ខេត្តកំពង់ស្ពឺ ៖ ដើមពពេលជាធាតុផ្សំមួយយ៉ាងសំខាន់ក្នុងការផលិតស្ករត្នោតឲ្យមានគុណភាព ។ ដើម្បីឱ្យស្ករត្នោតកំពង់ស្ពឺនៅតែរក្សាបានកេរ្តិ៍ឈ្មោះរសជាតិឆ្ងាញ់ និងរក្សាអត្តសញ្ញាណជាតិ ប្រធានសមាគមស្ករត្នោត កំពង់ស្ពឺស្នើសុំប្រមុខរាជរដ្ឋាភិបាលកម្ពុជា ផ្តល់ដីសម្បទានរបស់រដ្ឋមួយកនែ្លងឱ្យសមាគមដាំដើមពពេល ខណៈបច្ចុប្បន្ន សមាជិកអ្នកឡើងត្នោតកំពុងជួបបញ្ហាប្រឈម ។
លោក សំ សារឿន ប្រធានសមាគមលើកកម្ពស់ស្ករត្នោតកំពង់ស្ពឺ បានឱ្យដឹងថា ចាប់តាំងពីរោងចក្រវាយនភ័ណ្ឌ និងសំណង់ស៊ីវិលចាប់ផ្តើមមានច្រើនមកឃើញថា អ្នកឡើងត្នោតបោះបង់ទៅធ្វើសំណង់ច្រើន ហើយអ្វីដែលកាន់តែព្រួយបារម្ភបំផុតនោះ គឺពាក់ព័ន្ធនឹងវត្ថុធាតុដើម ពិសេសដើមពពេល ដែលជាធាតុផ្សំសំខាន់មួយមិនអាចខ្វះបានក្នុងការផលិតស្ករសព្វថ្ងៃ និងអនាគត ។
លោកបន្តថា ៖« ឥឡូវនេះ ខ្ញុំកំពុងតែស្នើទៅមន្ទីរកសិកម្ម សុំឲ្យរាជរដ្ឋាភិបាលអាចរកមើលដីសម្បទានរបស់រដ្ឋមួយកន្លែងណាមានទំហំ២ឬ៣ហិកតា ផ្តល់ឱ្យសមាគមដាំដើមពពេលទុកប្រើប្រាស់បន្តនាថ្ងៃអនាគត ព្រោះសព្វថ្ងៃនេះ ព្រៃពពេល វាចង់បាត់បង់អស់ទៅហើយ ។ ក្នុងការផលិតស្ករកន្លងមក អ្នកឡើងត្នោតទៅរកដើមពពេលនេះឆ្ងាយពីសហគមន៍ប្រហែលពី៥០ទៅ៦០គីឡូម៉ែត្រទម្រាំនឹងបាន ហើយនៅព្រៃឆ្ងាយៗ ជិតភ្នំខ្ពស់ៗថែមទៀត » ។
បើតាមប្រធានសមាគមរូបនេះថា ក្នុងករណីប្រមុខរាជរដ្ឋាភិបាលផ្តល់ដីមួយកន្លែងនៅក្នុងខេត្តកំពង់ស្ពឺ គម្លាតឆ្ងាយជិត លោកមិនគិតទេ ឱ្យតែមានដីទុកដាំដើមពពេលសម្រាប់កសិករយកមកប្រើធ្វើជាធាតុផ្សំផលិតស្ករត្នោត និងជួយកាត់បន្ថយការចំណាយ ព្រោះកន្លងទៅនេះ អ្នកឡើងត្នោតក្នុង១គ្រួសារចំណាយទិញសម្បកពពេលនេះ អស់ប្រាក់ប្រហែល៦០ម៉ឺនរៀលក្នុង១ឆ្នាំ ។
លោក សំ សារឿន គូសបញ្ជាក់ថា ៖«ដើម ឬសម្បកពពេលនេះចូលរួមចំណែកយ៉ាងសំខាន់មិនអាចខ្វះបានក្នុងការផលិតស្ករត្នោតឱ្យមានគុណភាពល្អ និងរសជាតិឆ្ងាញ់ ។
បើគ្មានដើមពពេលទេនោះ សមាគម និងអ្នកឡើងត្នោត នៅថ្ងៃអនាគតនឹងជួបបញ្ហាខ្លាំងមែនទែន ។ ដូចនេះ តាមរយៈកាសែតកោះសន្តិភាព ខ្ញុំទទូចសុំទៅប្រមុខរដ្ឋាភិបាលជួយដោះស្រាយ ឬផ្តល់ដីកន្លែងណាមួយឱ្យសមាគមទុកឱ្យកសិករឡើងត្នោតបន្តអាជីវកម្មដើម្បីចូលរួមថែរក្សាកេរដំណែលពីដូនតា ពីព្រោះដើមត្នោតជាអត្តសញ្ញាណជាតិ ខណៈបច្ចុប្បន្ន ស្ករត្នោតកំពង់ស្ពឺកំពុងល្បី និងទទួលបានមេដាយមាសនៅអាស៊ី ដែលជាផលិតផលមានគុណភាពស្តង់ដាលើសគេ គឺស្ករត្នោតកម្ពុជា » ។
តាមប្រធានសមាគមដែលធ្លាប់មានបទពិសោធន៍ឡើងត្នោតជាង២០ឆ្នាំនៅក្នុងជីវិត អះអាងថា ៖« សមាគមនឹងបន្តធ្វើឱ្យកេរ្តិ៍ស្ករត្នោតកាន់តែល្បីឡើងៗ និងរក្សាគុណភាពល្អ ។ ដរាបខ្ញុំនៅជាប្រធានសមាគម ខ្ញុំនឹងដុតដៃជើង ដើម្បីធ្វើសកម្មភាពនេះឱ្យបានជោគជ័យ ។ ដូចសម្តេចធ្លាប់មានប្រសាសន៍ថា ដរាបណាសម្តេចនៅតែជានាយករដ្ឋមន្ត្រី សម្តេចនឹងកសាងប្រទេសឱ្យរីកចម្រើនទូលំទូលាយ ។ អីចឹង ក្នុងនាមខ្ញុំនៅតែជាប្រធានសមាគម ខ្ញុំនឹងខំប្រឹងជួយដល់ផលិតករ កសិករ និងធ្វើឱ្យផលិតផលស្ករត្នោតកំពង់ស្ពឺល្បីបន្តទៅទៀត » ។
គួររំឭកថា ការប្រកបមុខរបរស្ករត្នោតក្នុងខេត្តកំពង់ស្ពឺ ក្រៅពីជួបបញ្ហាប្រឈមខាងលើ សមាគមមួយនេះក៏ព្រួយបារម្ភថា គួរធ្វើយ៉ាងណា ឱ្យផលិតកម្មស្ករត្នោតមាននិរន្តរភាពនៅពេលអនាគតផងដែរ ព្រោះមនុស្សជំនាន់ក្រោយមិនសូវចាប់អារម្មណ៍ចង់បន្តវេនអាជីវកម្មពីដូនតាទេ ដោយពួកគេងាកទៅប្រកបអាជីវកម្មផ្សេងវិញ ៕
ចែករំលែកព័តមាននេះ