀត គឺអត្ថប្រយោជន៍របស់វាអាចនឹងពន្យារពេល ហើយវាត្រូវបានលុបចោល នៅពេលសមាជិកគណបក្សប្រជាធិបតេយ្យឡើងកាន់អំណាចវិញ ។
៤-យើងគួរសង្ឃឹមថា រដ្ឋាភិបាលគ្រប់ប្រទេសនឹងចាប់ផ្តើមដោះស្រាយបញ្ហាការចំណាយផ្នែកប្រាក់ចូលនិវត្តន៍ និងការធានាសុខភាព ដែលបានកើនឡើងអស់រយៈពេលជាច្រើនទសវត្សរ៍មកហើយ ។ កញ្ចប់ទាំងនេះកាន់តែមានតម្លៃខ្ពស់ទៅៗ ហើយប៉ះពាល់ដល់ការចំណាយសំខាន់ៗរបស់រដ្ឋាភិបាលដូចជា ផ្នែកការពារ និងដាក់សម្ពាធឲ្យមានការដាក់ពន្ធកាន់តែខ្ពស់ផងដែរ ។
ប្រទេសក្នុងសហភាពអឺរុបជាច្រើនត្រូវកាត់បន្ថយបំណុលរដ្ឋាភិបាល ហើយតំបន់អឺរ៉ូត្រូវដោះស្រាយបញ្ហាធនាគារ ។ លើសពីនេះ ការធ្វើកំណែទម្រង់ទីផ្សារការងារដូចនឹងអ្វីដែលលោកប្រធានាធិបតីបារាំង Emmanuel Macron កំពុងតែធ្វើ គួរត្រូវបានស្វាគមន៍។
៥-យើងត្រូវសង្ឃឹមថា តំបន់អឺរ៉ូអាចជៀសផុតបញ្ហារូបិយប័ណ្ណបាន ។ វានឹងពឹងផ្អែកយ៉ាងខ្លាំងទៅលើលោកស្រីអធិបតីអាល្លឺម៉ង់ Angela Merkel ដោយរៀបចំរដ្ឋាភិបាលចម្រុះមួយ និងបង្កើតឲ្យមានស្ថិរភាពនយោបាយដល់ប្រទេសដែលមានសេដ្ឋកិច្ចធំជាងគេនៅអឺរ៉ុប ។
៦-ពួកយើងគួរសង្ឃឹមថា សហភាពអឺរ៉ុប និងចក្រភពអង់គ្លេសអាចយល់ស្របលើកិច្ចព្រមព្រៀង Brexit ដែលនឹងរក្សាទំនាក់ទំនងពាណិជ្ជកម្មរឹងមាំ ។ ក្រៅពីអឺរ៉ុបហើយ ពួកយើងត្រូវសង្ឃឹមថា ការចរចារវាងសហរដ្ឋអាមេរិក កាណាដា និងម៉ិកស៊ិក ទាក់ទងនឹងកិច្ចព្រមព្រៀង NAFTA នឹងមានលទ្ធផលល្អ ។
៧-យើងត្រូវសង្ឃឹមថា គោលនយោបាយថ្មីៗសម្រាប់បច្ចេកវិទ្យាព័ត៌មាន និងទំនាក់ទំនងនឹងមានលំនឹងគ្រប់ភាគីចូលរួមប្រកួត ។
ជាចុងក្រោយ យើងត្រូវសង្ឃឹមថា ភេរវកម្មនឹងដួលរលំ ជម្លោះនឹងធ្លាក់ចុះ ប្រជាធិបតេយ្យ និងមូលធននិយមអាចបន្តលូតលាស់ ហើយការគោរព និងការសន្ទនាដោយស្មោះត្រង់អាចត្រឡប់មកវិញ ។ ប្រសិនបើកត្តាទាំងនេះអាចកើតឡើងពិតមែននោះ នៅឆ្នាំ២០១៨ នឹងក្លាយជាឆ្នាំដ៏ល្អ ៕
ដកស្រង់ពី Project-syndicate
ចែករំលែកព័តមាននេះ